Maliko 4
4
Mulinganyo wa mnt'hu akuhanda mbeyu
Matayo 13:1,9; Luka 8:4,8
1Yesu akandusa kaidi kuwafunza want'hu ivo akalile mnk'handa nk'handa mwa ziwa Galilaya. Want'hu wengi wakala wamzunguka hadi ikamtenda aingile na kukala mdidalu. Want'hu wose wakala mnk'handa nk'handa ya ziwa. 2Kakala akuwafunza mbuli nyingi kwa milinganyo, mmafunzo yake akawalongela.
3“Tegelezeni! Muhanda mbeyu kaita kumgunda. 4Ivo akalile akuhanda mbeyu, zimwenga zikalagalila muinzila ndege wakeza wakazidya. 5Mbeyu zimwenga zikalagalila muuluwe hant'hu habule ulongo mwingi. Na zihota hima kwa vila ulongo ukala mdodo, 6mbali zuwa ivo dilawile dikalunguza ila minoga na ila minoga ikanyala kwa vila maizi yake yakala haingilile hasi nk'hani. 7Mbeyu zimwenga zikalagalila mzimiwa na zila miwa zikakula na kuizingiliza iminoga hadi ikapotwa kweleka mbeyu yoyote. 8Mbeyu zimwenga zikalagala muulongo udamane zikamea na zikakula na kweleka. Imwe iyeleka mbeyu salasini na imwe iyeleka mbeyu sitini na zimwenga zieleka mbeyu miya.”
9Kamala Yesu akawalongela, “Mwenye kuhulika na ahulike.”
Yesu akuwalongela hangi akulonga kwa mlinganyo
Matayo 13:10,17; Luka 8:9,10
10Yesu ivo akalile adumwe wala want'hu wamuhulike hamwenga na wala kumi na waidi wakamkola na wakamuuza mana ya ila imilinganyo ailongile. 11Yesu akawalongela, “Mweye mdaha kuzimanya mbuli za Umwene wa Mulungu zifisigwe, mbali want'hu wa kunze nawalongelwe kila mbuli kwa milinganyo, 12ili walole mbali sekewaone,
wahulike mbali wasekumanya
ingi wamanyile wambidukile Mulungu
na Mulungu ingi awahalavile zambi zawe.”
Yesu akwalula mlinganyo wa mnt'hu akuhanda
Matayo 13:18,23; Luka 8:11,15
13Kamala Yesu akawauza wanahina wake, “Mweye hamuumanyile mlinganyo uno, vino mweye namuimanyeze milinganyo imwenga?” 14Mbeyu ihandigwe ni mbuli ya Mulungu. 15Want'hu wamwenga gesa mbeyu zilagalile muinzila, ao ivo wahulikile mbuli ya Mulungu mwenembago akwiza na kuisola. 16Na wamwenga ni gesa vila mbeyu ihandigwe muuluwe, ambao wakaihulika Mbuli ya Mulungu, ahoaho wakuihokela kwa kuden'khelela, 17mbali wakuitogola nt'hume ya Mulungu kwa chipindi chidodo kwavila ni gesa mimela ibule maizi na wakahenyeka na kugazwa kwa mbuli ya Mulungu ahoaho wakuileka mbuli ya Mulungu. 18Na want'hu wamwenga gesa vila mbeyu zihandigwe mzimiwa. Wano nio wahulikile mbuli ya Mulungu, 19mbali sank'hano za muisi ino, kumelela mate utajili na kumelela mate vint'hu vimwenga vingi. Mbuli izo zikuizonga mbuli ya Mulungu na want'hu ao nawawe hawakuitendela kazi mbuli ya Mulungu. 20Mbali wamwenga ni gesa mbeyu ihandigwe mulongo udamane. Want'hu ao ndo wala wakuihulika mbuli ya Mulungu na kuietendela kazi, imwe iyeleka selasini na imwenga iyeleka sitini imwenga iyeleka mia.
