Fuɗɗoode 45
45
No Yusufu annitiniri hoore mum mawniraaɓe mum
1Jooni kan, Yusufu tampi jogaago hoore mum, go o bati himɓe Misira e semme, o wi'i ɓe burtoo diga ɗon. Ɓe fu ɓe burtii, ɓe acci ɓe kanko e mawniraaɓe makko tan, go o annitini ɓe hoore makko. 2O wulli e semme, faa Misirankeeɓe wonuɓe takkol ɗon nani bojji makko, himɓe wuro Firawna bo nani ka. 3Yusufu wi'i mawniraaɓe mum e miiraaɓe mum: Baaba am e wuuri faa hanne na? Amma ɓe baaway toontaago mo, gam ɓe kulii sanne yeeso makko. 4Yusufu wi'i mawniraaɓe mum: Cawree, ɓattee am ɗoo. Go ɓe ɓattii mo. O wi'i ɓe kade: Min woni Yusufu, miiraawo mon mo cippuɗon, go gaddaami leydi Misira ɗoo. 5Jooni, to on accee ɓerɗe mon biisoo, to on gaccee ko'e mon bo gam on cippii am go gaddaami ɗoo, gam Alla nun ardinoyimmi ɗoo gam mi faaboo yonkiiji mon. 6Duuɓi ɗiɗi nun ɗoo, rafo e waɗa. Kade bo e horii duuɓi joy ɗi goɗɗo waawataa aawugo fakko rugga. 7Alla liloyimmi mi ardoo ɗoo gam keɓon buuron, gam mi faaboo on onon e lenyol mon fu. 8Paamee no onon bane waddimmi ɗoo, amma Alla nun. O waɗimmi hande baaba wuro Firawna e ardiiɗo wuro mum, e mawɗo leydi Misira fu. 9Bittee law to baaba am, bi'on mo: Nani ɗo ka suka maa Yusufu bati o wi'i: Alla laaminii am der leydi Misira fu, gam mum, umma gartaa to am law. 10Jooɗoɗaa der leydi Gosan, takkol am, an e sukaaɓe maa, e taaniraaɓe maa, e baali maa, e be'i maa, e na'i maa, e ko gooduɗaa fu. 11Den mum mi nyaamnete, an e wuro maa, e ko gooduɗaa fu, gam to on maayu gam sabbu rafo. Gam rafo waɗan kade faa duuɓi joy. 12Oon ji'a e gite mon, miiraawo am Benyamin bo e yi'a e gite mum, no min Yusufu, min nun baddata on ɗon. 13Jahee pillanee baaba am jaka no tedduŋal am foti der leydi Misira ɗoo e ko ji'uɗon fu. Den mum, etton mo gartiron ɗoo law. 14Ɗon nun o gattii Benyamin e daane oo wulla, go Benyamin bo wulli e daane makko. 15No o yoofi Benyamin o wuunii mawniraaɓe makko ɓen gooto gooto mum, oo wullira. Ɓaawo mum go ɓe puɗɗi baddugo mo.
Firawna lilanii Yaakuubu wara leydi Misira
16No himɓe wuro Firawna nani no mawniraaɓe Yusufu warii, ɗum weli Firawna e himɓe mum fu. 17Go Firawna wi'i Yusufu: Batu mawniraaɓe maa, ɓe doonina babbi maɓɓe, ɓe bitta leydi Kanaana, 18ɓe etta baaba maɓɓe, e himɓe wuro maɓɓe, ɓe gara takkol am. Mi hokkan ɓe leydi ɓuruni wooɗugo der leydi Misira ɓe jooɗoo, gam ɓe keɓa nafa geeta, ɓe nyaama. 19Hokku ɓe laawol ɓe etta laanaaji pucci diga leydi Misira ɗoo, ɓe jaha ɓe ettira rewɓe maɓɓe e wurooji maɓɓe, e baaba mon, ɓe gadda. 20To ɓe miijana fu ko ɓe accata ton, gam ko ɓuri wooɗugo der leydi Misira fu nun laatantoo ɓe. 21Sukaaɓe Isira'iila waɗi hande no o batiri ɓe. Yusufu hokki ɓe laanaaji pucci hande no Firawna wi'iri mo. O hokki ɓe bo nafa ka ɓe nyaamata e laawol. 22O hokki moy fu e maɓɓe kolte kese. Amma Benyamin kan, o hokki mo ceede cardi keme tati (300) e kolte kese joy (500). 23O etti kujje leydi Misira booɗɗe, o roonini babbi gori sappo, o lildi baabiiko. O etti bo alkamaari e nafa ka ɓe nyaamata e laawol to ɓee gara Misira, o roonini babbi debbi sappo, o lildi mo. 24Ɓaawo mum o tannyi ɓe ɓe jawti. O wi'i ɓe to ɓe kaɓu e laawol.
25Ɓe ummii diga Misira, ɓe kooti leydi Kanaana, to Yaakuubu baaba maɓɓe. 26No ɓe jottii, ɓe bi'i Yaakuubu: Yusufu e wuuri, o maayay. Kanko nun du laamii der leydi Misira fu. No Yaakuubu nani ka, o hoolaaki ka, gam o miilayno ka. 27No o bataa ka Yusufu bati fu, go o yi'i laanaaji pucci lildaaɗi gam o ettiree, go jon kan hakkillo makko fu wittoy. 28O wi'i: Ɗum heeƴii. Ɓiyam Yusufu e wuuri, mi yahan mi yi'a mo go mi maaya.
ទើបបានជ្រើសរើសហើយ៖
Fuɗɗoode 45: BFB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Fulfulde Bénin © SIM International 2015, 2024.