Luke 13
13
Sɔnyɔŋ Dibɨne Abazi
1Ku ŋkpɔ su ukem ini omu, enwi edi ebɨne Jisɔs edizughu enɔ onyi ku Pilate ɔgɔnɔ usi yak ewod ndizuk enwi Galilee. Ima ukiɔ izighi egewod enwi onu kini omu emu egene uwah, ene ubra emu ɔfiɔ ɔdɔŋɔ ku ima ubra una omu emu egede ene uwah.
2Jisɔs ɔbrɔ emu, “Evu egre ku onu enwi onu ekpaŋa utɔ uliɔghɔ-uliɔghɔ mkpa onu, egenu ata akpatre ima omu ene-udiɔk-kpɔ eke ovid enwi ku uduŋ Galilee?
3Eezɔŋ, eenu ntak onu-onu. Ndɔghɔ evu ŋgu, onogu evu numigɨbare ogid ku udiɔk-kpɔ evu, ovid evu ezug edikpaŋa su emu.
4Egre ebaŋa enwi evu-mite omu ɔnyɔŋ-uvɔk ɔgɔdughɔ ɔtɔ emu owod ku uduŋ Siloam, eenu emu egenu ata akpatre ima omu ene udiɔk-kpɔ eke enwi ima ogu omu egeduŋ ku uduŋ Jeruzelem.
5Eezɔŋ, eenu ntak ogonu ono. Ndɔghɔ evu ŋgu, onogu evu numa egɨbare ogid ku ovid udiɔk-kpɔ evu, ovid evu ezughu edikpaŋa su emu.”
Ukeh Ogii Etuh Fig
6Ene Jisɔs otu ukeh omu ɔnɔ emu, “Onji onwi gi omu ogonji etuh fig omu onyi ɔgɔtɔh ku ukɔ nlilɨba kpɔ izighi. Okonu kini omu anasu etu onu onji ile, onyi Agase nu ŋgim sugi oyiri ku ɔnyɔŋ nzighi, onu onyi eegid ŋgim sugi-ou.
7Ene onyi ɔdɔghɔ okpɨme-ukɔ nlilɨba-kpɔ izighi ogu, ‘Kpaŋ-utɔŋ-ou, ku izughe-ite omu ntei ndi momu kubɔk-kubɔk ndinluŋɔ ŋgim ku etuh fig omu, onu oŋgid sugi-ou. Ene, kpɨghe onyi zighi! Ufɔ ebak onyi idisɔ ila ibagha izɔŋ-ou.’
8Okpɨme-ukɔ ɔbrɔ onyi ogu, ‘Eti, mbɔk sa onyi yak ozuk ala izughe omu edifei iluk omu ise. Kuma nti izɔŋ ŋgan onyi ŋguk, nnɔŋ ndɔŋ ulie nnɔ onyi, nu onyi ma ede onyi onji ile.
9Onogu onyi onji ile, ozuk ɔfɔfɔ. Onu onogu onyi nume esuk enji ile ku izughe omu edifei iluk omu, omi ma mkpeghe onyi nzighi.’”
Jisɔs Ɔkɔk Enwa Ukwai Ku Use Sabbath
10Ku use Sabbath ki, Jisɔs egekpiek enwi kpɔ ku synagogue ki nonu.
11Onji enwa gi omu udiɔk spirit egene onyi onu ukwai ku izughe evu-mite, omu egene onyi ɔnuŋ-ɔnuŋ azaŋa, eenɔŋ eekɨme idineŋe ila nnen-nnen-ou.
12Onu kini omu Jisɔs ogid enwa-m, onyi okuh onyi ɔwuɔ odi obine onyi ɔnɔŋ ɔdɔghɔ onyi ogu, “Mma, etra vi eyak ku ulɔŋɔ ovu.”
13Jisɔs odu onyi ubɔk ku adai, ndien ku ulu-ulu onu, onyi eneŋe azaŋa, ɔnɔŋ ɔtɔŋɔ idinɔ Abazi ekɔ ma itro ku ntak omu egɔk onyi.
14Onu agrigra synagogue egeje ogid sia Jisɔs ɔgɔk onwi ulɔŋɔ ku use Sabbath. Nonu ku onyi ɔdɔghɔ otu-enwi nu-onu ogu, “Use itɨŋɔgi abak omu anasu enwi edene uto. Ku ima use onu, evu edi, edibɔghɔ ɔkɔk-ikɔk, eejei evu idibɔghɔ ɔkɔk-ikɔk ku use Sabbath-ou.”
15Onu Jisɔs ɔbrɔ onyi ogu, “Ovu onwi mbubuk! Onu ovu etei eneuto ku use Sabbath kini omu etei etra anaŋ ovu, ononu anaŋ ubei-onwi nonu anaŋ mbio ozighi ku uvɔk ntak kpɔ, ede emu aga egewɔŋ mmɔŋ ku use Sabbath-ou.
16Ulagham, ese enwa omu ise omu onu oyo ubon onu Abraham, omu Satan ɔgɔnuŋ onyi adai ku izughe evu-mite. Onuŋ onu udiɔk-kpɔ omi iditra onyi iyak ku use Sabbath?”
17Onu kini Onyi ozughu ima kpɔ omu, ibrɔ izighi ene ekpeŋ onji ovid-evid ima ezughe izighi; onu otu enwi eni ogid ebaŋa ima utɨbe kpɔ omu onyi egene.
Ukeh Ukip Ntiyuŋ
18Ene Jisɔs ɔdɔghɔ emu, “Ma ŋwuɔ evu udɨme-kpɔ sughu uduŋ Abazi ala.
