Balomɛ́ŋ 16
16
Mbígélíd siámɛ
1Mmánúdúmɛ́n Foébe ndiméen wasɔ wa ugándɔ, eŋelibuóli wa Gimbi giá beédébi bá Klístus giá Sanklé. 2Nágínánɔ yɔ́ uguá Ɔgúná mpónyé imoómi naá abánya bisámb, gígénínénu yɔ́ ɔmbɔ́g gá buá gidigid ubuɔ́ únya wa bianan niída na buɔ́ uguánɔ. Gá giagiá waábá ŋŋíge ya bandɔ giod naánamɛ muɛ́d. 3Mbígélídínyénénu Plisíl na Akilás ɔbɔɔ́ díálanɔ́ buóli nɔɔ́nɔb uguá Yésuse Klístus. 4Bámabá gá nímie dusɔ́da duɔ́b gá sódie nusɔ́da nuámɛ, ndibá yaŋuá omoómi mbídúmenye bɔ́, Bimbi biá beédébi bá Klístus gidigid biá guísi ibídiabá biá bayúdɛn bíéguéŋén bɔ́ mbíyigie súsɔ́n. 5Mbígélídínyénénu súsɔ́n Gimbi giá beédébi bá Klístus igíbídidenú uguá giansɛ giá giádábɛ́n igínya uguɔ́b guá giansɛ. Mbígélídínyénénu ndága yamɛ Epenɛ́t mɔndɔ wa busió wa guágɔdɛ́m uguá Klístus uguá Así. 6Mbígélídínyénu Malía úmɔɔ́gɔ́l giod giá gidɔga gánɔ. 7Mbígélídínyénénu Andlonikús na Yuniás, beliméen bámɛ bá manɔ́ŋ ɔbɔɔ́ bémedígímbén ɔlɔŋ. Bányɛ bebinene ɔbɔɔ́ bɔ́gɔ́lɔnaá uguá udényi, bémebué muɛ́d gulɛns Klístus gámɛ. 8Mbígélídínyénénu Ampliatús unyaá ndága yamɛ uguá Ɔgúná 9Mbígélídínyénénu Ulbɛ́n uyɔɔ́ díálanɔ́ buóli neéneg uguá Klístus na ndága yamɛ Sitakís 10Mbígélídínyénénu Apɛ́l umeédíye gual guég uguá Klístus, mbígélídínyénénu abánya uguá giansɛ giá Alistobúl. 11Mbígélídínyénénu síe wamɛ Helodióŋ, mbígélídínyénénu abánya uguá giansɛ giá Nalsís abánya súsɔ́n uguá Ɔgúná. 12Mbígélídínyénénu Tlifɛ́n na Tlifɔ́s ɔbɔ́mɔ́gɔ́l gidɔga gá busió buá Ɔgúná, mbígélídínyénénu ndága ya ugándɔ Pɛlsíd umɔɔ́gɔ́l giod giá meyú gá busió buá Ɔgúná. 13Mbígélídínyénénu Lufús uyɔɔ́ bémeyíd uguá Ɔgúná na iyaá weg únyaá súsɔ́n wamɛ. 14Mbígélídínyénénu Asiŋklít, Flegɔ́ŋ, Hɛlmɛ́s, Patlobás, Hɛlmás na beliméen abánya nɔɔ́nɔb. 15Mbígélídínyénénu Filológe na Sulí, Nelé na gisɔ́nd giég. Numbígélídinye súsɔ́n Olɛmpás na bisámb gidigid ibínya nɔɔ́nɔb. 16Nubígélígélinye banuá na banuá na gɔ́lɔnɛn ŋŋuind, Bimbi biá beédébi bá Klístus gidigid bíénúbígélígélie. 17Beliméen yeénúgínyiginye, ánaá núbídédínye naá obóloneé na masalasala na biyógód áneé búnúnúŋɔ́n na nuhɔ́nhɔ́n unuɔ́ númabiá, bíyáŋúnánánɔ nɔɔ́nɔb. 18Gá giagiá, bandɔ abagányɛ bádiádúmába Klístus Ɔgúná wasɔ, gɔgaá nimuɛnd niɔ́b, na binɔ́g biɔ́b biá dugálɔ na mayɔ mɔ́b má lómbilombie, mɔ́dɔnda idɛ́m siá bísusie. 19Henyé gɔg áneé bandɔ bálinsan áneé giɔ́bína giánɔ beseé na beseé, yɔɔ́guɔ́bɔn ibal gɔg gánɔ gá busió, gɔgaá yɔɔ́núɔyɔn áneé nubá na nugedie gá muá beseé, nubá kanda biíle gá buá gilɔg. 20Uhaluá wa bumbénu ugányɛ gúnaguáŋásɛ́ɛd abɛlɛ́bɛl uguísi guánɔ guá dugɔ́nd, ánaá magɔg má Ɔgúná wasɔ Yésuse Klístus mábá naánanɔ! 21Timoté, giedinyi giámɛ giá buóli, Lusiús, Yasɔ́ŋ, Sosipatɛ́l na besíe bámɛ uguá gileénde bénúbígélígelie súsɔn. 22Yaŋuá Teltiús iyɔɔ́ŋɔnɔ́ mbɔba iyɛ uguá ɔhɛ́n huá Ɔgúná yeénúbígélígelie. 23Gayús, uŋenyi wamɛ naá wa Gimbi giá beédébi bá Klístus gidigid weénúbígélígélie. Elást ebídígínyi wa nukólókóŋ nuá tísɔna na ndiméen wasɔ Galtús bénúbígélígelie. 24Ánaá bumbénu buá Ɔgúná wasɔ Yésuse Klístus búbá naánanɔ gidigid. Anagányɛ.
Isɔ́ma
25Gá ugódionu bugaga buá núgínyiginye uguá Ginɔ́g giá Nsɔ́m igiɛ́ ndógonyeé, yɔɔ́ya ɔhɛ́n huá Yésuse Klístus, gudíye guá giséyi igímabá igíbídigán uguá yeéyuyu giandá giá ginɛŋ, gíéguendenye bɔ́. 26Dabdab gɔg gíébídíye. Gímeéŋin maán gidigid má bandɔ abádiabá bayúdɛn nulinsa uguá mubu muá bebunebúné uguá guɔyɛd guá Uhaluá wa ságásagá gá guendenye bɔ́ uguá giɔ́bína giá guágɔdɛ́m. 27Uhaluá pɛ́ŋ úgódionu nugedie na nigúmi uguá Yésuse Klístus gá nnyɔ́m na nnyɔ́m. Anagányɛ.
ទើបបានជ្រើសរើសហើយ៖
Balomɛ́ŋ 16: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
