Matius 20
20
Pandiriꞌ noniuꞌ i topajama kineteꞌ anggoroꞌ
1-2Notiꞌi hi Yesu, “Poparentana Pueꞌ Ala hibali pandiriꞌ hieꞌe: Haduo tumpu kineteꞌ anggoroꞌ nolou mampaliꞌ toaꞌ to hiniꞌ majama i kineteꞌna. Mihoꞌolu-olu nohuahi haꞌumbora toaꞌ, hei notiꞌikihi, ‘Noloumokei majama i kineteꞌku, hei hingkiꞌ kupaꞌanikei haduo-haduo haro to biasa pe toaꞌ to majama haꞌando, iomo hampepaꞌ doiꞌ peraꞌ.’#20:1-2 doiꞌ peraꞌ wiharoYunani: dinar. Rotorimomo lolitane tiꞌo, honiꞌi noloumohi. 3Tenteꞌ hio mihoꞌolu, nolou womo tumpu kineteꞌ mampaliꞌ to ntaniꞌna. Noꞌokiꞌ haꞌumbora toaꞌ mahohuraluhi i pobaluꞌ-baluꞌa. 4Notiꞌikihi, ‘Noloumokei majama i kineteꞌku. Hingkiꞌ kupaꞌanilukei haromi to hintotoꞌ hante pajamami.’ Noloumohi mpuꞌu. 5Pohoꞌandomo, nolou womo tumpu kineteꞌ tiꞌo mampaliꞌ toaꞌ. Notiꞌikihi, ‘Humeikei majama i kineteꞌku.’ Hatoꞌo woꞌo to nowowoi tenteꞌ tolu kononewa.
6Tenteꞌ limomo kononewa, nohua womo toaꞌ to mahohuraluhi, noteneihi, ‘Mahamporeꞌi hinaꞌ mahuralukei haꞌandoa? Hawaꞌkei majama?’
7Rohoniꞌ, ‘Alaꞌ hawaꞌi uwaꞌ to mampopajamaka.’
Notiꞌi tumpu kineteꞌ tiꞌo, ‘Ane hatoꞌoꞌi, noloumokei majama i kineteꞌ anggoroꞌku.’ Noloumohi mpuꞌu majama.
8Mentoriꞌmo ando, notiꞌimo tumpu kineteꞌ pe mandoroꞌna, ‘Iwowoimohi topajama tiꞌo, hei ipaꞌanimohi harora, mepongka ka to mekahi majama kamuri wute to mekahi majama medulu.’
9Hupaꞌmohi mpuꞌu to majama mepongka tenteꞌ limo kononewa. Pahuahi harora haduo-haduo hampepaꞌ doiꞌ peraꞌ. 10Hatoꞌo mpuꞌu wute hupaꞌhi i topajama to mepongka mihoꞌolu-olu. Topajama to mepongka mihoꞌolu-olu tiꞌo mantiꞌi i lalira, ‘Mononto bateꞌna melobi to hingkiꞌ nopaꞌanikiki, alaꞌ haꞌandomoki majama!’ Angkana to nipaꞌaniki woꞌo hampepaꞌlu doiꞌ peraꞌ. 11Ikopahuara harora tiꞌo, monau-nauhi pe tumpu kineteꞌ, rotiꞌi, 12‘To hupaꞌ ngkamuri, majamahi hajaalu. Angkana ingka, majamaka haꞌando hei nokohuneika. Mahamporeꞌi hinaꞌ ipohibobalilu harongki hante iohi?’
13Nohoniꞌ tumpu kineteꞌ tiꞌo, ‘Halalingku, hawaꞌa masalaꞌ pe ingkei. Hawaꞌireꞌi kudandi hingkenia mihoꞌolu hingkiꞌ pahuakei haromi hampepaꞌ doiꞌ peraꞌ to biasa ane toaꞌ majama haꞌando? 14Mewaliꞌ iroamokei haromi honiꞌi mahuliꞌmokei! Peleihangku mampohibali harora toaꞌ to hupaꞌ ngkamuri hante ingkei.’ ” 15Ka peleihangkulu mampopodumbuꞌ doiꞌku, mahamporeꞌi hinaꞌ mohiriꞌkei pe toaꞌ ntaniꞌna ane moromiꞌ lalingka pe iohi?
16Nopotutu hi Yesu pandiriꞌ tiꞌo, Notiꞌi, “Hatoꞌo woꞌo toaꞌ to kamuri i tempo hieꞌe hingkiꞌ mewalihi himpodulu i ando to hingkiꞌ hupaꞌ. Hei hatoꞌo woꞌo toaꞌ to himpodulu i tempo hieꞌe hingkiꞌ mewali kamuri i ando to hingkiꞌ hupaꞌ.”
Hi Yesu mantiꞌi womo kohingkiꞌ mahiNa
(Mrk. 10:28-31; Luk. 18:28-30)
17I tempona hi Yesu matengkaꞌ nolou pe kota Yerusale, hei topeguruNa to hampuluꞌ meroduo metuntuhi woꞌo i Io, Nowowoimohi mampohida, honiꞌi Notiꞌikihi, 18“Ipehoromuakei moromiꞌ! Hinewowoꞌena, kolentuꞌanta matengkaꞌ nolou pe Yerusale. Itoꞌomo Anaꞌ Manusiaꞌ hingkiꞌ nipewei pe tutuꞌ-tutuꞌ tadulako mpenomba hante guru-guru agama, hei hingkiꞌ nibutusi hingkeꞌna nihuku mahi. 19Hingkiꞌ nipewei Anaꞌ Manusiaꞌ pe toaꞌ to handoꞌiohi toYahudi hingkeꞌna nipokokeniꞌa, nikondo, hei koꞌukoana hingkiꞌ nipaku i loti momehulepe. Angkana ikotolu andona, Io hingkiꞌ tuwuꞌ huliꞌ.”
