1 Koriinto 10
10
Uskeeli ꞌdooꞌdi Issiraayele yeele buja
1ꞌDooꞌd Kiriistokaaw, wihi aacchinyetiinti Muusa woye kayitahye atin kasooꞌhelin ꞌdoona. Icho tuumman mirisi Waakh sooerge woye#10:1 Guuram 13:21. toro la icho tuumman nebey beyti buure maaheen. 2Icho tuumman mirisa ka ichoow beyta buure ka a iꞌdoo labaattissiye ꞌdooꞌdi Muusa raaho lakayeele. 3Icho tuumman gololaas Waakh girmo ka siiche isleeyumheene, 4toro la bicchehaas Waakh girmo ka siiche isleeyubhaabeen. Iꞌdi tahe daddaabti buurenye girmeenye icho raahte bicche kayubhaabeen. Daddaabtaas la a Kiriisto rubeytiissa. 5Chiꞌiche iꞌdaas tahe laka, Waakh aacchinyeteen buurche a kahollowe tuunte, sarticho hidaad tuumman kataaꞌhte.
6Wahaas tuumman la a iyookkoyyohi inno waanicho, uus ꞌdee inno laka iꞌdichuu wahanyeyyohi sussuuje maanjeeranne. 7ꞌDooꞌdaas gaasoo iyookkoyyohi waakkhakh lakayeessi wahte. Iꞌdicho iitaahana. Iꞌdi liichiiruu, “ꞌDooꞌda a orronte sukuuku gele yomboka girꞌdaanki biꞌdire ikahe.”#10:7 Guuram 32:6. 8ꞌDooꞌdaas gaasoo sohoꞌddarri kaassohte. Ibeenkoo kalday goyaka ꞌdooꞌdi elif tomon lamma ichoow elif seyyahe ꞌdebbeeste. Uus inno laka iꞌdichuu sohoꞌddarri kaassohan. 9ꞌDooꞌdaas gaasoo Kamur a kaje toofaf icho bakkicheen. Uus inno iꞌdichuu Kiriisto kajin. 10ꞌDooꞌdaas gaasoo a nyunnyuwe, herti Waakhe walah uskulaasso icho bakkisse. Uus inno iꞌdichuu nyunnyuwin giꞌde.
11Waha tuumman yaafohi Issiraayel a kayitaaheene, ꞌdee iyookko inno iyateehiin. A lachiire ꞌdee innohi ibeenki harra ꞌdubiche soodowwaate jirro inno tootoochaan. 12Maantaka eti tuummane kol us mujjum toollo iskoog, a isyuubsati giꞌde uus kufinee. 13Kajmeti uskeel atin kaluguꞌddo a ti weeli enenyet tuumman lakakajo on. Waakh la a lakakhuufa gone, us kajmeti atin lakajo geeddi atin ituddubin ꞌdirihiche a atin kajeycha. Iꞌdaasenyi chirra atin lakajo, us toro jiti atin kajmetaas kabahsattaan a atin iyeela, ꞌdee kajmetaas ka garrahsan tuddubtaan.
14Maantaka aalasseeyki an weyti ꞌdoono, iyookkoyyohi waakkhakh lakayeessi kafirda. 15Atin a ꞌdooꞌdi iiꞌdowe. Wihi an kaayyeedo isigoocha. 16Chirri inno gololi Kamur ka Waakh koob ka kalaꞌd ilaabno toro danno, inno tuumman gargaari diig Kiriisto isleegisanna menya? Makaateti lajebcho islaleeyaham ka la, gargaari sar Kiriisto isleegisanna menya? 17Jeenteti makaate too kalday itahe, innohi ittaawe laka a sartoo kalday. Iꞌdi tahe inno tuumman makaatetoo kaldaye isleegisanna.
18Bal ꞌdooꞌdi Issiraayel yeya. Soorriyoyyohi Waakh chalag ka liibahche icho isleeyamhiin ka, wahnaanki Waakh chalag ka lawahti a isleegismaan. 19Iꞌda ka mehe elda ya, soorriyoti iyookkoyyohi waakkhakh lakayeessi liibahche ommos iyookkoyyoha waakkhakh lakayeessi walah icho yahiin mele. 20Wihi an eldi a mehe ya, wihi ꞌdooꞌdi Waakh igaran soorriyoocho, icho ginnayyo isoorriyoochaan menye, Waakh mee isoorriyoochaan. Ani la atinhi atin ichoow ginnayyo ba wohoo kalday tateehiin ma ꞌdoono. 21Koobi Kamur ichoow koobi ginnayyoot ma isleedantaan. Ommos gololi komborti Kamur ichoow gololi komborti ginnayyoot ma isleetamhiin. 22Kamure inaaf gelin ꞌdoonna? Kol inno Kamur kamiignahe koogtahiin?
23Mehe leessa ya, “Wihi an yeelin ꞌdoono walah ikajeycho mele.” Iꞌdaasenyi walah tuumman mee atin iroon. Toro la “Wihi an yeelin ꞌdoono walah ikajeycho mele,” iche leessa. Iꞌdaasenyi walah tuumman mee gargaar khabo. 24Awtiinna on ayowanna, iꞌdaasenyi ꞌdooꞌdi addan aw ikhaba.
25Chirri at jidi bicchir ka loororicho taham, jeenteti rubeytaahti haag ichoow suujoon seley saahtuu, walah awowworsan. 26Iꞌdi tahe, “Harra a ti Kamure, toro la wihi kajiro tuumman a wihiissa.”#10:26 Sabuur 24:1.
27Chirri etoo Kiriisto irummeysan minkiis ka golol kiwahe at la iran ꞌdoonto, iro on. Walahbaaw lakisiicho ka aham. Jeenteti rubeytaahti haag ichoow suujoon seley saahtuu, walah awowworsan. 28Iꞌdaasenyi chirri, “Golola a ki naffi iyookkoyyohi waakkhakh lakayeessi liisoorriyooche,” lakiidah, jeenteti eti iꞌdaas kiidah ichoow iroonoti rubeyti haag ichoow suujoon seley saahtuu, gololaas uumhan. 29Waha la jeenteti rubeytaahti haag ichoow suujoon seley saahto menye, a jeenteti rubeyti etaas. A mehe a iꞌdoh furnaanki an furanahe ka wihi an yeelin ꞌdoono rubeyti etoo addane waha a suuj ielatti u ijeycha? 30Chirri an golossadi an Waakh kalaꞌd ilaabo, a iꞌdoh etoo addan toro golola an Waakh kalaꞌd ilaabo ka iabaara?
31ꞌDeerka golossatteey ommos wohoo danteey ka ba, ommos walahbaaw at yeesso ka, waha tuumman saggoo Waakh liikoolicho iyeel. 32Fiddihi atin fiddiitaan uus etoo kalday laka tarraantarrin, ꞌdooꞌdi Yaꞌhuud ommos ki Yaꞌhuud ieheynan ommos ururi Waakh eheetteey ka ba. 33Saggaasu la, ani walahbaaw an yeelo ka, wihi an yowdi iroonoteey menye, ꞌdooꞌdi addane kahamaadicha, ꞌdee ribnaan ꞌhelaan.
ទើបបានជ្រើសរើសហើយ៖
1 Koriinto 10: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.