ꠁꠘ꠆ꠎꠤꠟ ৬: ꠞꠥꠝꠣꠘ 6
6
ꠉꠥꠘꠣꠞ ꠎꠤꠘ꠆ꠖꠦꠉꠤ ꠡꠦꠡ, ꠘꠄꠀ ꠎꠤꠘ꠆ꠖꠦꠉꠤꠞ ꠡꠥꠞꠥ
1ꠔꠦ ꠅꠈꠘ ꠀꠝꠞꠣ ꠅꠟꠣ ꠇꠁꠔꠣꠝ ꠘꠤ, ꠀꠝꠞꠣꠞ ꠃꠙꠞꠦ ꠎꠣꠔꠦ ꠀꠟ꠆ꠟꠣꠞ ꠞꠢꠝꠔ ꠀꠞꠅ ꠛꠣꠠꠦ, ꠄꠞꠟꠣꠉꠤ ꠀꠝꠞꠣ ꠀꠞꠅ ꠉꠥꠘꠣ ꠇꠞꠣꠔ ꠞꠁ? 2ꠘꠣꠃꠎꠥꠛꠤꠟ꠆ꠟꠣ, ꠝꠥꠐꠦꠃ ꠘꠣ! ꠉꠥꠘꠣꠞ ꠛꠣꠛꠔꠦ ꠀꠝꠞꠣ ꠔ ꠝꠞꠤꠉꠦꠍꠤ, ꠔꠦ ꠁ ꠝꠥꠞ꠆ꠖꠣ ꠢꠣꠟꠔꠦ ꠅꠈꠘ ꠀꠞ ꠇꠦꠝꠘꠦ ꠉꠥꠘꠣꠞ ꠇꠣꠝꠅ ꠞꠁꠔꠣꠝ? 3ꠀꠁꠌ꠆ꠍꠣ, ꠀꠝꠞꠣ ꠎꠔ ꠎꠘꠦ ꠀꠟ-ꠝꠍꠤꠞ ꠘꠣꠝꠦ ꠔꠃꠛꠣꠞ ꠉꠥꠍꠟ ꠇꠞꠍꠤ, ꠀꠝꠞꠣ ꠔ ꠔꠣꠘ ꠝꠃꠔꠞ ꠟꠉꠦꠅ ꠡꠞꠤꠇ ꠅꠁꠍꠤ। 4ꠅꠃ ꠉꠥꠍꠟꠞ ꠇꠣꠟꠅ ꠀꠝꠞꠣꠞꠦ ꠔ ꠀꠟ-ꠝꠍꠤꠞ ꠟꠉꠦ ꠇꠄꠛꠞ ꠖꠦꠅꠀ ꠅꠁꠍꠦ। ꠀꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠔꠣꠘ ꠝꠢꠣ ꠇꠥꠖꠞꠔꠦ ꠀꠟ-ꠝꠍꠤꠞꠦ ꠎꠦꠟꠣ ꠇꠄꠛꠞ ꠕꠣꠇꠤ ꠎꠤꠘ꠆ꠖꠣ ꠇꠞꠤ ꠔꠥꠟꠍꠂꠘ, ꠑꠤꠇ ꠅꠃꠟꠣ ꠀꠝꠞꠣꠅ ꠎꠣꠘꠥ ꠘꠄꠀ ꠎꠤꠘ꠆ꠖꠦꠉꠤꠄ ꠖꠤꠘ ꠇꠣꠐꠣꠁ। 5ꠀꠞ ꠀꠝꠞꠣ ꠎꠦꠛꠟꠣ ꠀꠟ-ꠝꠍꠤꠞ ꠝꠃꠔꠅ ꠡꠞꠤꠇ ꠅꠁꠍꠤ, ꠔꠦ ꠔꠣꠁꠘ ꠎꠦꠟꠣ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠍꠂꠘ, ꠅꠟꠣ ꠀꠝꠞꠣꠅ ꠔꠣꠘ ꠎꠤꠘ꠆ꠖꠣ ꠅꠀꠞ ꠟꠉꠦ ꠡꠞꠤꠇ ꠞꠁꠝꠥ। 