19Onyi alasu ntiyuŋ omu onwi ɔtɔ ku ukɔ nlilɨba-kpɔ izighi. Ntiyuŋ omu ebek ɔnɔŋ eliek okpɨno etu, ndien ima unuŋɔ ɔnyɔŋ edifuɔ evɔk emu ku ŋgɔk izighi.”
Ukeh Ekpɔtɔd
(Mattiu 13:33)
20Onyi ɔnɔŋ ɔsɔ ɔdɔghɔ, “Ma nnɔŋnsɔ ŋwuɔ evu onuŋ udime-kpɔ sughu uduŋ Abazi ala.
21Onyi alasu ekpɔtɔd omu enwa ebei abuwak ku otu awak-iwak ndo-uyo ayak onyi ejime tutu ovid-evid emu etɔd.”
Avighivagha Odighi
(Mattiu 7:13,14)
22Sughu Jisɔs ozug aganji azaŋa ma mbed izighi ega uduŋ Jeruzelem, onyi efei ku ima nzighi-nzighi uduŋ ekpiek emu kpɔ abaŋa ugra Abazi.
23Onwi gi ku otu ima uduŋ onu obid onyi, “Ɔfɔŋ, Abazi odinyiaŋa ibad-ibad enwi izighi ku nzinzi nzɨbo?” Jisɔs ɔbrɔ ovid emu nonu ogu,
24“Edime ovid ukime evu idiluk ku Uduŋ Ufɔŋ Abazi omu alasu avighivagha inue-nniŋe-edighi uvɔk. Nne evu evag ku awak-iwak enwi meluŋɔ idiluk, onu emu edikɨme idiluk-ou.
25Sia kini onji-uvɔk alagha-ala oyid odighi, ini ma egre ayak onwi idisɔ iluk. Evu needisɔ ila ku eziŋi idituak odighi elagha ekpe-ubɔk ogu, ‘Ɔfɔŋ, mbɔk kwuŋɔ odighi nɔ enyin!’ Onyi ma ɔbrɔ evu, ‘Ami amvak evu-ou, evu su esi konuŋ?’
26Use-n, evu ma etɔŋɔ ididɔghɔ, ‘Ovu avak enyin sia igitei ilie inɔŋ inwɔŋ ma ovu, ovu ɔnɔŋ etei ekpiek enyin kpɔ ku ima ekedighi uduŋ enyin.’
27Onu onyi ma ɔdɔghɔ evu, ‘Eniŋenji amvak evu-ou, ɔnɔŋ amvak kpughu esi-ou. Eliaŋa eyak mi, evu ima enne ndiɔk-kpɔ.’
28Ku ini omu evu edigid Abraham, ma Aizik ma Jacob ma ovid ima prɔved Abazi sughu ebak ku Uduŋ Ufɔŋ Abazi, Nonu, evu edibak ku esi ma nta-edi, ku uliɔghɔ ma uje-ogid sia gu ewɔu evu ezighi ku Uduŋ Ufɔŋ Abazi.
29Ima enwi omu numa esi Jew ma ima omu esi ku ovid ikpighe oduobod medi lie nlie Uduŋ Ufɔŋ Abazi.
30Ku akpan-ikwɔ, ima omu enwi numa ede okpe-kpe mvin-em, menu ima ŋkpo-ŋke kini-en; onu ima omu enu ŋkpo-ŋke mvin-em, edisɔ inu ata uzughɔre kini-en.”
Jisɔs Ɔvughɔ Abaŋa Jeruzelem
(Mattiu 23:37-39)
31Ku ata ubi onu, ndizuk ima Farisi edizim nedɔghɔ Jisɔs, “Igab idɔghɔ vi yak alagha ɔwuɔ momu, ku Herɔd agrigra mmɔgɔluŋɔ idiwuh vi.”
32Onu Jisɔs ɔdɔghɔ emu ogu, “Egezughu enɔ Herɔd onu onji ŋgra su aba-ukɔ-on, kumɔ mbɨne ndiɔk spirit nzuŋɔ enwi ku ile nlagha ŋkɔk enwi ulɔŋɔ ku uyo ntiti ini, edibuk-ɔbuk ŋgo-ou ma ŋgre uto omi.
33Sughu oditɨbe-tɨbe, Abazi ɔluŋɔ mi nlagha izaŋ nzɨm Jeruzelem kuyo ini. Ku iditam izughu, enu nnen-nen idiwuh prɔved su omi ku ufine sugi numa enu ku Jeruzelem.
34Ou, sese sughu mfughɔ nnɔ evu enwi Jeruzelem! Ovid-evid ini evu esuk ewuh ima prɔved! Evu eto enwi omu Abazi ɔdɔŋ ɔnɔ evu ku ntɨghe ewod. Ku awak-iwak ini, nluŋɔ idikpɨme evu, kpa sughu eke-unni ataŋ eyo izighi ɔdɔŋ ku idak mba. Onu evu iyak mi nne-ou!
35Ene, ekpaŋ-utɔŋ ku su oditɨbe; Abazi ma okɨn evu ma uduŋ evu. Onu tutu-amama, evu idisɔ igid mi-ou tutu evu esughu ku inue evu egu, ‘Ɔfɔfɔ ɔnɔ onyi omu odi ku enyiŋ Abazi.’”
ទើបបានជ្រើសរើសហើយ៖
Luke 13: ORX
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oro Bible by Beyond Translation is licensed under Creative Commons Attribution-ShareAlike 4.0 License.
