Utu 35
35
Chapanga akumumotisa Yakobo ku Beteli
1Kangi Chapanga akamjovela Yakobo, “Tumbulayi kuwuka uhambayi ku Beteli ukatamayi kwenuko. Ukanijenjelayi pandu pa kuwusila teta nene Chapanga mwenakuhumalili pewamutilayi muhaja waku Esau.”
2Penapo Yakobo akavajovela vandu vaki na voha vevavii pamonga naku, “Mtagalilayi kutali michapanga ya chiyehe yemuvili nayu, mjitendekeha mwavene kuvya muyidakiliwi kumuyupa Chapanga na muwalayi nyula zamupya. 3Kangi tiwukayi tihambayi ku Beteli, kwenu nikamujengela pandu pa kuwusila teta Chapanga mweanitangatili lukumbi lwa mang'aiso gangu, Chapanga mweavii na nene kwoha kwenahambili.” 4Ndava yeniyo vakampela Yakobo michapanga yavi yoha ya chiyehe yevavili nayu, pamonga na ndolola zevawalili mumakutu, ndi akavihilalila pahi ya mkongo wa mwaloni wewavili papipi na Shekemu.
5Yakobo na vana vaki pevawukayi, Chapanga akavayogopesa vakolonjinji va miji yila, penapo kawaka mweavalandalili. 6Yakobo na vandu vaki voha vakahika pandu pepikemiwa Luzu mumulima wa Kanaani hinu pikemiwa Beteli. 7Kwenuko akajenga pandu pa kuwusila teta kwa maganga, akapakemela Eli Beteli, muni pandu penapo Chapanga amuhumalili Yakobo peamutilayi muhaja waki. 8Debola mweamuleli Lebeka mdala wa Isaka peavi mwana, akafwa vakamuzika kwenuko papipi na Beteli, pahi ya mkongo weukemiwa mwaloni. Penapo Yakobo akapakemela pandu pala Aloni Bakuti, mana yaki mkongo wa chivembu.
9Yakobo peawuyili kuhuma ku Padani Alamu, Chapanga akamuhumila kangi na kummotisa. 10Chapanga akamjovela, “Veve lihina laku Yakobo nambu yati ukemelewa lepi kavili Yakobo, tangiya hinu lihina laku yati livya Isilaeli.” Chenicho Chapanga akamkemela lihina laki Isilaeli. 11Chapanga akamjovela, “Nene ndi Chapanga mwenina uhotola woha. Ukavelekayi na kuyonjoseka. Mulima na vandu va milima yati vihumila kwaku, na vankosi yati vihumila muchiveleku chaku. 12Mulima wenavapelili Ibulahimu na Isaka yati nikupela veve, mewawa yati nikuvipela viveleku vyaku mulima wenuwo.” 13Chapanga peamalili kulongela na Yakobo pandu penapo, ndi akakwela kunani. 14Pandu pala Chapanga pealongili naku, Yakobo akayimamisa lipanda la liganga kwa kuyitalila panani yaki mahuta na kuyitalila teta ya mnyweso. 15Yakobo akapakemela Beteli, pandu pala peakonganiki na Chapanga.
Laheli ifwa
16Kangi Yakobo na vandu vaki vakayendelela na lugendu lwavi vakawuka ku Beteli. Pevavii munjila vakona vangahika ku Efulati, Laheli akavya na lipyanda neju la kuveleka. 17Peavili mumvinisu wenuwo, ndi mvelekisa akamjovela, “Kotoka kuyogopa, muni upatili mwana yungi wa chigosi.” 18Laheli peavi mukutyalatyala kufwa akampela lihina laki Benoni, nambu dadi waki akampela lihina Benyamini.
19Laheli akafwa, vakamuzika pamuhana ya njila yeyihamba ku Efulati, hinu yikemelewa Betelehemu. 20Panani ya litinda lenilo Yakobo akayimamisa liganga panani yaki mbaka lelu limanyikana kuvya litinda la Laheli. 21Isilaeli mewa ikemiwa Yakobo, akayendelela na lugendu lwaki ndi akajenga lindanda upandi wungi wa munala wa Edeli.
Vana vagosi va Yakobo
(1 Lus 2:1-2)
22Isilaeli peatama pamulima wenuwo, Lubeni mwana waki akagona na Bilha, mweavi ngati mdala wa dadi waki, ndi Isilaeli akayuwana mambu genago.
Yakobo avii na vana va chigosi kumi na vavili.
23Mwana mtumbula wa Lea ndi Leubeni mwene avii mvelekwa mtumbula wa Yakobo kangi ndi Simeoni na Lawi na Yuda na Isakali na Zabuloni. 24Vana va Laheli vavii Yosefu na Benyamini. 25Vana va Bilha mtangatila wa chidala wa Laheli vavii Dani na Naftali. 26Vana vevavelekiwi na Zilifa mvanda wa Lea vavii Gadi na Asheli. Venavo ndi vana vachigosi va Yakobo vevavelekiwi lukumbi peavili ku Padani Alamu.
Isaka ifwa
27Yakobo ahambili kwa dadi Isaka mweatamayi ku Mamle, papipi na Kiliati Alba mewawa pikemelewa Hebuloni, pandu pevatamili Ibulahimu na Isaka ngati vayehe. 28Isaka atamili miyaka miya yimonga na semanini. 29Isaka afwili avi mgogolo wa miyaka yamahele, vana vaki Esau na Yakobo vakamuzika.
ទើបបានជ្រើសរើសហើយ៖
Utu 35: Ngoni
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ngoni New Testament © The Word for the World Southern Africa and Pioneer Bible Translators, 2020.