6ꠀꠝꠞꠣ ꠁꠈꠣꠘ ꠎꠣꠘꠤ, ꠀꠝꠞꠣꠞ ꠡꠞꠤꠟꠞ ꠛꠖ ꠈꠣꠁꠡꠞꠦ ꠛꠦꠇꠣꠝꠣ ꠇꠞꠣꠞ ꠘꠤꠅꠔꠦ ꠀꠝꠞꠣꠞ ꠙꠥꠞꠣꠘ ‘ꠀꠝꠤ’ꠞꠦ ꠀꠟ-ꠝꠍꠤꠞ ꠟꠉꠦ ꠍꠟꠤꠛꠞ ꠃꠙꠞꠦ ꠝꠣꠞꠤꠀ ꠚꠣꠟꠣꠁꠟ ꠅꠁꠍꠦ, ꠎꠣꠔꠦ ꠀꠝꠞꠣ ꠀꠞ ꠉꠥꠘꠣꠞ ꠉꠥꠟꠣꠝ ꠘꠣ ꠞꠁ। 7ꠇꠣꠞꠘ ꠎꠣꠞ ꠝꠃꠔ ꠅꠁꠎꠣꠄ, ꠢꠦ ꠔ ꠉꠥꠘꠣꠞ ꠇꠛꠎꠣ ꠕꠣꠇꠤ ꠈꠣꠟꠣꠍ ꠙꠣꠁꠟꠤꠍꠦ। 8ꠔꠦ ꠀꠟ-ꠝꠍꠤꠞ ꠟꠉꠦ ꠎꠦꠛꠟꠣ ꠀꠝꠞꠣꠞ ꠝꠞꠘ ꠅꠁꠍꠦ, ꠅꠈꠘ ꠀꠝꠞꠣꠞ ꠁꠝꠣꠘ ꠅꠁꠟ, ꠔꠣꠘ ꠟꠉꠦ ꠎꠤꠘ꠆ꠖꠦꠉꠤꠅ ꠙꠣꠁꠝꠥ।
9ꠀꠝꠞꠣ ꠎꠣꠘꠤ, ꠀꠟ-ꠝꠍꠤ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠤꠍꠂꠘ ꠇꠞꠤ ꠔꠣꠘ ꠀꠞ ꠝꠃꠔ ꠅꠁꠔ ꠘꠣꠄ। ꠝꠃꠔꠞ ꠇꠥꠘꠥ ꠈꠦꠝꠔꠣ ꠔꠣꠘ ꠃꠙꠞꠦ ꠘꠣꠁ। 10ꠀꠍꠟꠦ ꠔꠣꠘ ꠎꠦ ꠝꠃꠔ ꠅꠁꠍꠦ, ꠁꠔꠣ ꠔ ꠉꠥꠘꠣꠞ ꠈꠦꠝꠔꠣ ꠛꠤꠘꠣꠡ ꠇꠞꠣꠞ ꠟꠣꠉꠤ ꠈꠣꠟꠤ ꠄꠇꠛꠣꠞꠃ ꠅꠁꠍꠦ। ꠀꠞ ꠅꠈꠘ ꠔꠣꠘ ꠎꠦ ꠎꠤꠘ꠆ꠖꠦꠉꠤ ꠀꠍꠦ, ꠁꠐꠣ ꠔ ꠀꠟ꠆ꠟꠣꠞ ꠝꠢꠤꠝꠣꠞ ꠟꠣꠉꠤ ꠎꠤꠘ꠆ꠖꠣ ꠀꠍꠂꠘ। 11ꠑꠤꠇ ꠅꠃꠟꠣ, ꠔꠥꠝꠞꠣꠅ ꠝꠘꠅ ꠇꠞꠤꠅ, ꠉꠥꠘꠣꠞ ꠈꠦꠝꠔꠣꠞ ꠛꠦꠙꠣꠞꠦ ꠔꠥꠝꠞꠣꠞ ꠝꠞꠘ ꠅꠁꠉꠦꠍꠦ, ꠅꠈꠘ ꠈꠣꠟꠤ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠀꠟ꠆ꠟꠣꠞ ꠝꠢꠤꠝꠣꠞ ꠟꠣꠉꠤ ꠎꠤꠘ꠆ꠖꠣ ꠀꠍ।
12ꠄꠞꠟꠣꠉꠤ ꠝꠃꠔꠞ ꠎꠥꠇꠣ ꠔꠥꠝꠞꠣꠞ ꠁ ꠡꠞꠤꠟꠞ ꠃꠙꠞꠦ ꠉꠥꠘꠣꠞꠦ ꠇꠥꠘꠥ ꠟꠣꠈꠣꠘ ꠛꠦꠐꠣꠉꠤꠞꠤ ꠇꠞꠔꠦ ꠖꠤꠅ ꠘꠣ, ꠡꠞꠤꠟꠞꠦ ꠛꠖ ꠈꠣꠁꠡꠞ ꠀꠔꠅ ꠡꠙꠤ ꠖꠤꠅ ꠘꠣ। 