Juan 19
19
1Pagkatigkas yan, pigpa-angay ni Pilato si Jisus aw palabetan nan.#19:1 Ya lalabet na manga sundalu na Romanen, awun tinggaꞌ adti tuktuk, aw madég ya pesaꞌ na mangkatalem dun ni tengaꞌ. 2Aw mig-imoꞌ silan sa korona na suksukun aw pigsangkub nilan adti ulu ni Jisus. Aw pigpasut nilan sakanan sa malawig na sa-ul na tapel ya batek kasiling na pagsutun na hariꞌ. 3Aw migsayusayu silan dyumulud kanan na maglong, “Kay Hariꞌ na manga Judiyu, magkadugay pa galu ya pag-eyaꞌ mu asini tas na lupaꞌ!” Aw syumampal uman silan kanan. 4Lyumuwaꞌ da uman si Pilato aw piglongan nan ya manga Judiyu, “Tandawi mayu, pakitaꞌ ku sakanan kamayu salut pada pa-edeꞌ na walaꞌ ya pigkitaꞌ ku na un pagsalaꞌ kanan.” 5Yanagaw lyumuwaꞌ si Jisus na awun da korona na suksukun adti ulu nan aw malawig na sa-ul na tapel ya batek. Aw miglong si Pilato kanilan, “Inunuwa mayu, ini la sakanan!” 6Sa pagkitaꞌ da na manga mangkatas na magdadugsu-ay aw manga magtatunggu-ay sa Témplo kan Jisus, nyamansag da uman silan na maglong, “Pakalabuwan sakanan! Pakalabuwan sakanan adti krus!” Aw miglong si Pilato kanilan, “Kamu la ya magbayaꞌ kanan! Kamanga mayu aw kamu la ya pagpakalabu kanan adti krus. Kay walaꞌ saba ya kyinitaꞌ ku na du-an na umbaꞌ sakanan patayen!” 7Manang miglong kanan ya manga magdadumala͡ay sa manga Judiyu, “Awun kanami Uldin, aw pigsulat dun na umbaꞌ sakanan patayen asuntu sa piglong nan na Iseꞌ kunu sakanan na Tyumanem.”
8Sa pagpakadengeg ni Pilato sa piglong nilan, to-o pa sakanan nyallek. 9Yanagaw syumeled pa sakanan adti palasyo aw pigpa-agad nan si Jisus. Aw pig-usip sakanan ni Pilato, “Taga ayin kaw?” Manang walaꞌ si Jisus tubag kanan. 10Yanagaw miglong pa si Pilato kanan, “Anangaꞌ diliꞌ aku mu pagtubagen? Unu, walaꞌ mu kaꞌ ka-ede-i na awun katundanan ku magpaluwaꞌ kanmu? Aw awun uman katundanan ku magpakalabu kanmu adti krus.” 11Tyumubag si Jisus kanan, “Walaꞌ ya katundanan mu kanak kun walaꞌ kanmu atagan ya katundanan lekat adti tas na langit. Yanagaw ya utaw na miglimanda kanak, dakulaꞌ pa ya kanan salaꞌ kay sa kanmu.”#19:11 Si Kaypas ya pigpalabet ni Jisus asini na dakulaꞌ ya salaꞌ. 12Sa pagpakadengeg ni Pilato sa piglong ni Jisus, mig-anenganeng sakanan kun unun nan ya pagpaluwaꞌ kan Jisus. Manang miglong pa uman ya manga magdadumala͡ay sa manga Judiyu, “Kun paluwa-en mu sakanan, bekeꞌ kaw na ubaybay ni César! Pangkay singalan ya magpakahariꞌ, liwan na nyatu sakanan adti kanaten impirador na si César.” 13Sa pagpakadengeg ni Pilato sa piglong nilan, pigpa-agad nan si Jisus adti luwaꞌ. Aw nyingkud si Pilato adti ingkudanan na pag-ukum dun ni pag-usayan na pigtawag na Gabata. Na, ya kakawasan na Gabata adti tingeg na Hibriyu: Balkun na Batu.