Toaꞌ to mengkaꞌiwowoiꞌ, iomohi to kodeꞌ konaꞌra i pampeꞌelena Pueꞌ Ala
(Mrk. 10:35-45)
20I tempo tiꞌo, hantambina hi Sebedeu hante anaꞌna roduo nolouhi pe hi Yesu. Inoꞌra hi Yakobus hante hi Yohanes tiꞌo melingkotuꞌ metoungkaꞌ i hinaroNa alaꞌ uwaꞌ to hingkiꞌ noperapiꞌ. 21Nopeꞌitanoki hi Yesu, “Hapo to ikodokoꞌi Kuwali pe ingko?”
Nohoniꞌ inoꞌ tiꞌo, “Kuperapiꞌ hingkeꞌna i tempoMu mewali Datu, anaꞌku to roduo hieꞌe hingkiꞌ mahura moparenta moꞌawa hante Ingko, haduo tinaꞌ i koanaMu, haduo tinaꞌ i koiriMu.”
22Angkana notiꞌi hi Yesu pe hi Yakobus hante hi Yohanes, Notiꞌi, “Hawaꞌkei ibahaꞌ hapo to iperapiꞌkei. Timomokeireꞌi mantaha komaporiꞌ to hangangaa Kurii?”
Mehoniꞌhi, rotiꞌi, “Timomoluka!”
23Notiꞌi womo hi Yesu, “Tuꞌu, hangangaa iriikei komaporiꞌ hibali to hingkiꞌ Kurii. Angkana handoꞌio Aku to mampokononto himo to mahura tinaꞌ i koanangKu hei himo tinaꞌ i koiringKu. Peꞌohaꞌa tiꞌo hingkiꞌ nipaꞌaniki toaꞌ to nopokonontomo UmoꞌKu.”
24Ikonohorinalu perapiꞌre hi Yakobus hante hi Yohanes, bukotahi topeguruNe to hampuluꞌ. 25Iomo horiana hi Yesu mowowoi lekiꞌ-lekiꞌna topeguruNa, Notiꞌikihi, “Ibahaꞌlukei, toaꞌ to hawaꞌi pobahaꞌ Pueꞌ Ala hororokoꞌahi ane moparentaihi toaꞌ, hei toaꞌ to dingkaoꞌ tikoara tiꞌo pokohi moparuku toaꞌ ntaniꞌna hingkeꞌna motuntunihi hawaꞌra. 26#Mat. 18:1-5Angkana ingkei, inioꞌkei hatoꞌo. Hihimo to mangkodokoꞌi hingkeꞌna i wowomboꞌ tikoane i lumbumi, hangangaa mewali duluna haduo toperewahi. 27Hei hihimo to mangkodokoꞌi hingkeꞌna mokonaꞌ i lumbumi, hangangaa mewali duluna hibali haduo hawiꞌ. 28Hangangaa ipetuntuikei waliane Anaꞌ Manusiaꞌ, alaꞌ tungkaihaNa humei pe duniaꞌ hieꞌe hawaꞌi hingkeꞌna nirewuꞌI, angkana hingkeꞌna mewaliꞌI toperewu hei mampewei wotaNa nirokoꞌ hingkeꞌna woriꞌ toaꞌ Nohompoꞌ ka pehuku dosara.”
Hi Yesu mampokoꞌoriꞌ roduo tobilo
(Mrk. 10:46-52; Luk. 18:35-43)
29Kopolairalu hi Yesu hante topeguruNa ka kota Yeriko, woriꞌ toaꞌ metuntu i iohi. 30I patengkaꞌara, uwaꞌhi roduo tobilo to mahura i hiri lala. Korobahaꞌnalu kohiYesuna to moliu, moloaꞌhi, rotiꞌi, “Pueꞌ, muleꞌna datu Daudi! Ipokarimaka wongkenaꞌ!”
31Woriꞌ toaꞌ to mokamorokihi, rotiꞌi, “Mondiiꞌkei!” Angkana tobilo tiꞌo mewowoiluhi pedeꞌ ropokobue, rotiꞌi, “Pueꞌ, muleꞌna datu Daudi! Ipokarimaka wongkenaꞌ!”
32Meꞌohaꞌmo hi Yesu, Nowowoihi, honiꞌi Noteneihi, “Hapo to ikodokoꞌikei Kuwali pe ingkei?”
33Mehoniꞌhi, “Pueꞌ, kikodokoꞌi mpololeke pangkiꞌ!”
34 #
Yes. 29:18; 35:5 Marima laline hi Yesu pe iohi, honiꞌi Norama matare. Kaliuꞌhi pangkiꞌ, hei metuntuhi pe Io.
ទើបបានជ្រើសរើសហើយ៖
Matius 20: LAILJE
គំនូសចំណាំ
ចម្លង
ប្រៀបធៀប
ចែករំលែក
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
2017 Indonesian Bible Society (Lembaga Alkitab Indonesia)
