SIRAC 17
17
1Insan minoli na Katawan ed dabuk iray totoo,
insan to pinapawil ed dabuk so balang sakey ed sikara.
2Initdan to ray agetaran a panaon na pambilay,
balet initdan to ray pakaoley ed amin a bengatla diad tapew na dalin.
3Ginawa to ran kaolibay to,
tan inter tod sikara so dilin pakayari to.#17:3 Say sankanayarian a tiksto to; diad tikston Grigo da.
4Ginawa ton antakot ed sikara iray amin ya arum a pinalsa;
initdan to ray pakaoley ed amin ya ayep tan amin a manok.#17:4 Inyarum na pigaran manuskrito so birsikulo 5: Initdan ira na Katawan na limaran liknaan, balet inter to met ed sikara so kumanempanagtalus, tan say kumapitopanagnunot, a sikara yay makasengeg na pakapangipatalus dad saray onsabid sikara diad panamegley na saray liknaan da.
6Initdan to ra na kadilaan da, saray kamataan da,
saray kalayagan da, saray kanunotan da, tan saray konsinsia ra.
7Pinano to ra na pakaamta tan pakatalus
tan impanengneng tod sikara so pandomaay maung tan maoges.
8Inter tod sikara so dilin kakabatan to,
ta labay ton ipanengneng ed sikara so kagalangan na saray pinalsa to.#17:8 Inyarum na pigaran manuskrito so birsikulo 9: tan inabuloyan to ran mampasirayew ya anggad angga ed saray makapakelaw a gawgawa to.
10Idayew day masanton ngaran to
tan ibawag day inkatalonggaring na amin a gagawaen to.
11Ginawa toy pakaamta a nayarin gamuran da
tan initdan to ray Ganggan a panlalapwan na bilay.
12Akisipanan ed sikara ya ando lan ando
tan impaamta tod sikara iray ganggan to.
13Anengneng day kagalangan na katagyan to
tan nadngel day kagalangan na bosis to.
14Pinasakbayan to ra sumpad ag inkatonung
tan imbangat tod balang sakey a too no antoy kanepegan ton gawaen ed arum a totoo.
Huis so Dios
15Amta lawas na Katawan so gagawaen na saray totoo; anggapoy polaing a pakaamut ed sikato.#17:15 Inyarum na pigaran manuskrito iray birsikulo 16-17a: Manlapud impanogaw da maoges lawas so nagagawaan da; singa bato so kapusoan da, tan singa ag da nayarian a pagmaliwen a pusoy too. 17 Impansisian to ray bansa ed intiron mundo. 17Initdan to na manoley so balang bansa, balet kayaryan a dili na Katawan so Israel.#17:17 Inyarum na pigaran manuskrito so birsikulo 18: Pangulowan ya anak to so Israel a pinepetek to legan ton papabalegen. Iitdan to na liwawa na panangaro to tan ag ton balut ikakaindan. 19Babantayan lawas na Katawan so gagawaen na saray totoo; singa kaliwaway agew ed sikato so balang bengatlan gagawaen da. 20Anggapoy kasalanan dan akaamut ed sikato; amta to ran amin.#17:20 Inyarum na pigaran manuskrito so birsikulo 21: Balet mapangasi so Katawan tan amta to ray pinalsa to; kanyan ag to ra inkaindan no ag ingen impaliis to rad kaatapan. 22No mangiter tayod saray mairap-bilay, say Katawan ipasen ton singa mablin singsing. Mablin singa bilay ed sikato so panangasi na too. 23Sintinsiaan to naani iray maoges a totoo tan dusaen to ra; awaten day kanepegan da. 24Balet abuloyan na Katawan ya ompawil ed sikato iray magbabawi. Iitdan to lawas na biskeg na linawa iray nababalang day ilalo ra.
Say Tawag ed Pagbabawi
25Dago ka ed Katawan, tan taynan moy kasalanan mo. Masimoon ya ipikasim a tulongan to kan mambilay na lalon marakep. 26Pawil ka ed Sankatagyan tan ibeneg moy kasalanan. Bosulbosul moy kaogsan. 27Makapangiter na saray pisasalamat ed Katawan iray mabilay, balet makapankanta kasi na dayew ed Sankatagyan so siopaman a walad pasen a panaayaman da ray inaatey? 28Say toon mabilay tan mabiskeg et makapankanta na saray dayew ed Katawan, balet saray inatey, ya ag la ra mambibilay, et ag la ra makapangiter na pisasalamat ed Katawan. 29Agaylay kabaleg na mapangasin panamirdona na Katawan ed saray onsisingger ed sikato! 30Balet aliwan onya so inkatoo na saray totoo;#17:30 Balet totoo; odino Ag nayarin kayaryanen na saray totoo iray amin a bengatla. anggapod sikatayoy ag ompatey. 31Anggapoy maliwawa ni nen say agew, balet anggan say liwawa na agew et ag onsinag legay kalipsi. Agaylay inomay a nakalipsi na kaogsan so kanunotan na too! 32Say Katawan nanengneng ton amin iray bitewen ed tawen. Saray katoowan et dabuk tan dapul ira.
ទើបបានជ្រើសរើសហើយ៖
SIRAC 17: PnPV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Philippine Bible Society New Testament © 1977, Bible © 1983