Baroma 12

Ekuchana kwa kukorera Ongo

1Rero banyaketu, bushi ne'bonjo bwa Ongo átulosise, náběma mundaa mwâna emibiri yenyu kuba mitulo* era ìri iuma-uma, ibuya-buya, kanji era imúsimise. Eyera i'njira ye'kanangana ye'kumwera. 2Muténdaa mwákulikira emyanya ye'bandu be'sine suku. Si murékaa Ongo abábindule mwa kuhuba kuira ebwenge bwenyu kuba buyayaya. Mwa bacha, mungáala kunde mwámenyerera bya Ongo áhonda: bya bìri bibuya, bya bimúsimise, ne'bya bìlumirire.

3Bushi ne'ngahanyi sa Ongo ányeresise, bacha ku nábabura muboshi: Kùtabaa mundu ola úndaa wáchitola nga iwète mufa kurenza kwa àli. Si mundaa mwáchitola ngo'kwa munáli, chira mundu kukulikana ne'chipimo che'bwemeresi bwa Ongo ámweresise. 4Emubiri atúla muuma, si atúsa bitera binene. Na chira chitera, chinátusa wai mulimo. 5Netu kutunali bacha. Chiro mbu tùli banene, si tunáli mubiri muuma kurengera ebuuma bwetu na Kirisito*. Tuboshi tùli mwa buuma nga bitera bya mubiri muuma. 6Ongo, mwa bubuya bwai, átweresise nyêmbo sa sìrenganyire. Rero, ola wêresibwe elwêmbo lwe'kureba, éndaa áreba kukulikana ne'bwemeresi bwai. 7Ola wêresibwe elwêmbo lwe'kuba mukosi, éndaa ákola. Ola wêresibwe elwêmbo lwe'kukangirisa, éndaa ákangirisa. 8Ola wêresibwe elwêmbo lwe'kusesa ebanji emuchima, éndaa ábasesa'o. Ola wêresibwe elwêmbo lwe'kwâna, éndaa âna na muchima muuma. Ola wèmangirire ebanji, éndaa êmangira'bo na bushiru. No'la wêresibwe elwêmbo lwe'kuasa ba bàlaire, éndaa áasa'bo na lumoo.

9Enzii yenyu indaa yánaba ya kanangana. Mundaa mwáaya emabi, si mundaa mwásimika mwa mabuya. 10Mundaa mwásimana busese nga bauma, na kunde mwáata bushiru mwa kwêresanya etunda. 11Mùtabaa ngalisi, si mundaa mwákorera Enawetu na bushiru kanji na muchima muuma. 12Mundaa mwámowa bushi ne'munyiiro ola mutúsa. Mundaa mwáata ebushibirisi mwa malibuko, na kunde mwéma busira kutama. 13Mundaa mwáasa ebandu ba Ongo mwa malae mabo, na kunde mwáhuukasa baenyi.

14Mundaa mwáhanyira ba bénde bábalibusa. Mundaa mwáhanyira'bo, si muténdaa mwábatakira. 15Mundaa mwámowa na ba bámowa. Mundaa mwálira na ba bálira. 16Mundaa mwômvikana mwa kachi-kachi kenyu. Muténdaa mwáata mianyisa ya kuchěrusa, si mundaa mwákomerana ne'barembu. Muténdaa mwáchitola nga ba bète bwenge bunene.

17Muténdaa mwáfulusisa emundu emabi kwa manji. Mundaa mwáira bya bandu boshi baséne kwa bikomire. 18Akaba bìngaalikana, kukulikana ne'buashi bwenyu, mundaa mwába mwa bôlo ne'bandu boshi. 19Banyaketu basiirwa, muténdaa mwáchifuna. Si mundaa mwárekera Ongo echihangi che'kubafúna kukulikana ne'bute bwai. Bushi byǎnjikirwe mwa Maanjiko Mabuya-buya mbu: «Nyono, nyi nyikáfuna ebandu na kwêmba chira mundu kukulikana na bya áiraa.»#12:19 Somaa Bukengere 32:35. 20Si kanji byǎnjikirwe mbu: «Akaba emurenda wao áfa businya, umwêresaa ebiryo. Na akaba áfa châmi, umwêresaa ebye'kumwa. Ekuíra bacha, kuli ngo'kwa bàngamubika engala-kala sa sákorera busese kwe'twe.»#12:20 Somaa Mianyi 25:21-22. 21Uténdaa wêmerera kuimwa ne'mabi, si úndaa wáima'mo mwa kuira emabuya.

ទើបបានជ្រើសរើសហើយ៖

Baroma 12: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya