Yuörö 12
12
Rorwe lo Pasaka
1 #
Lew 23.5; Ken 9.1-5; 28.16; Nyö 16.1, 2 A MATAT kulyani ko Mose ko Arona i jur lo Ejipeto adi, 2Ŋilo yapa ködyö gwon kasu a suluet lo yapala; ta ködyö koŋdya lepeŋ a yapa togeleŋ lo kiŋa. 3Tamaki ta momoret liŋ na Ŋutu ti Yisaraele adi, I perok puök ti ŋilo yapa, ti Ŋutu liŋ geleŋ geleŋ ŋadi ’dumuŋdye kilolor köbilityo kode meetyo gwoso i kötumit na merenye lonyit, kweja adi mede geleŋ ’dumuŋdya kilolor geleŋ; 4a ko nene mede gwon ko Ŋutu ku ’dik ti jukin tutuŋgö nyesu kilolor, a ti lu ŋuto se ko marate lonyit lo diŋö ko kadi nanyit lo ’dumuŋdye gwoso i tojore na Ŋutu; ta ködyö kenakiŋdya Ŋutu logon nyesu kilolor geleŋ gwoso i temet na nyesu nasu. 5A yisi kasu ködyö gwe a mönikön ti kiŋa geleŋ logon ’bak yuyuket; a ta ködyö ’dumuŋdye se i kiden na köbilu kode i kiden na melon;
6a ta kodyö wowoji se tojo ko perok puök wot Iŋwan ti ŋilo yapa, a lodir liŋ lo momoret na Ŋutu ti Yisaraele ködyö ’duŋge se i sömukö. 7A se ködyö ’dumuŋdye kunie rima a ’bulukiŋdye se i kaden goŋesi murek ti kötumitön ko i görit na ki i kadijik na nyesi se kilo yisi kata kunu. 8A i ŋilu tukwaje lo geleŋ lu, a se ködyö nyesi lokore na pepelo, mora ko ambata nagon ’bak kape ko ’dötilön nagon a koropo na pötwör.
9An ta ko nyesu ta nene na ŋina lokore a nadon kode na dera ko pioŋ, ama ti nye peloni pelo ’buluŋ, kwe nanyit ko mokosi kanyit ko ŋo kanyit liŋ ti lukata. 10a ta ködyö tine kölökin nene pitönö i möŋdu tojo ko ko ’bure, kölumbö a ta ’yuŋe pitönö na möŋdu tojo ko ko ’bure na.
11Ta ködyö nyesu sona, kweja adi ta a rupakiŋdya boŋgwat kasu i mukökö a tora, ko a sukiŋdyö kamuka, ko a ’debba turya; a ta rurume rurum i nyesu. Ŋilo a Pasaka lo MATAT. 12Kogwon i lu tukwaje nan mo laŋaddu i jur lo Ejipeto, a nan mo tatuje kayujin liŋ ti jur lo Ejipeto, kweja adi kayujin ti Ŋutu ko ti toro ’bo; a nan mo ’duŋökiŋdye ŋunyen liŋ ti Ejipeto putet. Nan logon a MATAT. 13a kine rima mo gwe a kweyet kasu i kadijik na gwoŋdi ta kine; a na meddi nan kine rima nu, a nan mo laŋaddi laŋaddu kasu, a nene tomiet na tatatuja mo tine ’dukin kasu ki na tukaŋi nan jur lo Ejipeto nu.
14 #
Yuö 23.15; 34.18; Lew 23.6-8; Ken 28.17-25; Nyö 16.3-8 A ta ködyö ’debbi ŋilo lor a toyeyeet, logon ta konakiŋdye MATAT rorwe; a ta ’debbi lepeŋ tojo i nyakwariat kasu liŋ a saret ŋupi lo wurö.
15Ta ködyö nyesu ambata nagon ’bak kape ko perok buryo; i lor lo kokwe a ta ’buköddi kape kaŋo kasu i kadijik, kogwon ko lon ŋuto logon a nyesu kinyo logon ko kape suluja i lor lo kokwe tojo ko perok buryo, a lu ŋuto ködyö riköjine kaŋo i kiden na Ŋutu ti Yisaraele. 16A lor lo kokwe kodyö gwe kasu a pepenet loke, ko lor toburyo lo kilo perok a pepenet loke; kita ködyö ti bulö kona kwöŋ i kilo perok, ama kinyo logon Ŋutu nyönyö lo ta tuŋ ködyö teteŋdya nye. 17Ta kodyö ’debba rorwe lo ambata nagon ’bak kape, kogwon i lu lor gwak nan a joŋga lodirön kasu kaŋo i jur lo Ejipeto; nyenagon ’debbi ta ŋilu lor tojo i nyakwariat kasu a saret ŋupi lo wurö.