14Na, ya allaw yeiy, yan ya pagtagilan na manga utaw sa Pista na Paglabay na Anghil na Tyumanem, aw manga alas dosi la. Aw miglong si Pilato adti manga magdadumala͡ay sa manga Judiyu, “Ini la ya kamayu hariꞌ!” 15Aw to-o baling silan nyamansag na maglong, “Pakalabuwan sakanan! Pakalabuwan adti krus!” Yanagaw pig-usip silan ni Pilato, “Unu, pakalabu ku ya hariꞌ mayu?” Aw tyumubag ya manga mangkatas na magdadugsu-ay, “Walaꞌ ya eped na hariꞌ nami, oloꞌ si Impirador César!” 16Yanagaw pigtumbay ni Pilato si Jisus adti kanilan na un pakalabu adti krus.
Ya pagkalabu kan Jisus adti krus
Tigkas yan, pigdala si Jisus 17na manga sundalu na Romanen aw pigpapisan nilan sakanan sa krus. Aw lyumuwaꞌ silan lekat dun ni syudad aw syuminan adti banwa na pigngalanan adti tingeg na Hibriyu na Golgota, na ya kakawasan: Banwa na Pesaꞌ na Ulu. 18Pagdateng nilan dun, pigkalabuwan nilan si Jisus adti krus. Aw dun ni tampid nan awun duwa ya utaw na pigkalabuwan uman adti manga krus nilan, ya sambuk apit adti kalintu aw ya sambuk apit adti kawala. 19Aw migpasulat si Pilato adti tabla aw pigtapliꞌ nilan adti krus ni Jisus. Aw ini ya pigpasulat nan: “Si Jisus na taga Nazarit, ya Hariꞌ na manga Judiyu.” 20Aw madég ya nyakabasa seiy asuntu na malapit adti Jérusalim ya banwa na pigpakalabuwan kan Jisus, aw pigsulat yeiy adti tingeg na Hibriyu, aw adti tingeg na Latin, aw adti tingeg na Grigo. 21Yanagaw miglong ya manga mangkatas na magdadugsu-ay adti kan Pilato, “Bekeꞌ galu na ‘Hariꞌ na manga Judiyu’ ya pigpasulat mu! Yan galu ya pigpasulat mu ‘Ya utaw yeiy miglong na Hariꞌ kunu sakanan na manga Judiyu.’ ” 22Manang miglong si Pilato kanilan, “Ya pigpasulat ku diliꞌ da pag-umanen!”
23Pagkatigkas na manga sundalu kalabuwan si Jisus adti krus, pigkamang nilan ya manga kadégkadég nan aw pigtengaꞌ nilan na ka-upat aw alag silan pyangkatpedan. Manang ya piglapid nan adti seled, pigtani nilan kay tumalag inabelan lekat adti tas taman adti dalem aw walaꞌ ya pigté-an, aw dakulaꞌ ya alagaꞌ. 24Yanagaw migbalawbalaw silan kun unu ya madyaw imo-un sa piglapid nan, aw pigka-unawa͡an nilan, aw miglong silan, “Diliꞌ tadun késé-en. Madyaw pa na magbunutbunut kitadun kun singalan ya makatagtun sa ini.” Na, maynini ya nya-imoꞌ pada matuman ya pigpasulat na Tyumanem asini muna: “Pigtengaꞌ nilan ya kanaken manga kadégkadég, aw pigbunutbunutan nilan ya kanaken piglapid.” #19:24 Mabasa adti Salmo 22:18. Yanagaw yeiy ya pig-imoꞌ na manga sundalu.
25Na, nyinindeg malapit adti krus ni Jisus ya ina nan, aw ya kaylug na ina nan, aw si Maria na ka͡ubayan ni Kliyopas, aw dun uman si Maria na taga lunsud na Magdala. 26Aw sa pagkitaꞌ ni Jisus sa ina nan aw sa umagakan nan na pigginawa͡an na nyinindeg uman dun, piglongan ni Jisus ya ina nan, “Silinga la sakanan na iseꞌ mu.” 27Pagkatigkas yan, piglongan ni Jisus ya umagakan yan, “Silinga la sakanan na ina mu!” Aw lekat dun ni udas yan, pigpa-agad da na umagakan yeiy ya ina ni Jisus aw adtu la nan pa-eya-a ni kanan balay.
