1 Kɔlìn 16
16
Màfeta èghɨ etɨŋe bòt Mbɔ̧ɔ̧mà
1Maà nkɨ làꞋa ane ànəa màfeta èkab e nɨ tɨŋe bòt Mbɔ̧ɔ̧mà bu a Jèlusalèm la, nê, bɨ bɔ ndɨ bɨ̀a ghɨ̀ àghɨa e ndi shu abua bèchɔsì bu a Gàlashìà nê bɔ̀ me ghɨ̀ la. 2Waa waa ane yɨ̧ ye nê ye fete èkab ye bɔ la ane àlia mbì ane nkàb ègème nɔ̀ŋè me chɨ̀Ꞌɨ, mbɨ̀Ꞌɨ̀ è nkɨꞋɨ, bɨ̀ ka tsi fete èghɨ. 3Bɨ̀ ghɨ̀ ale, mbɨ̀Ꞌɨ̀ è nkɨꞋɨ, e shɨ èkatè ŋǎ abua bòt bɨ làà la bɔ nɨ ne èbɨ̧ ne èghɨ nga a Jèlusalèm. 4A nyɨ̀Ꞌta nê, wu ànəa ntsɔ̧̀ nê è nga mɨ̧̂, ko bɔɔ kùŋà am ba tò ba aa ghǎ nɔ̂.
MènkwàꞋte Pɔ̂l
5Maa li ntse a Màsèdonìà nkɨ̀Ꞌɨ̂ ndzè àwɨ̧. E shua ale nkàà nê, maa nkɨ tsě a èlu̧ Màsèdonìà ka kɨꞋɨ. 6Maa li tseke ba nɨ̧̀ ba te a teko àbɨ̂ŋ #16:6 Bɔɔ̀ ntɔ àfɨꞋa yu mbɨ̀ŋ nàa ngɨ̀ è me lu la ane ndɨ̧ ndɨk nê winter. aa tsě, mbɨ̀Ꞌɨ̀ bɨa tɨŋe am ane lèghȩ̀ȩ̀nè am etsǎ am maa ghǎ àdzìꞋ àgème màa nkɨ ghà la. 7Maa kà kɨ kɨꞋɨ tseke ba nɨ̧̀ ba wuê ane kètem àfɨ̀Ꞌ. Maà nkwàꞋtà kɨꞋɨ tseke ba nɨ̧̀ ba tè àfɨ̀Ꞌ aa nyaꞋa wu na Tè Yesò bɨ̧̀ɨ̧̀na la. 8Ka maa tseke a Efesɔ̀s tè àlia Pentekɔ̀s aa kɨꞋɨ, 9nkàà nê, èlu̧ e lâ ngàꞋa abua am maa ghɨ àfaꞋa ntsɔ̧̀, ka bɔmbù̧ e bɔ̂ me yaãaã.
10Tɔ̀màtià naa kɨꞋɨ bɨ me baãaã atò ntsɔ̧̀, nkàà nê, tà wua ngɨ̀à àfaꞋa Tè Yesò mbɨ̀Ꞌɨ̀ màa ngɨ̀à la. 11Ale, wòt ka ngwàa tò, ka bɨ̀ tɨŋe atò ntsaa tò tà ghȩ̀ȩ̀ne ane àlàŋkè, mè nkɨ̀Ꞌɨ̂ abua am nkàà nê, maà nchɨꞋa tò bɔ̂ bɔnyɨ ba ko bu.
12È me wu wanyɨ wa Àpolòs, ko mâ ŋwèta atò ngò̧ nyaŋ nyaŋ nê tà kɨꞋɨ bɔ̂ bòt Yesò ko bu ndzè àwɨ̧, ka a li à ka wu a èntɨ̧ɨ̧ tò nê tà kɨꞋɨ àfɨ̀Ꞌ yaa. Taa kɨꞋɨ àfɨꞋa èlu̧ e dzə a si la.
Èngà̧ enɨ lìa
13Bɨ̀ me ko awɨ̧, ntɨ̧̀ɨ̧ ntsɔ̧̀ ane èntɨ̧ɨ̧ wɨ̧ wu bɨ zi ane Yesò la, ntɨ̧ɨ̧ mbɨ̀Ꞌɨ̀ mbâ̧ mè me kweele. 14Bɨ̀ me ghɨ àghɨ àgème nè èkɔŋ.
15Bɔnyɨ bɔ̧, bɨ ko nê Stefanàs bɔ̂ bòt lob zi wu bòt mbì a èbem Akayà bɔ li ndzì mèntɨ̧ɨ̧ mɔb ane Yesò, mè ŋà wɔb e me faꞋa ntɨ̀ŋa bòt Mbɔ̧ɔ̧mà la. 16Mâ shu̧u̧te awɨ̧ nê bɨ̀ me zə èwuu bòt baa, nè bòt ko tsa bɔ̀ɔ fɔta fàꞋà nè Stefanàs ba la. 17A taꞋa bɔ̌ am nê, Stefanàs bɔ̂ Fɔ̀tùnatùs nè Àkekùs e kɨꞋɨ̀ nkàà nê bɔ nɨ àdziꞋa yɨ̧ ndɨ̀ wu bɨ ntsě a si la. 18Bɔ zǐ èntɨ̧ɨ̧ am mbɨ̀Ꞌɨ̀ bɔ zì è wɨ̧ la. Bɨ̀ me zə ànəa èwuu bòt baa àa shua la.
19Bèchɔsì bu a Esìà la aa ntsàꞋtà wɨ̧. Àkwilà bɔ̂ Plìsilà nè ènɔ̧̂ bòt Mbɔ̧ɔ̧mà bu bɔ̀ɔ mbu̧u̧ta a lob yɔb la aa ntsàꞋtà wɨ̧ nè èkɔŋ bòt Mbɔ̧ɔ̧mà. 20Bòt Mbɔ̧ɔ̧mà bu bàgème àdzìꞋ yaa la aa ntsàꞋtà wɨ̧. Bɨ̀ taꞋa bɔnyɨ bɨ̧ bàgème ntsàꞋtè àwɔb mbɨ̀Ꞌɨ̀ bòt Mbɔ̧ɔ̧mà.
21Wu mmɔ̌ Pɔ̂l mâ nɨ àbu am mmɔ̌ mbɔŋ ka shɨ̀ mèntsàꞋte màa la.
22Wòt bakà wua nkɔ̀ŋkà Lefɨ̀Ꞌ, ndɔ̀ nɔ̀ŋke àtsəa tò. Lefɨ̀Ꞌ wa, kɨꞋɨ!
23Maà shù̧ù̧ta nê Yesò Lefɨ̀Ꞌ nyɨꞋte a ntsɔ̧̀ vi abua yɨ̧.
24Maà nkɔ̀ŋkà àwɨ̧ bɨ̀agème ndɨ̀ wu bà wu àghɨ yeamɔꞋ ane Yesò Klistò la. Àmèn.
ទើបបានជ្រើសរើសហើយ៖
1 Kɔlìn 16: mnf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2006, Cameroon Association for Bible Translation and Literacy