Sini 12
12
Herodə ci Zakə ɓay kaw Piyer ge ta so daŋgay'i
1Kəri rum, jwə Herodə təŋ kə gi boni ne kə sôwâ məni wə du kul sôwâ Kris. 2Mum ci Zakə mə vay ya Zaŋ kə masəlama. 3Kəri məni mum we kwa rum kəɗam tu ne kə sôwâ Zuwif, mum kaw Piyer ge ta so daŋgay'i. Kwa rum gi kəri cer məni sôwâ Zuwif wə gi kə duwa' mə gi dan dlumu. 4Kəki məni Herodə kaw Piyer, mum ge num ta so daŋgay', ɓay mum ra' kul soje fəɗi' kədan handay um ji. Wə du kul rum daŋ' soje wə han fəɗi' fəɗi'i. Mum ɗik kədan mum də kor sôwâ kə rum kəki cer sôwâ Zuwif mə ɗe kə Pakə#Psi 12.1-27. 5Soje wə ji Piyer wə so daŋgay', ama kul sôwâ Kris wə in dan kə Ifray zə rum kə gbəgboŋo.
Vay sin Ifray ulay' Piyer mbə so daŋgay'i
6Kə dukri məni Herodə wa' kədan mum də kor sôwâ kə Piyer siw, Piyer wə nde sen wə du soje hoɓ, handay gay' num kə cururu hoɓ, ɓay soje kuni wə ji vun vari so daŋgay'i. 7Kəkor sar, vay sin Bârî mə wafray mbə day, ɓay ri mə ɓu ɗeri wə rawti tak i so daŋgay'i. Vay sin Ifray mə wafray nə gay Piyer dla' sen, ɓay la' ne numu: «A car fray ga'ri!» Cururu ulay' mbə ɓa rum njay ta nya. 8Vay sin Ifray mə wafray nə faŋ la' ne numu: «A baŋ fir ru, ɓay a no' təraka.» Piyer gi ndəna', ɓay vay sin Ifray la' ne numu: «A ge mbraw wû, ɓay a ji zu rini.» 9Piyer ji zu rum pâ mbə so daŋgay'i. Mum ɗik i kwa məni vay sin Ifray mə wafray wə gi nə cu kəzin' mi. Mum ɗik i mum we kwa. 10Handay pâ tu kul soje mə cop məni wə ji vun vari tak i so daŋgay', ɓay handay faŋ pâ tu kul soje hoɓ rum məni wə ji vun vari so rum, ɓay handay mbə day vun vari mə njike məni ar vun rum ta ga' mbok so: Vun vari rum ar kə tu rum kor nday, ɓay handay wuru. Handay ra' vari, ɓay kəkor sar vay sin Ifray mə wafray nə 'ya ar Piyer, 11kəri rum, Piyer we kwa məni gi tu rum, ɓay mum ini: «Mgbaŋ ni nə, na we si, kəzini: Bârî sin vay sin um mə wafray hay' rin ɓay mum ulay' nan wə du gbəgboŋ Herodə kə du kwa mə bro' daŋ' məni sôwâ Zuwif wə keɓ kədan handay də gi wa rini.» 12Kəri məni mum we kwa məni gi tu rum ndəna', mum 'ya ta so Mari, ya Zaŋ mə ɗe kə Markə: Raw sôwâ ɓawa han kədan handay in dan kə Ifraya. 13Piyer mbə tu' vun vari, ɓay i sin mə ɗe kə Rode ta kədan ar vun vari ɓay ɗam ɗe rumu. 14Ta mun wor Piyer, ɓay ta tuk kəɗam hâ ta faŋ ne ta rawti so, dan ar vun vari, ɓay la' ne kə sôwâ i Piyer wə rəka. 15Handay ɗam vun sa: «Həŋ laya!» Ama ta də kofo kə in i mum nə kəzini! Zə rum, handay ini: «Vay sin um na.» 16Kəri rum Piyer car hâ wə tu' vun vari. Kəri məni handay ar vun vari, handay we num ɓay kwa rum jin' wa ne ndaya. 17Piyer hâ' nday kə ɓa kədan handay seŋ vun, ɓay mum in vari məni Bârî ulay' num mbə so daŋgay' ne ndaya. Mum faŋ la' ne ndaya: «I də in dan rum ne kə Zakə kə daw ba man məsini.» Kəki rum, mum pâ 'ya ta ri məsini.
18Kəri məni bəka ra' si, soje do dan kə ci vun mbok nji: Mi nə mbə gi Piyer nə su? 19Herodə sin soje kədan handay um keɓ, ama handay cu za' num mi. Mum faŋ ci vun soje məni ji vun so daŋgay', ɓay mum ne vari ne kə soje məsin kədan kuni ci ndaya. Kəki rum, Herodə ar nya Zude kədan mum də so Sezare, ɓay mum suk wə hana.
Mar Herodə
20Herodə tle bak ɓayrum wa sôwâ so Tir kə so Sidoŋ. Zə rum, handay ɓawa mbə hay' rumu. Cop rum handay gila' dan kə Blastus, bə ji vun so jwa. Kəki rum, handay ta kor Herodə, ɓay handay o num kədan heɓ nə ke mbok nday, zə nya nday wə za' kwati car mbə nya Herodə.
21Kəri məni bəka məni Herodə cin nə mbə day, mum ge mbraw jwə um, mum suk wa kwasuk um, ɓay mum ka' dan ne kə sôwâ. 22Sôwâ do dana: «Sumra' cu kə məni wə ka' dan nə mi, ama ifray na!» 23Ama kəri rum sar, vay sin Bârî mə wafray mbə pum Herodə kə gaɓ, zə mum ve mbra' Ifray cin ta wa tu rumu. Ŋgun sik rawti rum, ɓay mum mara.
24Dan Ifray pla' ta kofo kofo.
25Kəri məni Barnabas kə Sol ndo' sin nday wə so Jeruzalem, handay faŋ gewa. Handay tle Zaŋ mə ɗe kə Markə kə ndaya.
ទើបបានជ្រើសរើសហើយ៖
Sini 12: KMN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Le Nouveau Testament et Psaumes en Peve © Alliance Biblique du Tchad, 2014.
