யாத்திராகமம் 35

சபத் ஓய்வுநாளின் விதிமுறைகள்

1பின்பு மோசே முழு இஸ்ரயேல் சமூகத்தையும் ஒன்றுகூடி வரச் செய்து அவர்களிடம், “நீங்கள் செய்யவேண்டுமென்று கர்த்தர் கட்டளையிட்டவை இவைகளே: 2நீங்கள் வாரத்தில் ஆறு நாட்களுக்கு வேலை செய்யவேண்டும். ஆனால் ஏழாம் நாளோ கர்த்தருக்கான உங்களுடைய பரிசுத்த சபத் ஓய்வுநாள். அந்தநாளிலே வேலை செய்பவன் எவனும் கொலை செய்யப்படுவான். 3சபத் ஓய்வுநாளில் உங்கள் குடியிருப்புகள் எதிலும் நெருப்பு மூட்டக் கூடாது” என்றார்.

இறைபிரசன்னக் கூடாரத்துக்கான பொருட்கள்

4மோசே முழு இஸ்ரயேல் சமூகத்திடமும், “கர்த்தர் கட்டளையிட்டிருப்பது இதுவே: 5உங்களிடம் இருப்பதிலிருந்து கர்த்தருக்கென ஒரு காணிக்கையை எடுங்கள். கர்த்தருக்குக் காணிக்கை கொண்டுவர விரும்பும் ஒவ்வொருவனும் கொண்டுவர வேண்டியவைகளாவன:

“தங்கம், வெள்ளி, வெண்கலம்,

6நீலம், ஊதா, கருஞ்சிவப்பு நூல்; மென்பட்டுத் துணி,

வெள்ளாட்டு உரோமம்,

7சிவப்புச் சாயம் தோய்ந்த செம்மறியாட்டுக்கடாவின் தோல், கடற்பசுவின் தோல்#35:7 கடற்பசுவின் தோல் – பெரிய நீர்வாழ் பாலூட்டிகளாக இருக்கலாம்,

சித்தீம் மரம்,

8விளக்கிற்கான ஒலிவ எண்ணெய்,

அபிஷேக எண்ணெய்க்கும், நறுமணதூளுக்குமான நறுமணப் பொருட்கள்;

9ஏபோத்திலும், மார்பணியிலும் பதிப்பதற்கான கோமேதகக் கற்கள்; மற்றும் இரத்தினக் கற்கள் ஆகியவையே.

10“உங்களில் தொழிற் திறமையுள்ள எல்லோரும் வந்து, கர்த்தர் கட்டளையிட்ட வேலைகளையெல்லாம் செய்யவேண்டும்.

11“அவையாவன: இறைபிரசன்னக் கூடாரமும் அதற்குரிய மூடுதிரையும், கொழுக்கிகளும், மரச்சட்டங்களும், குறுக்குச் சட்டங்களும், தூண்களுடன் அதன் அடித்தளங்களும்,

12அத்துடன் சாட்சிப் பெட்டி, அதற்குரிய தடிகள், கிருபாசனம், சாட்சிப் பெட்டியை மறைக்கும் திரை,

13மேசை, அதற்குரிய தடிகள், மேசைக்குரிய பாத்திரங்கள், இறைபிரசன்ன அப்பம்,

14வெளிச்சத்துக்கான குத்துவிளக்கு, அதற்குரிய உபகரணங்கள், விளக்குகள், விளக்குக்கான எண்ணெய்,

15தூபபீடம், அதற்குரிய தடிகள், அபிஷேக எண்ணெய், நறுமணத்தூள்;

இறைபிரசன்னக் கூடார வாசலின் நுழை வாயிலிலுள்ள திரைச்சீலை,

16தகனபலிபீடம், அதற்குரிய வெண்கலச் சல்லடை, அதற்குரிய தடிகள், அதற்குரிய அனைத்து பாத்திரங்கள்,

வெண்கலத் தொட்டி, அதற்குரிய அடித்தளம்,

17முற்றத்துக்கான திரைகள், அதற்குரிய தூண்கள், அடித்தளங்கள், முற்ற வாசலுக்கான திரைகள்,

18இறைபிரசன்னக் கூடாரத்துக்கும் முற்றத்துக்கும் வேண்டிய கூடார ஆப்புகள், அதற்குரிய கயிறுகள்,

19பரிசுத்த இடத்தில் மதகுருக்களாகப் பணிசெய்ய மதகுரு ஆரோனுக்கும், அவனுடைய மகன்மாருக்கும் வேண்டிய நெய்யப்பட்ட ஆடைகளான பரிசுத்த ஆடைகள் ஆகியனவாகும்.”

