Efeesso 4
4
Kiriisto wohoo kaldaye inno kayeela
1Ani hili Kamure an haaggicho, iche toolla jeela ikajira. Maantaka a atin hawwaasdee, taba jiroti ꞌdooꞌdi Waakh wahe imasse jira. 2Taba kol tuumman isnuglaacha toro la ꞌdooꞌdi samacchaare ateeha. Garrahsada, toro la jeenteti atin isiꞌdoontaan u ꞌdooꞌdi addan akaahhollowina. 3ꞌDeerka hol dowa, nebeyti atin iskaleefiddiitaan ka wohoo kaldaye Rubeyti Waakh atin kayeesse khuccha. 4Rubeyti Waakh a too kalday one, toro la inno a sartoo kalday. Saggaas on u, maanti Waakh inno wahe khajjeeloo kaldaye inno iwahe. 5Kamur a koo kalday one, jiti inno Waakh kakhuufno la a koo kalday one, baattissiyoti inno labaattissiye la a too kalday on. 6Toro la Waakh a koo kalday one, a Aabbahi walah tuummane, walah tuumman dakhti, walah tuumman hil kahaagsati, walah tuumman goycho furti.
7Iꞌdaasenyi Kiriisto eteemba haaggi Waakhe buure a siiche, ulla saggi liigiso a gooche. 8Jeentetaase Yeedi Waakh iꞌda iyadeeh,
“Maanti us serey ka inti saraat ikore,
chiiytiis a booliye woye,
toro la siimohi hahhaaggane ꞌdooꞌdiis siiche.”#4:8 Sabuur 68:18.
9Waha kamalda bal, yeeda maanta, “Sereye ikore,” essi mehe kaabanna? Waha mehe inno abchaan ya, us harra goyaka laka inti weyti ilaate isookhubte. 10Usuhi sookhubte, usuhaas on serey ikore, serey ka intaas weyti kutto ikore, serey tuumman ichoow harra tuumman buuhiche. 11Usu ꞌdooꞌd gaasoo ergaano kayeele, gaasoo laka ꞌdooꞌdi Waákh íyeyyeedo kayeele, gaasoo laka ꞌdooꞌdi Wori Haaggan taaꞌhicho kayeele, gaasoo la ꞌdooꞌdi urur Kiriisto yaakhicho toro la Yeedi Waakh abcho kayeele. 12Waakh iꞌdane yeele, ꞌdooꞌdi Waakh hili icho Waakh ihilaan itannabicha, ꞌdee urur Kiriistoki sartiise miigowa. 13Waha la orey on isohtaane ichoowka inno tuumman kakhuufnaanki inno Waakh kakhuufno ka ichoow Weeli Waakhe inno abanni ka wohoo kalday nateehe, ꞌdooꞌdi iiꞌdowe nateehe ichoowka geeddi Kiriisto iiꞌdowe iiꞌdowna.
14ꞌDeerka inno iꞌdi nyaakhuti dowwa leekkeesti menye, iꞌdi koobanhoo rucchule chirri hafar urgiyo kolba ankoo liikhaato mee. Toro la inno ꞌdooꞌdi worassi beenaate icho enenyet abchaan ka enenyet ekkeesti mee. 15Inno kol dakkhan ꞌdoonin ka ayti rummaat on isicheekna ꞌdee jitat tuumman ka weynaanna, iꞌdi Kiriistohi matakki ꞌdooꞌdiise nateeh. 16Inno a iꞌdi miilassi addane sareet. Saggi miilassi sareet tuumman isliikadagche maanjeerre ikhucchissuu, Kiriisto laka usu ꞌdooꞌdiis wohoo kalday kayeela. Saggaas on u miilassi sareet kooba hiliis mujjume haaggicha, sartaas ꞌdoonin ka weynaatta miigowta.
Jiroti husube Kiriisto ka lajiro
17Maantaka, antohi Kamur isiiche ka an weyti waha katirriinsada, taba uus jiroti atin jirtaan iꞌdi ti ꞌdooꞌdi Waakh igaranne mali ilmarhaatteet kamassi eheynan. 18Malassicho mugꞌdi buuha, jiroti Waakh lakaꞌhelo a lakagooche. Jeenteti matahenyeticho miig itahuu, wahanyeyyohi Waakh ma gartaan. 19Icho chiꞌicho suujoon yeelaan laka kola leelakhaanyo mee. Wihi sarticho ꞌdoonto iꞌdaanu yeelaan. ꞌDamaam ka biꞌdiri noole kol dakkhan iamuumaan.
20Iꞌdaasenyi saggi wor Kiriisto atin liiabche saggaas mee. 21Wihi an tissibo, maanti atin woriis daagteen, wihi atin laabche ichoow yeedi rummaate Yeesso miinsan a israahaan. 22Wihi atin laabche, jiroti atin ꞌhor jirteene, fiddihiinki uskeel liimoono atin ekkeeste toro atin kheerooche ꞌdiicha. 23Toro la a atin laabche, rubeyohiin ichoow malassiin husubnaassaan. 24Wihi ꞌdaꞌddaboot, Waakh a atin soouume, ꞌdee ꞌdooꞌdoo huhhusube iꞌdiisenye rumanka fiffissane toro munyee tateehiin.
25Maantaka ebba been a ꞌdiicho, eti addane Kiriisto rummeeste rum on a kaleeyyeedo, a mehe inno tuumman a miilassi sartoo kalday. 26“Holi atin khabtaan ka uskeel agelina.”#4:26 Sabuur 4:4. Hol khabtaani orrah iiche dihin. 27Toro la Seytaan jitoo us uskeel atin kalugꞌdo iiyeelina. 28Eti goorat hatto kaassohti, hatto a ꞌdiicho, hil a haaggicho, wohoo khumman a yeelo ꞌdee eti intiis gaabantahe wihi us leegismo a khabo.
29Yeedi ꞌdooꞌdi addan gaameero uus afiin leeimaatane, yeedassi ꞌdooꞌdi gargaar ꞌdoono gargaaro toro la uur miigoocho on kaayyeeda. Iꞌda ka la ꞌdooꞌdi atin daago buuhi Waakhe ꞌhela. 30Rubeyti Munyeenye Waakh la akabolkhinna. Iꞌdi tahe Rubeyta Waakh a sumatti saggi atin ꞌdooꞌdi Waakh itahiine ichoowka ibeenki Waakh ribnaanki ꞌdaꞌddaboot atin ribo tusso. 31Taba iisibobbolkhina ommos iisinyannyaamina ommos iisihohhollowina ommos iiskaarriirina ommos iishamanna ommos suujoonkoo rucchul laka iisikhabina. 32Haag on enenyet iyeela, toro la enenyet uur inugleesda. Saggi Waakh laka jeenteti atin ichoow Kiriisto wohoo kalday itahiin u uskeeliin atin ikakutuu, atin laka eti uskeeloo atin iyeele, uskeel ikakuta.
ទើបបានជ្រើសរើសហើយ៖
Efeesso 4: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.