18Suluja i tokotyaŋ i perok puök wot Iŋwan ti yapa togeleŋ ta ködyö nyesu ambata nagon ’bak kape tojo ko tokotyaŋ i perok merya murek wot geleŋ ti yapa. 19Kape ködyö ti rye kasu i kadijik ko perok buryo; kogwon ko lon ŋuto logon a nyesu kinyo logon ko kape a lu ŋuto ködyö riköjine kaŋo i kiden na momoret na Ŋutu ti Yisaraele, kode nye a lepetyo, kode nye yuŋwe i lo jur. 20Ta ködyö ti nyesu kinyo logon ko kape; ta ködyö nyesu kinyo logon ’bak kape i piritön kasu liŋ.
21A kirut Mose luŋgi temejik liŋ ti Yisaraele, a kulyani ko se adi, Wulö kiŋdye ta ’börik yisi gwoso i midijik kasu, ko ’duŋge ta se a ti Pasaka. 22A ta ködyö ’dumuŋdye lömuryeje logon a tora i pirit na geleŋ, a jurutökiŋdye i rima na gwon i diköri kune, a sekiŋdye kine rima i görit ko i goŋesi murek ti kötumit; a lele losu tine tu kaŋo i kötumit na kadi nanyit tojo ko ko ’bure. 23#Eb 11.28 Kogwon MATAT mo wöröji i jur ’bukuluŋ i tukaŋu na Ŋutu ti Ejipeto; a na meddi nye rima i görit ko i goŋesi murek ti nene kötumit nu, a MATAT mo laŋakiŋdye nu kötumit kak, a tine kölökiŋdyö katukaranit i lupö kasu i kadijik i tatuja na ta. 24Ta ködyö ’debba kine kulya a saret lo wuröki ta se ko ŋwajik kasu ŋupi. 25A mo gwe sona, ko ta a ’dur i ŋilu jur logon MATAT a milyekin tiŋdu ta lu, a ta ködyö ’debbi na kita. 26A ko ŋwajik kasu a pija ta adi, Tokoret na ŋina kita a nyo? 27a ta ködyö waddi adi, Lo a rubaŋga lo Pasaka lo MATAT, kogwon nye a lapakiŋdya kadijik ti Ŋutu ti Yisaraele kak Ejipeto yu i diŋit na tatuje nye Ŋutu ti Ejipeto a kölökiŋdye kadijik kaŋ nu. A Ŋutu dulakiŋdye kusik kase kak i twöju. 28A Ŋutu ti Yisaraele iti i koŋdya na ŋo liŋ gwoso na saŋi MATAT Mose ko Arona nu.
Tomiet na ’dutet nagon a twatwa na kayujin
29 #
Yuö 4.22, 23 A ko gwe sona i tukwaje kiden, a MATAT tatuje kayujin liŋ i jur lo Ejipeto, suluja i ŋuro kayu lo Paro, iŋkoi ŋilo Paro lo si ’da i si ’daet na tumatyan lo, ma ’di tojo ko ŋuto kayu lo ŋuto lo rereka lo gwon i dili rereket lo, se ko kayujin liŋ ti toro ’bo. 30A Paro ko köliŋönök kanyit liŋ se ko Ŋutu liŋ ti Ejipeto ŋine ŋien i tukwaje, a poki i lulujö parik lwölwöŋgu, kogwon nene kadi ’bayin nagon ŋuto a ko twan kata. 31A Paro luŋgi Mose ko Arona i tukwa je, a takiŋdye se adi, Ta se ko kilo Ŋutu ti Yisaraele ŋine ta ki, iti ta kaŋo ko Ŋutu kwe kiden; iŋgo iti ta i kitakiŋdya na MATAT gwoso na kulyari ta nu. 32Joŋgi ta teŋon kasu ti yidin ko ti kisuk gwoso na kulyari ta nu, ko iti ta; ko momo ’yi ta MATAT i ’boroja na nan. 33A Ŋutu ti Ejipeto rurumbe Ŋutu kulo anyen sonyoddu se kaŋo ’de ’de i jur; kogwon se kulya adi, Yi liŋ a Ŋutu lo twatwa. 