20அதன் பின்னர் முழு இஸ்ரயேல் சமூகமும் மோசேயின் முன்னாலிருந்து விலகியது. 21அவர்களில் மனவிருப்பமுள்ளவர்களும், இருதயத்தில் ஏவப்பட்டவர்களும், இறைபிரசன்னக் கூடார வேலைக்கும் அதன் எல்லாப் பணிகளுக்கும், பரிசுத்த ஆடைகளுக்கும்#35:21 பரிசுத்த ஆடைகளுக்கும் – மதகுருக்களின் ஆடைகள் வேண்டிய காணிக்கைகளை கர்த்தருக்குக் கொண்டுவந்தார்கள். 22மனவிருப்பமுள்ள அனைத்து ஆண்களும் பெண்களும் உடையலங்கார ஊசிகள், காதணிகள், மோதிரங்கள், மார்புப் பதக்கங்கள் முதலிய எல்லாவித தங்க நகைகளையும் கொண்டுவந்தார்கள். அவர்கள் எல்லோரும் தங்கத்தை கர்த்தருக்கு அசைவாட்டும்பலியாகச் செலுத்தினார்கள். 23அத்துடன் ஒவ்வொருவரும் தங்களிடமிருந்த நீல நூல், ஊதா நூல், கருஞ்சிவப்பு நூல், மென்பட்டு துணி, வெள்ளாட்டு உரோமம், சிவப்பு சாயம் தோய்க்கப்பட்ட ஆட்டுக்கடாத் தோல், கடற்பசுத் தோல் ஆகியவற்றையும் கொண்டுவந்தார்கள். 24வெள்ளியையும், வெண்கலத்தையும் காணிக்கையாகக் கொடுக்க விரும்பியவர்கள் அதைக் கர்த்தருக்குக் காணிக்கையாகக் கொண்டுவந்தார்கள். வேலைகளுக்குப் பயன்படக்கூடிய சித்தீம் மரங்களை வைத்திருந்தவர்களும் அதைக் கொண்டுவந்தார்கள். 25ஆற்றலுள்ள பெண்கள் தங்கள் கைகளினால் நீலம், ஊதா, கருஞ்சிவப்பு நூல்களையும், மென்பட்டு துணிகளையும் திரித்துக் கொண்டுவந்தார்கள். 26மனவிருப்பமும் ஆற்றலுமுள்ள எல்லாப் பெண்களும் வெள்ளாட்டு உரோமத்தைத் திரித்தார்கள். 27மக்களின் தலைவர்கள் ஏபோத்துக்கும், மார்பணிக்கும் பதிப்பதற்கான கோமேதகக் கற்களையும், இரத்தினக் கற்களையும் கொண்டுவந்தார்கள். 28அவர்கள் விளக்குக்கும், அபிஷேக எண்ணெய்க்கும், நறுமணத்தூளுக்கும் தேவையான ஒலிவ எண்ணெயையும், நறுமணப் பொருட்களையும் கொண்டுவந்தார்கள். 29இஸ்ரயேலில் இருந்த மனவிருப்பமுள்ள அனைத்து ஆண்களும் பெண்களும், கர்த்தர் மோசே மூலமாக செய்யும்படி கட்டளையிட்ட எல்லாவிதமான வேலைகளுக்காகவும் கர்த்தருக்கு சுயவிருப்பக் காணிக்கைகளை கொண்டுவந்தார்கள்.

பெசலெயேலும், அகோலியாவும்

30பின்பு மோசே இஸ்ரயேல் மக்களிடம் சொன்னதாவது: “பாருங்கள், கர்த்தர் யூதா கோத்திரத்தைச் சேர்ந்த ஊர் என்பவனுடைய பேரனும் ஊரியின் மகனுமான பெசலெயேலைத் தெரிவுசெய்திருக்கின்றார். 31அவர் அவனை இறைவனுடைய ஆவியானவரால் நிரப்பி, எல்லாவித வேலைகளையும் செய்யக்கூடிய வினைத்திறனையும், ஆற்றலையும், அறிவையும் கொடுத்திருக்கிறார். 32தங்கத்திலும், வெள்ளியிலும், வெண்கலத்திலும் சித்திர வேலைப்பாடுகளைச் செய்வதற்கும், 33இரத்தினக் கற்களை வெட்டவும், அவற்றைப் பதிக்கவும், மரத்தைச் செதுக்கி சித்திர வேலைப்பாடுள்ள கைவினைப் பொருட்களைச் செய்வதற்கும் ஆற்றலைக் கொடுத்திருக்கிறார். 34கர்த்தர் அவனுக்கும் தாண் கோத்திரத்து அகிசாமாக்கின் மகன் அகோலியாவுக்கும் மற்றவர்களுக்குக் கற்பிக்கும் ஆற்றலைக் கொடுத்தார். 35அவர்களுடைய கைவினைஞர்களும் வடிவமைப்பாளர்களும், நீலம், ஊதா, கருஞ்சிவப்பு, மென்பட்டு ஆகியவற்றைக்கொண்டு பூத் தையல் வேலைகளைச் செய்யக்கூடியவர்களாகவும், நெசவாளர்களாகவும் ஆகும்படி அவர்களை ஆற்றலினால் நிரப்பினார். அவர்கள் தலைசிறந்த கைவினைஞர்களும், வடிவமைப்பாளர்களுமாய் இருந்தார்கள்.

ទើបបានជ្រើសរើសហើយ៖

யாத்திராகமம் 35: TRV

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

பரிசுத்த வேதாகமம், இலகு தமிழ் மொழிபெயர்ப்பு™

நிறுவனத்தின் அனுமதி பெறப்பட்டு பயன்படுத்தப்பட்டுள்ளது

உலகளாவிய ரீதியில் முழு பதிப்புரிமையும் இந்த நிறுவனத்திற்கே உரியது.

Holy Bible, Tamil Readerʼs Version™

ស្វែងយល់បន្ថែមទៀតអំពី இலகு தமிழ் மொழிபெயர்ப்பு