Atnutnu 11
11
Byitusu ga awyeknaya əwo aɓəzhni nya
1Atnutnuloyi n agaiciyagayii fyi n Yahudiya əknyi vnyanya, ɓa kwu wo nge Abyedo cè, ɓa la Shekwoyi ɓədagbma gwo. 2Ntulonu she Byitusu ɓə lo Urishelima, anyaznuyi agaiciyagayi ɓa daɓo kpe wo 3ɓa gna, “Ho ɓə lo haa lodna n atnanyaznuyi pwuwa jesnu ha kwu nyagyi kwnu gyi n ɓai.”
4Byitusu wa ya anabagyi wu she kwo ɓə ya n kpmisnui, wa wu ɓa alafyiya vnyanya: 5“Mi ɓə dna n Joppa əzhiyaakwo nu mii zhniaduwa, dna n əgye-znugyei, ma gye ɓəwyegye. Ma gye ənya ngye shnipa yaakwo ai ta kwo ya shnizhi ncei n əshemi n əkwo aɓwakwonu ngwnu-anyi, jesnu kwa shnishi n aba n mi ɓə shi nyi. 6Ma shi kwo awye ma gye anyafwanya apita-anyi da n ɓa fyi əknyi, anyawnanyawna, anya n ɓa kwó n nubwoi jesnu n alui. 7Nlonu ma wo bəgye kwoi gna mi, ‘Byitusu, laka gnyi, wu jesnu ha gyi.’
8“Ma dnaɓəgbe, ‘Dagayi, aawo, ɓəhnihni! Ənya ajegbmii ho kwo tnagyii to shni lodna n əmi əgbe m.’
9“Bəgye kwo gbmi ɓe n əshemi kwa daɓo əɓwa baayi, ‘To yi nyahonyahoi nge ajegbmiyi n Shekwoyi la kwo zhni gyigyiyii m.’ 10Dəye kwa zhni nlonu aɓwa ngwnu-ata, nlonu a je kwo lagwnu lo ncei n əshemi.
11“N ɓwasnu n əsayii nu, aza ngwnu-ata n a ɓə tnu n ɓai n əmi aba, ɓai kwnu n Kaisariya nyi, ɓa kpezhi n pwuwa aba n mi ɓə dna nyi. 12Zafnu wa gna mi nge mi to wo ɓwato n mi ɓa kwnulo n ɓai m. Əmi azaje ngwnu-tnanyi ye ce, ɓa kwnulo n mii, jesnu ya lofyi n əza yi pwuwa. 13Wa gna yi shi maləka ɓə kpeya da wo dna n əwo pwuwa jesnu wa gna, ‘Tnu Sima ɓo n Joppa n a je wo yi ge Byitusu nyi. 14Wo ɓə ɓe fye n nabagyii, n əho n əho pwuwai vnyanya, ɓə ɓwa gnyignyi n əkwo nu.’
15“Shi mi ɓə ya ɓəda da, Zafnu Gyigyiyi wa shnikpe n ɓa ngye shi wo ɓə shnikpe n yi n pyentikwos ayayaba nyi. 16Nlonu ma pa əɓo n Dagayi ɓəə kwu da: ‘Yohana ɓə zhni batizima n nuwnai nu, ama a ɓə zhni fye batizima n Zafnu Gyigyiyii nu.’ 17Ntulonu ngye Shekwoyi ɓə ga ɓa nyaga gbmanyigbmanyi nu, n wo ɓə ga yi, n yi ɓə kwu gaiciyaga dna n Dagayi Yeisu Kirisiti nyi, mi ɓə zhni nyika nu, ma zhninubwo nge mi ɓa znu Shekwoyi zokwo a?”
18She ɓa ɓə wo dəye, to ɓa shna gwodu n aɓənai m, ɓa ci Shekwoyi, ɓai gna, “Kwo wu nu nge, kwo Abyedo ce, Shekwoyi wo la abwuye ga ɓa n kwo ɓe n wyewyeyi nyi.”
Ikilisiya dna n Antiyok
19Nsayi aza yi n ɓa ɓəə la gnamyi ntu awyesnugbegye ɓo, n kwo ɓəə la laka gnyi əsa n a ɓə wu Istifanus nyi, ɓa znazna ɓa kwu si Fonishiya, Saipwurus n Antiyoki, ɓai ɓwa ɓədagbma gnamyi fyi n Ayahudiyi atasni nu. 20Ama azaho n ɓa, aza n ɓa ɓə kwnu n Saipwurus n Sirenii, ɓa lo Antiyok ɓa ya ɓəda da n Agirikiyii ce, ɓai gna ɓa nabagyi manai ntu Dagayi Yeisu ɓo. 21Dagayi əɓwa ɓə kwnusnu n ɓai, aza bəgyé ɓa kwu gaiciyaga jesnu ɓa pmyilo da Dagayi.
22Nabagyi dəye, kwa si da ikilisiya dna n Urishelima, ɓa tnu Banaba tnutnu lo Antiyok. 23She wo ɓə si, wa gye əɓo n shebmyashi Shekwoyi nya kwo kwu zhni nyi, wa wo agbmada, jesnu wa myi ɓa bwugbazhi vnyanya nge ɓa kwu kpefyi n Dagayi cewo n əɓa adui vnyanya. 24Wo ɓə zhni əza manai nu, n nunui n Zafnu Gyigyiyii ɓədo n gaiciyagai, jesnu aza bəgyé ɓa kwu gaiciyaganunui fyi n Dagayi.
25Nlonu Banaba wa lo Tarsus wo zna Soolu shni, 26she wo ɓə gye wo əwye, wa ɓe n woi n Antiyok. Ntulonu dna n əye ɓwugyi Banaba n Soolui ɓa yezhi n kwnusnu n ikilisiyai ɓai wunya ga aza bəgyé. Dna n Antiyok nu n a ɓə yi amwutuyi n kpmisnu ge Kirisitiavyiyi.
27Dna n əsa ye sheaɓəgwognayi ho ɓa kwnu shnizhi n Urishelima ɓai lo Antiyok. 28Zaknayi n ɓa, ai yi wo ge Agabwus, wa laka gnyi, dna n Zafnu, wa da ɓəwyegye myikwnu nazhii nya, n kwo ɓə gwnu dna n Roman əknyi vnyanya. (Dəye ɓə kwa nu dna n Kladiyus əbegyi əsa.) 29Amwutuyi, ngye shi zahozahoyi ɓə ɓa myi, wa dnabwugba wa ga bmazhni ntu avyiyi ɓo azanugbai n anyikwozai; n ɓa ɓə fyi n Yahudiya nyi. 30Ɓa ɓə zhni ɓəye ɓa tnu abyeda n əɓa anyagai dna n Banaba n Soolui akwnu nu.
ទើបបានជ្រើសរើសហើយ៖
Atnutnu 11: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
