2 Corinthians 2
2
1Sivunnipiaŋaruŋa isumaaġnaqtuakun ullatqiguŋił̣ł̣usi. 2Qanuq uvaŋa quviasuutaiqsitkuvsi, allamik iñuŋmik quviasaaqtiksraitchuŋa ilivsi quviasuutaiqsittaġma quviasaaŋisuaġuvsiŋa. 3Suli tuyuŋaruŋa aqulliġñi tuyuutimni tainna tuyuusivsun, isumaat chaktitquŋił̣ł̣uŋa ilivsiññun ullakkuvsi quviatchaktitiksramnun, qanuq nalupqisuŋitchuŋa quviasuunma quviatchaktinniaġmigaasi. 4Tuyuqavsi, iłuiḷḷiupiaġataŋaruŋa isumaaqłuŋalu iḷumni, qiaŋaruŋaunnii, mamiatchaquŋitkivsi aglaan iḷisimatqugivsi qanutupayauraq piviuttaġitilaavsiññik.
Suliqutigiŋaiġun Piḷuksiruamun
5Aglaan taavruma iñuum isumaalluksairuam kisima isumaaqtinŋaitkaaŋa, aglaattauq ilivsi isumaaqtitaŋammigaasi, tunikłisaqługu uqallausiġigiga. 6Taamna iñuk naamaruamik tatavsausiaqaaniktuq atisivḷusi naġġuksruqavsiuŋ. 7Tavraasii paŋmapak suliqutigiŋaigaksraġigiksi itqaumaŋaiġḷugu killuliqiaŋa, aasii qapiŋaisaaġlugu payaritquŋiḷḷugu mamiatchaunmun igḷutuġumiñaiġḷugu tatavsausiani. 8Tavraasii iŋiulagivsi tuniqsiḷaatqiquvlugu piviuttaqqutiksi ilaanun. 9Taamnalu pisigivlugu tuyuŋagivsi, uvaŋa uuktuaġukłusi iḷitchuġisaġluŋa kamakkutiqaġniaqtilaavsiññik supayaakun. 10Kialiqaa killuliqiaŋa suliqutigiŋaikkaqsi itqaumaŋaiqł̣ugu, uvaŋaptauq suliqutigiŋaiġmigiga itqaumaŋaiqł̣ugu. Suliqutigiŋaiŋagupku killuliqun itqaumayumiñaiġḷugu, suliqutigiŋaiġiga pisigivlusi, suli pisivlugu Christ. 11Pitchaiḷisaqługu Tuunġaq atiqaqtuaq Satan-mik akimmatiksraŋaniñ uvaptiŋniñ, qanuq naluŋiñmigivut ilaan piraġausiŋi.
Paul Piŋiksraqtuq Troas-mi
12 #
Ac 20.1. Tikiññama Troas-mun alġaqsruutigisukługu tusaayugaaġiksuaq Christ-kun, Atanġum piviksriñŋagaaŋa alġaqsruitquvluŋa, 13aglaan isumaga tutqiksiḷḷaiŋaruq paqinŋiññapku aniqatiga Titus tavrani. Tavraasii qimaŋagitka aasii iglauvluŋa Macedonia-mun.
Christ Akimmatauruq
14Aglaan God quyyavigirauli ataramik akimapkairuaq uvaptiŋnik pisigivlugu atausiŋŋuqatauŋaniqput Christ-lu, suli tilisiruaq uvaptiŋnik sumulliqaa, quliaqtuaġutitquvlugich iñuich Christ-mik. 15Qanuq iviġakkikput God alġaqsruutigikaptigu Christ akunġanni iñupayaat, tamatkua annaurrauniaqtuallu suksraunġiqsauniaqtuallu. 16Tamatkua suksraunġiqsauniaqtuat qanuqpisiiḷḷivḷugich tuquniksraŋannun piḷuusiqiraulutiŋ, tamatkuali annaurrauniaqtuat attaqsraŋaivsaaqługich iñuggunmik isuitchuamik. Kiña nalliummativa alġaqsruutigiyumiñaqługu tusaayugaaġiksuaq? 17Kisimiŋ tamatkua uvaptiktun ittuat, alġaqsruiruat piŋŋuaġutaitchuakun, nalunaiqsaŋi God-im, alġaqsruiruat iḷumun ittuamik Christ-kun, God-im takkuani pimmatun. Uvagut inŋitchugut allatun iñugiaktuatun iñuktitun alġaqsruiruatun God-im uqaluanik iḷumun inŋaiqł̣ugu, maniññagniutigigiññaqługu.
ទើបបានជ្រើសរើសហើយ៖
2 Corinthians 2: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)