2 Corinthians 3
3
Alġaqsruiriksraqtaat Tusaayugaaġiksuamik
1Isumanasi uvamnun uqautitqiksaġasugalusi uvagut nalliumatiniḷuta akuqtuusiaksraptiŋnun ilivsiññiñ. Tuyuutinik piqaqtuksrauvisa iñuich allat aglaaŋiññik akuqtuġnaqsiḷiġutiksraptiŋnik ilivsiññun, naagga ilivsi tuyuutivsiññik allanun akuqtuitqutinik uvaptiŋnik? 2Naumi. Ilivsi Corinth-mi ukpiqtuaguruasii tuyuutitun ittusi, iḷisimanaqsisiksrat nalupqinaiġḷugu kisuutilaaptiŋnik. Qanuq allaŋŋuqtauŋaruat iñuutchisi iñupayaat qiñillagaich, 3#Ex 24.12; Jr 31.33; Ez 11.19; 36.26.aasii allaŋŋuqtauruatigun iñuutchivsigun iḷisimanaqtitkiksi ilivsi itilaaqsi tuyuutitun aglaaŋisun Christ, uvagut alġaqsruiñiptigun ilivsiññun. Tuyuutitun inŋitchusi aglaaguruatun misuktautitaqługich, aglaan Ilitqusiġiksuaŋagun iñuuruam God-im. Kamaginiataŋitkisi pitqurat titiqtuurrat saapaqayaamun uyaġaŋmun, aglaan iñuuvlusi God aglaŋaruatun iḷivḷugu pitquramiñik uummativsiññun.
4Tavra allaŋŋuqtauŋaruat iñuutchivsi nalupqisuŋisitkaanŋa, alġaqsruiñiġa akuqtuġnaqtilaaŋanik God-mun Christ ikayuqłuŋa. 5Isumanaqsiḷiġuŋitkiga uvaptuġruiññaq piḷḷasiñasugalugu iñiqsiñiq tainnatchimik savaamik. God-im suaŋŋasiqsuġaaŋa, 6#Jr 31.31.nalliummatillasivḷuŋa alġaqsruutigiyumiñaqługu God-im nutauruaq sivunniuġutaa iñuich annagniksraŋatigun. Taamna nutauruaq sivunniuġun inŋitchuq utuqqaqtun sivunniuġutitun, aglausimaruatitun pitqurani, tuqqunmik tatavsautiqaqtuatun kamaksriŋitchuni. God-im nutauruaq sivunniuġutaa iñuggutauruq isuitchuamun Ilitqusiġiksuakun.
7 #
Ex 34.29. Utuqqauruaq sivunniuġun titiqtuurrauŋaruq uyaġaŋmun, aasii iñuich iḷitchuġipkaqługich piḷuutautilaaŋanik kamaksriŋiññiq God-mik aasii tuqqutaullavluni. God-im aitchuutigiŋagaa qaumaniqpaqaqługu Moses unnii kiiñaŋa qiŋŋaġnaqsiŋaruq Israel-guruanun qiñilgunaiqsaallaan. Taamnaasii qaumaniqpak nalunaqsiñasuaŋammiuq. 8Aasiiḷi igḷuani, qaummaġił̣haasugruktuaq piqatauruq nutauruamun sivunniuġunmun, qanuq Ilitqusiġiksuam itqanaiyaġai iñuich iñuuniksraŋannun qiḷaŋmi. 9Iñuich aliuŋarut tautukamirruŋ qaumaniqpak utuqqauruaq sivunniuġun aitchuutaumman, iḷitchuġipkaġmatiŋ suksraunġiqsauniksramik. Qanutułhaaq aliuġnaqtigiruq nutauruaq sivunniuġun iḷitchuġipkairuaq iñuŋnik nalaunŋasipkaqtauyumiñaqtilaaŋannik sivuġaani God-im. 10Aasiisuli nutauruaq sivunniuġun qanutupayauraq aliuġnałhamaaqtigiruq utuqqauruamiñ sivunniuġunmiñ, utuqqauruaq sivunniuġun iḷiḷḷavlugu aliuġnautiqaŋaitchuatun qaŋaunnii. 11Qanuq utuqqauruaq sivunniuġun isukłiñŋaruaq aliuġnaŋakpan, nutauruaq sivunniuġun isukłitchumiñaitchuaq aliuġnałhamaaqtuksrauruq.
12Uvagut iḷisimavlugu God-im nutauruaq sivunniuġutaa isukłitchumiñaisilaaŋanik, minitchiḷuta iḷaŋanik alġaqsruiŋitchugut. 13#Ex 34.33.Moses-tun piŋitchugut matutuliqsuatun kiiññamiñik Israel-guruat tautuquŋił̣ł̣ugich qaumanini nalunaqsisaiññaqtilaaŋanik. 14Iliŋich kaŋiqsiḷaiñŋarut, qanuq uvlupak-unnii taiguaqamiŋ God-im utuqqauruamik sivunniuġutaanik, kaŋiqsiḷaitchut simmausiŋatilaaŋanik ilaan nutauruamik sivunniuġutaanik Christ-kun. Taamna ittuq Moses-gum taalutaqtuutaatun piiŋaitchuatun suli. Kisianik ukpiliġmata Christ-mun taamna taalutaq piiqsausuuruq. 15Aaŋ, uvlupaŋmun-aglaan isumaŋich taalutaqtuqtuatun suli ittut naalaġnikamisigik Moses aglaaŋi, iñuum taiguaġmagich. 16#Ex 34.34.Aglaan iñuk mumikami Ataniġmun kaŋiqsisuuruq, taalutaq piiġmatun isumaŋaniñ. 17Atanġum tavrani sivuniġigaa Ilitqusiġiksuaq aitchuiruaq iñuggunmik, aasii Ilitqusiġiksuaq iñuŋmiinman, taamna iñuk atanniqsimaraitchuq. 18Tavraasii uvagut ukpiqtuaguruaguut taalutaitchugut iriġumiñaġluta Atanġum qiḷaŋmiŋŋaqtauruamiñ qaumanġaniñ. Uvagut qiñiqtuiññaqaptigu Ataniq ukpiġutikun, allaŋŋuqtuaqtugut ilaatun iḷisaiññaqłuta, suli Atanġum Ilitqusiġiksuaŋata kiikaa iḷisaiññaqtitkaatigut ilaatun.
ទើបបានជ្រើសរើសហើយ៖
2 Corinthians 3: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)