Ya pagkamatay ni Jisus
28Nya-edeꞌ si Jisus na nyalingeb da ya kadég. Aw miglong sakanan, “Pigtalaynem aku.” Aw dun ni paglong nan, nyatuman ya pigpasulat na Tyumanem asini muna.#19:28 Mabasa adti Salmo 69:21 aw 22:15. 29Na, malapit adti krus awun seledanan na nyatmuꞌ na bino na malagsing. Yanagaw mig-elem ya manga sundalu sa ispongha dun aw pigbetang nilan adti tuktuk na layiꞌ aw pigsungit nilan kan Jisus na un pasepsep kanan. 30Aw sa abus da nan kasepsep, miglong si Jisus, “Nyalingeb da ya kadég.” Aw nyatungayngay ya ulu nan kay nyabugtuꞌ da ya ginawa nan.
Ya pagdugsang na sundalu sa kilid ni Jisus
31Na, agpet da sumallep ya sega dun ni allaw na migsitagilan ya manga Judiyu sa Allaw na Paglagdeng kay ya allaw yan nyakadengan sa Pista. Aw ya manga magdadumala͡ay sa manga Judiyu, diliꞌ silan malim na kenneꞌ pa na manga lawas dun ni krus. Yanagaw migsekat silan kan Pilato na panlepeden ya manga bitis na tulu ya utaw na awun pa ni manga krus, pada maksay silan matay aw kamangen ya manga lawas nilan na un lebeng sa diliꞌ pa sumallep ya sega. 32Aw nyadtu ya manga sundalu aw pigleped nilan ya manga bitis na manga utaw na pigkalabuwan eped ni Jisus. 33Manang pagdateng nilan adti kan Jisus, pigkitaꞌ nilan na nyatay da sakanan. Yanagaw walaꞌ da nilan lepeda ya manga bitis nan. 34Manang ya pig-imoꞌ na sambuk na sundalu, pigdugsang nan na dilek ya kilid ni Jisus. Aw maksay nyilig ya duguꞌ aw tubig adti paliꞌ nan. 35Na, ya utaw na migsulat seiy pigmatinaw nan alag kay kyinitaꞌ nan saba ya kadég na nya-imoꞌ. Aw pigsulat nan yeiy pada dayaw kamu uman mangintu-u. Aw kya-ede-an nan na tengteng matinaw ya kanan pigsulat. 36Aw nya-imoꞌ ya kadég yeiy na un matuman ya pigpasulat na Tyumanem asini muna: “Diliꞌ sakanan kalepedan sa pesaꞌ pangkay sambuk.”#19:36 Mabasa adti Éxudo 12:46 aw Salmo 34:20. 37Aw awun pa uman pigpasulat asini muna, “Inunuwun nilan ya utaw na pigdugsang da nilan.”#19:37 Mabasa adti Zakariyas 12:10.
Ya paglebeng kan Jisus
38Pagkatigkas yan, si José na taga lunsud na Arimatiya, nyadtu ni kan Pilato pada sekaten ya lawas ni Jisus, aw tyumandeꞌ si Pilato. Yanagaw pigkamang ni José ya lawas. Na, si José, nyangintu-u sakanan kan Jisus na tagu-taguꞌ kay nyallek sakanan sa manga eped nan na manga magdadumala͡ay sa manga Judiyu. 39Aw nyagad uman kanan si Nikodimo na yan ya migbalawbalaw kan Jisus sambuk na gabi idtu na muna. Aw awun pigdala nan na manimboꞌ na pigdali-an na mirra aw alobira na ya kabegat na kadég yeiy katluwan tag lima (35) ka kilo. 40Aw pigkamang nilan ya lawas ni Jisus aw pig-asagan na manimboꞌ aw pigbedbedan nilan na manga téla na linum kay yeiy ya katanem na manga Judiyu kun maglebeng silan sa nyatay. 41Na, awun tanemanan na malapit dun ni banwa na pigkalabuwan kan Jisus, aw dun ni tanemanan awun sambuk na ilib na bagu pigkutkutan dun ni kilid na pangpang. Aw walaꞌ pa ya piglebeng dun. 42Asuntu na dispiras da na manga Pista na manga Judiyu, aw asuntu na malapit dun ya ilib, yanagaw dun da nilan lebengan ya lawas ni Jisus.
ទើបបានជ្រើសរើសហើយ៖
Juan 19: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