Kimuli kigubikigwe
Luka 8:16,18
21Yesu akagendelela kulonga, “Vino kuna mnt'hu akuwasha kimuliko na kukigubika na debe egu kukiiika kudivungu? Vino hakikuwashigwa na kuikwa mchanya hant'hu ha kuikilwa chimuli? 22Ivoivo kin'thu chochote kifisigwe nachivumbulwe na kint'hu chochote kigubikwe nachigubulwe.” 23Mwenye kuhulika naahulike. 24Kamala Yesu akawalongela, “Tegelezeni goya kino huwalongeleni. Vilavila ivo uilavile kuihulika mbuli iyo, ndo Mulungu naakutende umanye nk'hani.” 25“Ila mnt'hu akutegeleza mbuli ya Mulungu na kuimanya, Mulungu naamtaze na naamtende aimanye nk'hani. Mnt'hu ila hakutegeleza mbuli ya Mulungu, hata ila mbuli ndodo ya Mulungu aimanyile naaohokigwe.”
Mlinganyo wa mbeyu ikuhota
26Yesu akagendelela kulonga, “Umwene wa Mulungu ni gesa vino. Mnt'hu imwe akumwaga mbeyu mumgunda, 27yeye akugona ichilo na namsanya akuwa ameso kuno mbeyu zikuhota na kukula bila yeye kumanya yatendeke. 28Ikala ivo kwavila ulongo wenyewe ukutenda ummea kukula na kweleka. Mmea ukuandusa kulava mazani mateke kamala ukulava maiso na kukomeleza kuwa na uhemba mna maiso. 29Ivo uhemba ukakangala mnt'hu iyo akuandusa kukant'ha kwa mufu ukunjigwe kwa vila chipindi cha mulao chifika.”
Mlinganyo wa mbeyu ya haladali
Matayo 13:31,32,34; Luka 13:18,19
30Yesu akawauza, “Vino Umwene wa Mulungu, chiulinganize na chibwani?” Vino chiwalongele kwa “Mlinganyo ulihi? 31Umwene wa Mulungu, ukulingana na mbeyu ya haladali indodo kuhuma mbeyu zose zikuhandigwa muisi. 32Mbali ikahandwa ikuhota na kuwa mti mkulu kuhuma miti yose ya mumgunda. Na matambi yake yakuwa makulu hadi ndege wakuzenga mvulu umo.”
33Yesu akawalongela nt'hume yake kwa milinganyo imwenga mingi gesa iyo, kakala akulonga nao gesa vila wadahile kumanya Mbuli ya Mulungu. 34Yesu halongile nao kint'hu chochote bila ya milinganyo, mbali ivo akalile na wanahina wake muhala, akawaalulila kila kint'hu.
Yesu akuibwakila nk'humbi
Matayo 8:23,27; Luka 8:22,25
35Siku ilaila dihungile, Yesu akawalongela wanahina wake, “Chivuke mwambo wa ziwa.” 36Wakauleka uyama wa want'hu ukalile hala na kwita kudidalu akalile Yesu. Wanahina wakaandusa nt'hambo ya kwita mwambo wakawa hamwenga na Yesu mdidalu. Vilavila na want'hu wamwenga wakawakola wakawa mmadalu yamwenga. 37Aho Ikalawila nk'humbi nk'hulu ikaandusa kuvuma na mawimbi ya mazi yakaditowa dila dalu akalile Yesu hadi dikaandusa kumema mazi. 38Yesu kakala kunyuma kuingalawa kagona. Ivoelo, wanahina wake wakamwinula na kumulongela, “Mfunza, vino haukuihulika vihile kuona chikudidimila!”
39Yesu akenuka na akaibwakila ila nk'humbi na akayalongela mawimbi ya mazi yaziziwale. Ahoaho beho dikanyamala na kukawa ziziwa.
40Kamala Yesu akawauza wanahina wake, “Hangi mkuogoha? Vino mnk'hali mbule utogozi?”
41Na ao wakaogoha nk'hani na kuiuza, “Vino ino niyani hadi beho da mumto dikumuhulika akalonga?”
ទើបបានជ្រើសរើសហើយ៖
Maliko 4: DBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Dowe @The Word for The World International and Dowe Language translation. All rights reserved.