Baroma 13

Ekuíra kwa bakulu-kulu bàtechire

1Chira mundu ěmire kunde áira kwa bakulu-kulu ba bèmire bàtechire. Bushi Ongo yeine iwénde wáira emundu kuba mukulu-kulu. Ne'bakulu-kulu ba bèmire, Ongo iwêmikaa'bo. 2Bushi no'ku, ola wálwisa ebakulu-kulu, eri álwisa emuomba* wa Ongo. Ne'bandu ba bánana kuira kwa bakulu-kulu bàtechire, baményaa kwa báchikululira ebuchinjibusi beine. 3Mango mundu áira emabuya, àtangobaa ebakulu-kulu. Si emundu àngôbaa ebakulu-kulu, mango áira emabi. Utáhonda kunde wôbaa ebakulu-kulu? Rero, úndaa wáira emabuya, chasiya bénde bákutonga. 4Ebakulu-kulu batúla bakosi ba Ongo kwa kuasa ebandu bénde báira emabuya. Si akaba ùngaira emabi, kuika unôbae bushi bète ebuashi bwe'kukuchinjibusa. Bénde bákorera Ongo kwa kulosa ebute bwai kwa bakosi be'mabi. 5Bushi no'ku, byěmire múnde mwáira kwa bakulu-kulu bàtechire. Atá bushi ne'kwôbaa ebute bwa Ongo oshâo, si kanji bushi mwa michima yetu bitwěmire kunde twáira bacha.

6Kanji echera chi chénde chátuma mwáfuta embarata. Bushi abu bénde bákola oyu mulimo, Ongo i'bénde bákorera. 7Mundaa mwêresa chira mundu bya ěmire kwêresibwa: emufuchisi we'mbarata, embarata; emufuchisi we'mukoro, emukoro; ola wěmire kwêresibwa etunda, etunda; ola wěmire kutongibwa, àtongibwaa.

Ekusimana

8Muténdaa mwáata mwinda wa chiro na mundu asibya. Si mwinda muuma i'mwěmire kuata oshâo, kuli ekusimana. Bushi ola ùsimire mulikabo, eri áira kwa Mwaso* woshi atúla àtechire. 9Bushi ene miomba* ìtula ìtechire mbu: «Uténdaa wábanda ekiri, uténdaa wêta, uténdaa wêba, uténdaa wáhumira ebyabene.»#13:9 Somaa Kutenga 20:13-17; Bukengere 5:17-19, 21. Ei miomba* ala'uma ne'inji yoshi, ifunjíkirwe mwo'no muomba* muuma ola ùtechire mbu: «Úndaa wásima mulikenyu ngo'kwa utúla ùchisimire weine.»#13:9 Somaa Balawi 19:18. 10Emundu ola ùsimire mulikabo, àtangamukorera mabi. Bushi no'ku, ola wète nzii eri áira kwa Mwaso* woshi atúla àtechire.

Ekuchikunganya kwa kufuluka kwa Kirisito

11Mwìshi esuku sa twera tuli'mo. Ebihangi byenyu bye'kutenga mwa tulo byaíkire. Bushi elusuku lwa Ongo angátununula lwera lùli ofu, kurenza ngo'kwa byábaa bìri mango twêmereraa. 12Ebutufu bwáhonda kucha, ne'mushi àli ofu. Rero, tukábuliraa bure emyasi era yénde yáirwa mwa musimya, twánatola ebikaya bye'kulwa nabi mwa bulangare. 13Túndaa twáata myanya ibuya era yěmire kuiribwa mwa bihangi bye'mushi. Túndaa twáchilanga ne'kulya kwa kurengerese ne'butamisi, ne'buhungu ne'lusingi, ne'mbangano ne'mufula. 14Mubáa nga Enawetu Yesu Kirisito, muténdaa mwáchemerera kukululwa ne'mianyisa yenyu ibi, kuikira echihangi yábeka mwa bibi.

ទើបបានជ្រើសរើសហើយ៖

Baroma 13: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya