Génesis 1
1
Are kunchjian kain
1Are nakuexinxion beꞌe kain, Ndo Dio binchechjian ngajni ko nunthe. 2Ko nunthe beꞌa nunthe inchin jii nunthe ko xruꞌin bechunda, ko thi naxin xeꞌe beꞌe bakejanthe nguii thi xraa ndachaon anto niꞌnga, ko Espiritue Ndo Dio bakingi ngatauꞌen jinda.
3Ko ndachro Ndo Dio: «Rinaꞌo singasaan.»
Ko thi dingasaan kununxinbeꞌo. 4Ko Ndo Dio bikon ixin thi dingasaan jaan, jian. Kuthimejan bantsjendeꞌe choo thi dingasaan ko thi naxin xeꞌe. 5Ndo Dio binchegiꞌin thi dingasaan, «nchaꞌon», ko thi naxin xeꞌe binchegiꞌin, «thi̱e». Ko batho thi̱e ko bingasaan, ko jañaa xethja thi nchaꞌon saꞌo.
6Kuthimejan ndachro Ndo Dio: «Ncho, deꞌe naa thi tsunchjeeya ko rukeꞌe jinda.»
Ko jañaa nchao ruchjeeya jinda. 7Ko kunchjianbeꞌo thi kunchjeeya ko keꞌe jinda. Ko jañaa chjeeya nda, nda bithuꞌe ngataꞌa thi keꞌe nda, ko nda bithuꞌe chringindeꞌe thi keꞌe nda, ko jañaa kuꞌen. 8Thi kunchjeeya ko keꞌe jinda, Ndo Dio binchegiꞌin «ngajni». Ko batho thi̱e ko bingasaan, ko jañaa xethja thi nchaꞌon yuxin.
9Kai ndachro Ndo Dio: «Kain jinda jii chringi ngajni nakua ncho xratse nda. Ko ncho tununxin nche xema.»
Ko jañaa kuꞌen. 10Ko thi xema Ndo Dio binchegiꞌin «nunthe», ko jinda xratse binchegiꞌin Ndo «ndachaon».
Ko Ndo Dio bikon Ndo ixin jaan, jian. 11Kuthimejan ndachro Ndo: «Ncho duan ka yua ngataꞌa nunthe, kain ka dajon tsee, ko kain nthaa dajon thuchjuin kunixin tsee.»
Ko jañaa kuꞌen. 12Nunthe bajon kain ka yua, kain ka dajon tsee, ko kain nthaa dajon thuchjuin kunixin tsee. Ko Ndo Dio bikon ixin jaan, jian. 13Ko batho thi̱e ko bingasaan, ko jañaa xethja thi nchaꞌon ninxin.
14Ko ndachro Ndo Dio: «Ncho tununxin tsjé xruꞌi nthiꞌa ngajni ixin santsjenda thi̱e ko thi dingasaan; ko kai yaa tsjaago are ruxethja nchaꞌon, are thii thi xema, thi yua, chrin ko kin ngaa nano. 15Ko xruꞌi te nthiꞌa ngajni sinchengasaan ngataꞌa nunthe.»
Ko jañaa kuꞌen. 16Ndo Dio binchechjian yoo xruꞌi jié nchengasaan, ko xruꞌi icha jié sinchengasaan ngain nchaꞌon, ko inaa xruꞌi sinchengasaan ngain thi̱e. Ko kai binchechjian Ndo kunutse. 17Ko Ndo Dio bakeꞌe Ndo xruꞌi teꞌi nthiꞌa ngajni ixin sinchengasaan ngataꞌa nunthe 18ngain nchaꞌon ko ngain thi̱e, ko bantsjendeꞌe choo thi dingasaan ko thi naxin xeꞌe. Ko Ndo Dio bikon ixin jaan, jian. 19Ko batho thi̱e ko bingasaan, ko jañaa xethja thi nchaꞌon nunxin.
20Ko ndachro Ndo Dio: «Ngain ndachaon, ncho tununxin kain thi jichon ngain nda, kai ngain nunthe, ncho tununxin ku tjaganga nguii ngajni.»
21Kai binchechjian Ndo kuxiigo anto yeye te chringi ndachaon, ko binchechjian Ndo kain kuxiigo techon ko thingi ngangi nda ko kain kuxiigo tjaganga, ko bikon Ndo Dio ixin jaan, jian.
22Ko Ndo Dio binchenchaon ba ko ndachro Ndo: «Nchian choo ra ko nchetsjé choo ra ko nchekaon ra ndachaon, ko sinchetsjé choo kain kuxiigo tjaganga ngain nunthe.»
23Ko batho thi̱e ko bingasaan, ko jañaa xethja thi nchaꞌon naunxin.
24Ko ndachro Ndo Dio: «Nunthe ncho dajon kain thi jichon: Kuxiigo chrjikua ko te ngagaꞌa jna, kuxiigo nchekjanii ni ngain nchia, kunchee ko kain kuxiigo thingajintaon tseꞌe nunthe.»
Ko jañaa kuꞌen. 25Ko Ndo Dio binchechjian kain kuxiigo: Kuxiigo chrjikua ko te ngagaꞌa jna, kuxiigo nchekjanii ni ngain nchia, kain kuxiigo thingajintaon tseꞌe nunthe ko icha kuxiigo. Ko Ndo Dio bikon ixin jiꞌi jaan, jian.
26Ko ndachro Ndo Dio: «Nthuchjian ná xii inchin jaꞌan ná, ko tsetuꞌen kuchee te ngain ndachaon, kain kuxiigo tjaganga, ko tsetuꞌen kuxiigo chrjikua ko te ngagaꞌa jna ko kuxiigo nchekjanii na̱ ngain nchia, ko kain kuxiigo thingajintaon tseꞌe nunthe.»
27Ko Ndo Dio binchechjian xii
inchin jeꞌe Ndo, jañaa inchin jeꞌe Ndo kunchjian xa;
xii ko nchrii binchechjian Ndo.
28Ko Ndo Dio binchenchaon ko ndachro Ndo:
«Dinthechunda ra tsjé chjan ko nchetsjé choo ra
ko nchekaon ra nunthe ko thetuꞌan ra ngain nunthe,
ko thetuꞌen ra kain kuchee jii ngain ndachaon, kain kuxiigo tjaganga ngajni
ko kain kuxiigo thingi ngataꞌa nunthe.»
29Kai ndachro Ndo Dio: «Tsjeꞌe ra, jaꞌan chjaꞌa ra kain ka dajon tsee jii ngataꞌa nunthe, ko kain nthaa dajon thuchjuin ko tsee ixin sinthe ra. 30Ko kain kuxiigo te ngataꞌa nunthe, kain kuxiigo tjaganga ko kain kuxiigo thingajintaon tseꞌe nunthe sine ba ka yua.»
Ko jañaa kuꞌen. 31Ko bikon Ndo Dio kain thi binchechjian Ndo, ¡anto chrjuin jii! Ko batho thi̱e ko bingasaan, ko jañaa xethja thi nchaꞌon inkjaunxin.
ទើបបានជ្រើសរើសហើយ៖
Génesis 1: plsNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2017, Wycliffe Bible Translators, Inc. All rights reserved.