Lukas 14
14
Ya pagpaguliꞌ ni Jisus sa utaw na nyabagaꞌ ya lawas
1Na, sambuk na Allaw na Paglagdeng, pigpilit si Jisus na kuman adti balay na sambuk na magdadumala͡ay sa manga Parisiyo. Aw sa talana nilan kyuman, to-o nilan pyakatanawan si Jisus kun unu ya un nan imo-un. 2Aw dun ni kanilan ya sambuk na utaw na nyangkabagaꞌ ya kadakulaꞌ na lawas nan. 3Aw nyusip si Jisus sa manga Parisiyo aw manga magpalna-uway sa Uldin na manga Judiyu, law nan, “Unu, pigtumbay na Uldin tadun ya pagguliꞌ sa utaw dun ni Allaw na Paglagdeng?” 4Manang walaꞌ silan tubag. Yanagaw pig-awidan ni Jisus ya utaw aw dayaw nan guli-a, aw pigpapanaw nan. 5Aw miglong si Jisus kanilan, “Kun awun iseꞌ mayu aw pangkay baka na nyolug adti malalem na gawang na pagludukan sa tubig, unu ya imo-un mayu? Maksay mayu saba kamangen pangkay Allaw na Paglagdeng.” 6Manang walaꞌ silan pakatubag kanan.
Ya palna-u ni Jisus na magpadalem
7Na, kyinitaꞌ ni Jisus ya manga pyampamilit dun ni balay na Parisiyo na nyamalliꞌ silan sa ingkudanan na dengganen na un nilan ingkudan. Yanagaw pigpalna-uwan nan silan, law nan, 8“Kun piliten kaw dun ni pista na kasal, diliꞌ kaw maksay mag-ingkud adti pagpa-ingkudan sa manga dengganen pagaw awun utaw na dumateng na pigpilit uman na matas pa ya dengeg nan kanmu. 9Aw ya utaw na nyamilit kamayu maglong baling kanmu, ‘Pag-alin kaw beg, kay ini la ya utaw na un mingkud asini.’ Yanagaw mamulamula kaw baling aw adtu la kaw sa kanmu ingkud apit adti moli. 10Manang kun piliten kaw, pamalli-a ya pag-ingkudan na manga utaw na diliꞌ dengganen. Yanagaw kun dumateng ya nyamilit aw maglong kanmu, ‘Na, kay Lew, adi kaw ingkud ni pagpa-ingkudan sa manga dengganen,’ magi dun sayaꞌ kaw adti asdangan na kadég na pigpamilit. 11Kay pangkay singalan ya magpatastas, un saba sakanan padalemen. Aw ya utaw na magpadalem, un sakanan patasen.” 12Pagkatigkas yan, miglong si Jisus adti utaw na nyamilit kanan, “Kun mag-imoꞌ kaw sa dakulaꞌ na kakan, diliꞌ mu pagpamiliten ya manga ubaybay mu aw manga kaylug mu aw manga kadégan mu aw manga sumbalay mu na mayaman. Kay kun piliten mu silan, kasoli-an kaw nilan uman kagaya. 13Manang kun mag-imoꞌ kaw sa dakulaꞌ na kakan, yan baling ya madyaw mu pamiliten ya manga utaw na walaꞌ ya pagkamangan, aw ya manga kimay, aw ya manga kapig, aw manga buta. 14Aw madyaw ya kanmu, kay diliꞌ silan makasoliꞌ kanmu. Ya Tyumanem, yan saba ya magsoliꞌ kanmu dun ni allaw na panmatawun nan ya manga utaw na dyumalug sa pagkaliman nan.”