13ꠡꠞꠤꠟꠞ ꠇꠥꠘꠥ ꠅꠋꠉꠞꠦ ꠛꠖ ꠇꠣꠝꠞ ꠀꠔꠤꠀꠞ ꠛꠣꠘꠣꠁꠅ ꠘꠣ। ꠛꠞꠋ ꠘꠤꠎꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠀ ꠎꠘ ꠝꠘꠅ ꠇꠞꠤꠀ ꠙꠥꠞꠣꠙꠥꠞꠤ ꠀꠟ꠆ꠟꠣꠞ ꠀꠔꠅ ꠡꠙꠤ ꠖꠦꠅ, ꠡꠞꠤꠟꠞ ꠢꠇꠟ ꠅꠋꠉꠞꠦ ꠘꠦꠇ ꠇꠣꠝꠞ ꠀꠔꠤꠀꠞ ꠢꠤꠡꠣꠛꠦ ꠀꠟ꠆ꠟꠣꠞ ꠘꠣꠝꠦ ꠛꠤꠟꠣꠁ ꠖꠦꠅ। 14ꠔꠥꠝꠞꠣ ꠔ ꠉꠥꠘꠣꠞ ꠉꠥꠟꠣꠝ ꠘꠣꠄ, ꠡꠞꠤꠅꠔꠞ ꠀꠅꠔꠣꠄꠅ ꠘꠣꠄ, ꠈꠣꠟꠤ ꠀꠟ꠆ꠟꠣꠞ ꠞꠢꠝꠔꠞ ꠔꠟꠦ ꠀꠍ।
15ꠔꠦ ꠅꠈꠘ ꠇꠤꠔꠣ ꠇꠞꠔꠣꠝ? ꠡꠞꠤꠅꠔꠞ ꠀꠅꠔꠣ ꠕꠣꠇꠤ ꠍꠣꠠꠣ ꠙꠣꠁꠀ, ꠀꠟ꠆ꠟꠣꠞ ꠞꠢꠝꠔꠞ ꠀꠅꠔꠣꠄ ꠀꠍꠤ ꠇꠞꠤ, ꠀꠝꠞꠣ ꠈꠣꠟꠤ ꠉꠥꠘꠣ ꠇꠞꠔꠣꠝ ꠘꠤ? ꠘꠣꠃꠎꠥꠛꠤꠟ꠆ꠟꠣ, ꠝꠥꠐꠦꠃ ꠘꠣ! 16ꠔꠥꠝꠞꠣ ꠛꠥꠎ ꠘꠣ ꠘꠤ, ꠔꠥꠝꠞꠣ ꠎꠦꠛꠟꠣ ꠘꠤꠎꠞꠦ ꠇꠦꠃꠞꠞ ꠀꠔꠅ ꠡꠙꠤ ꠖꠤꠀ ꠔꠣꠞ ꠢꠥꠇꠥꠝ ꠝꠣꠚꠤꠇ ꠌꠟ, ꠔꠦ ꠄꠝꠘꠦꠃ ꠔ ꠔꠣꠞ ꠉꠥꠟꠣꠝ ꠛꠘꠤꠎꠣꠅ। ꠅꠟꠣꠈꠣꠘ ꠔꠥꠝꠞꠣ ꠢꠄꠔ ꠉꠥꠘꠣꠞ ꠉꠥꠟꠣꠝ ꠛꠘꠤꠀ ꠝꠞꠛꠣꠄ, ꠀꠞꠘꠣꠄ ꠀꠟ꠆ꠟꠣꠞ ꠉꠥꠟꠣꠝ ꠛꠘꠤꠀ ꠘꠦꠇ ꠇꠣꠝ ꠇꠞꠛꠣꠄ। 17ꠀꠟ꠆ꠟꠣ ꠙꠣꠇꠞ ꠡꠥꠇꠥꠞ, ꠀꠉꠦ ꠎꠥꠖꠤꠅ ꠔꠥꠝꠞꠣ ꠉꠥꠘꠣꠞ ꠉꠥꠟꠣꠝ ꠀꠍꠟꠣꠄ, ꠔꠣ-ꠅ ꠁꠍꠣꠄꠁ ꠔꠞꠤꠇꠣꠞ ꠔꠣꠟꠤꠝ ꠙꠣꠁꠀ ꠢꠣꠞꠤ, ꠖꠤꠟꠦ-ꠎꠣꠘꠦ ꠁꠔꠣꠞ ꠀꠡꠤꠇ ꠅꠁꠍ। 18ꠉꠥꠘꠣꠞ ꠉꠥꠟꠣꠝꠤ ꠕꠣꠇꠤ ꠍꠣꠠꠣ ꠙꠣꠁꠀ, ꠘꠦꠇ ꠇꠣꠝꠞ ꠉꠥꠟꠣꠝ ꠅꠁꠍ।