34A Ŋutu kulo ’dumuŋdye ’bolot kase nagon kape a ko nyuŋ tiki nyin kune, a torakiŋdye kalabajin nutusi i boŋgwat kase muisi, a lilikiŋdye kase i kidyö. 35#Yuö 3.21, 22 A Ŋutu ti Yisaraele iŋge koŋdya gwoso nagon Mose a kulyari nu, lepeŋat a mo ’yu Ŋutu ti Ejipeto ko minyojin ti pödö ko ti dakap, se ko boŋgwat; 36a MATAT iŋge tiŋdu Ŋutu ti Ejipeto i gwon ko töilyet lo ’but ko kilo Ŋutu i rukökiŋdyö na se ŋo na mulun se kune. A se ryakaddi tito ti Ŋutu ti Ejipeto sona. Ŋutu ti Yisaraele a Yuörö kaŋo i jur lo Ejipeto. 37A Ŋutu ti Yisaraele oidrö Ramasese tojo Suköt, gwoso Ŋutu aliŋan miajin buker lo wörö ko mok, wat Ŋutu wate ko lupudiet. 38A lodir lo Ŋutu ka ’de ka ’de iŋge moraddu ko lepeŋat, ko tepon ti yidin ko ti kisuk a toro ’bo jore parik. 39A se pe ’yi ambatajin nagon ’bak kape ti ’bolot nagon se a jon kaŋo i jur lo Ejipeto yu kune, kogwon a ko nyuŋ tiki kaŋe nyin, kogwon se a riköji kaŋo i Ejipeto a tine bulö möŋdu i tetena-kiŋdya na ’börik kinyojin. 40#Sul 15.13; Gal 3.17 Ŋutu ti Yisaraele a si ’da i jur lo Ejipeto ko kiŋajin miajin Iŋwan ko merya musala. 41a ko gwe sona i ’dutet na kaŋajin miajin Iŋwan ko merya musala, i ŋilu lor gwak a lodirön lio ti MATAT Yuörö kaŋo i jur lo Ejipeto. 42A ŋilu tukwaje gwe a tukwaje logon MATAT gwon ko konyen na i meddya i joŋga na se kaŋo i jur lo Ejipeto; nyena Ŋutu ti Yisaraele lio ködyö ’debba ŋilo tukwaje ko konyen ŋa i yeyeöddu na MATAT tojo i nyakwa-riat kase.
Kulye saresi i kulya ti Pasaka
43A MATAT kulyani ko Mose ko Arona adi, Lo a saret lo wurö i kulya ti Pasaka. Lwakatyo a ko ’buruki i nyesu kinyo lo Pasaka; 44ama ’dupi liŋ lo gwögworwe ko gurut kilo bubulö nyesu ko ködyö ta a taweŋu lepeŋat.
45Ŋutu lepelok kode koliŋönit lo roŋaki i kita a ko ’buruki i nyesu. 46#Ken 9.12; Yoa 19.36 Ti ŋilo Pasaka nyeni i kadi geleŋ; do ti baraddu nene na lokore kaŋo kadi; do ti ’beleŋgu lele kuyutyo lonyit. 47Ti momoret na Yisaraele liŋ ’depe ’deŋ ŋilo rorwe. 48A ko ŋuto logon a lepetyo kata konut logon ’dek koŋdya Pasaka lo MATAT, ti Ŋutu kanyit lyan liŋ tawe-roni tawero, a kirut ti lepeŋ ’burukine i moruŋdya kata; a nye de gwe gwoso ŋuto lo yuŋwe i jur. Ama ŋuto logon a a ko tawero lo ti gwe ti ’buruki i nyesu kwöŋ. 49Saret geleŋ kata i kulya ti ŋuto lo yuŋwe i jur ko i ŋuto lo si ’da a lepetyo kasu kiden. 50A Ŋutu ti Yisaraele liŋ koŋdi gwoso nagon MATAT a saŋi Mose ko Arona nu. 51A i ŋilu lor gwak, a MATAT joŋgi Ŋutu ti Yisaraele kaŋo i jur lo Ejipeto ko lodirön kase.
ទើបបានជ្រើសរើសហើយ៖
Yuörö 12: BBE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bari Bible © United Bible Societies, 1979.