Ya pundinganan sa pista na kasal
15Aw ya sambuk na utaw na kyuman dun ni sayid ni Jisus nyakadengeg sa piglong nan, aw miglong adti kanan, “Madyaw ya kana utaw na kuman dun ni Kasakupan na Pighari-an na Tyumanem.” 16Pagkatigkas yan, miglong si Jisus adti kanan sa pundinganan: “Awun utaw na mig-imoꞌ sa dakulaꞌ na pista, aw madég to-o ya pyamilit nan. 17Aw pagdateng da na allaw na pista, pigsuguꞌ nan ya kanan sugu-anen na tawagen da ya manga pigpamilit nan, ‘Kadi la kamu, kay nyatagilan da ya kadég!’ 18Manang ya tagsambuksambuk kanilan tyumubag na diliꞌ silan makakadtu. Ya sambuk miglong, ‘Bagu aku nyakabayad sa lupaꞌ aw ka-ilangan na tanawun ku. Yanagaw pasinsiyayi aku.’ 19Aw miglong uman ya sambuk, ‘Bagu aku nyakabayad sa sampuluꞌ ya baka aw tanawun ku silan kun madyaw silan magdaru. Yanagaw pasinsiyayi aku.’ 20Aw miglong pa uman ya sambuk, ‘Bagu pa aku nyangugnan aw diliꞌ aku makakadtu.’ 21Pagkatigkas yan, nyuliꞌ ya sugu-anen adti kanan amu aw pigdandan nan ya kadég. Pagpakadengeg na amu nan, to-o sakanan nyadaman, aw miglong adti sugu-anen nan, ‘Kaksay kaw kadtu ni manga dalan aw manga agiyanan na syudad. Aw pa-agadan adi ya manga tagituꞌ na utaw aw ya manga kimay, aw ya manga buta, aw ya manga kapig.’ 22Walaꞌ kadugay, nyuliꞌ ya sugu-anen aw miglong, ‘Kay Sir, nyatuman da ya kadég na pigsuguꞌ mu kanak, manang walaꞌ pa katmuꞌ ya katipunanan.’ 23Yanagaw miglong pa uman ya amu adti kanan, ‘Kadtuwi ya manga balay na adti luwaꞌ na syudad aw manga dalan na pasinan adti buntud, aw pakadiya ya manga utaw pada matmuꞌ nilan ya kanak balay. 24Paglongun ta kamu: Walaꞌ ya pangkay sambuk na utaw na muna ku pigpamilit na makakan sa pigtagilan ku.’ ”
Ya pag-ayaw sa kadég pada dumalug kan Jisus
25Talana ni Jisus migpadeleg nyanaw pasinan adti Jérusalim, madég to-o ya utaw na nyagad kanan. Aw nyatubang sakanan aw miglong kanilan, 26“Kun awun sambuk kamayu na malim dumalug kanak, manang to-o pa nan pigginawa͡an ya kanan ama aw ina, aw ka͡ubayan aw manga mangayseꞌ nan, aw kanan manga inulug aw bubay, aw pangkay ya kanan pagka-utawun, aw kun tagbiꞌ ya pagginawa nan kanak, diliꞌ mabatug na ma-imoꞌ sakanan kanak umagakan. 27Pangkay singalan ya diliꞌ magpisan sa kanan krus aw dumalug kanak, diliꞌ mabatug na ma-imoꞌ sakanan kanak umagakan. 28Kun awun adti kamayu na malim magtulluk sa dakulaꞌ na balay, sa diliꞌ pa nan tulluk ya balay, una nan anenganengen kun sangunu ya magastu aw kun maka-umbaꞌ ya kuwalta nan sa pagpa-imoꞌ mendaꞌ na matigkas. 29Kay kun diliꞌ nan yeiy una anenganengen, pagaw mapatal oloꞌ aw mabus ya kuwalta nan aw diliꞌ matigkas. Yanagaw ikelan baling sakanan na manga utaw na kumitaꞌ, 30aw maglong silan, ‘Ya utaw yeiy kalama-lamaꞌ da migpa-imoꞌ sa balay manang diliꞌ nan mabatug tigkasen.’ 31Aw kasiling uman na hariꞌ na awun sampuluꞌ kamalalan (10,000) ya sundalu na un tumanam adti sambuk na hariꞌ. Patawag nan una ya kanan manga hénéral aw magsekat sa palna-u kun mabatug nilan degen ya hariꞌ na awun kaluwa͡an kamalalan (20,000) ya sundalu. 32Kun adti kanan anenganeng diliꞌ nan mabatug degen ya manga po-on nan, madyaw pa baling na sumuguꞌ sakanan sa manga pigsaligan nan adti kanan po-on pada magpakang silan na diliꞌ da magtanam. 33Maynan uman, kun singalan kamayu ya dumalug kanak, una͡en nan anenganengen kun mabatug nan ayawan ya kadakulaꞌ na pigginawa͡an nan asini tas na lupaꞌ. Kay kun diliꞌ nan ayawan, diliꞌ mabatug na ma-imoꞌ sakanan kanak umagakan.”
Ya asin na kyalagakan sa ka͡asin nan
34Aw miglong pa uman si Jisus sa pundinganan, law nan, “Madyaw ya asin, manang kun kalagakan sa nanam, diliꞌ da makalikuꞌ ya ka͡asin nan. 35Walaꞌ da ya ma-untung, pangkay daliꞌ pa adti malalipaꞌ na ayep pada pag-abunu. Yeiy ya du-an na salabel da. Kamu na migpakanyeg, ka-ilangan kalabetan mayu ya kamayu pigdengeg.”
ទើបបានជ្រើសរើសហើយ៖
Lukas 14: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