19ꠜꠣꠁꠀꠁꠘꠞꠦ, ꠔꠥꠝꠞꠣꠞ ꠀꠈꠟꠞ ꠇꠝꠎꠥꠞꠤ ꠖꠦꠈꠤꠀ ꠀꠝꠤ ꠔꠥꠝꠞꠣꠞ ꠟꠉꠦ ꠝꠣꠘꠥꠡ ꠛꠥꠟꠤꠄ ꠝꠣꠔꠤꠞꠣꠝ, ꠀꠉꠦ ꠎꠦꠟꠣ ꠔꠥꠝꠞꠣꠞ ꠡꠞꠤꠟꠞ ꠅꠋꠉꠞꠦ ꠘꠣꠙꠣꠇꠤ ꠀꠞ ꠛꠖ ꠈꠣꠁꠡꠞ ꠉꠥꠟꠣꠝ ꠛꠣꠘꠣꠁꠍꠟꠣꠄ, ꠅꠈꠘꠅ ꠑꠤꠇ ꠅꠃꠟꠣ, ꠙꠣꠇ-ꠙꠛꠤꠔ꠆ꠞ ꠎꠤꠘ꠆ꠖꠦꠉꠤ ꠇꠣꠐꠣꠘꠤꠞ ꠟꠣꠉꠤ, ꠎꠣꠞꠎꠤꠞ ꠅꠋꠉꠞꠦ ꠘꠦꠇ ꠇꠣꠝꠞ ꠉꠥꠟꠣꠝꠤꠔ ꠡꠙꠤ ꠖꠦꠅ।
20ꠔꠥꠝꠞꠣ ꠎꠦꠛꠟꠣ ꠉꠥꠘꠣꠞ ꠉꠥꠟꠣꠝ ꠀꠍꠟꠣꠄ, ꠁ ꠡꠝꠄ ꠔ ꠘꠦꠇ ꠇꠣꠝꠞ ꠖꠣꠄ-ꠖꠣꠄꠁꠔ꠆ꠔ ꠕꠣꠇꠤ ꠀꠎꠣꠖ ꠀꠍꠟꠣꠄ। 21ꠀꠉꠞ ꠛꠖ ꠇꠣꠝ-ꠇꠣꠎꠞ ꠇꠕꠣ ꠝꠘꠅ ꠅꠁꠟꠦ ꠅꠈꠘ ꠔꠥꠝꠞꠣꠞ ꠡꠞꠝ ꠟꠣꠉꠦ, ꠔꠦ ꠇꠅ ꠌꠣꠁꠘ, ꠁꠔꠣ ꠇꠣꠝꠦ ꠔꠥꠝꠞꠣꠞ ꠇꠤꠔꠣ ꠟꠣꠜ ꠅꠁꠔ? ꠁꠔꠣꠞ ꠢꠦꠡ ꠚꠟ ꠔ ꠝꠞꠘ। 22ꠅꠁꠟꠦ ꠅꠈꠘ ꠔꠥꠝꠞꠣ ꠉꠥꠘꠣꠞ ꠉꠥꠟꠣꠝꠤ ꠕꠣꠇꠤ ꠀꠎꠣꠖ ꠅꠁꠀ, ꠀꠟ꠆ꠟꠣꠞ ꠙꠕꠞ ꠉꠥꠟꠣꠝ ꠛꠘꠤꠀ ꠙꠣꠇ-ꠙꠛꠤꠔ꠆ꠞ ꠎꠤꠘ꠆ꠖꠦꠉꠤ ꠇꠣꠐꠣꠁꠞꠣꠄ, ꠄꠞ ꠢꠦꠡ ꠚꠟ ꠔ ꠀꠈꠦꠞꠤ ꠎꠤꠘ꠆ꠖꠦꠉꠤ। 23ꠀꠍꠟꠦ ꠉꠥꠘꠣꠞ ꠝꠎꠥꠞꠤ ꠅꠁꠟ ꠝꠃꠔ, ꠅꠁꠟꠦ ꠀꠟ꠆ꠟꠣꠞ ꠞꠢꠝꠔꠞ ꠖꠣꠘ ꠅꠁꠟꠉꠤ ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠈꠦꠞꠤ ꠎꠤꠘ꠆ꠖꠦꠉꠤ।
ទើបបានជ្រើសរើសហើយ៖
ꠁꠘ꠆ꠎꠤꠟ ৬: ꠞꠥꠝꠣꠘ 6: sylN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Ahle Kitab Society. All rights reserved.
