1 Korintiyen 12
12
Əvəl na Əmpəs na Maŋgəlva
1Mula səm va əvəl na Əmpəs na Maŋgəlva adaw vəla milmiŋgiɗwa, nəŋgəl kəsənən gən wənnan lewlewi. 2Daga kəɓəl ətafən Ɗəfdaya tagay ɓa, matuya nokum tay kukum aza tuya məs awpel ɓa. 3Ndəni nəŋgəl kəsənən gən na: An Əmpəs na Maŋgəlva armak ɗəffa, ɗəf nan aɓapna ənah na: Zezu məray gəni ɓa. Vaski bo ɗəf aɓapna ənah na Zezu Ɗəfdayayi ɓa, say an əmpəs na Maŋgəlva taya makrani.
4Əvəl tay temtemi, amma əmpəs məs taka pak dədapsən ɗəffa. 5Wəza tay temtemi, amma Ɗəfdaya məs taka pak dəpsən tive sən ɗəf naɗɗani. 6Sembe naɗɗa wəza nan tay temtemi, amma Maŋgəlva məs takayi dədapsən ko naway va aza sembe nani. 7Əvəl na Əmpəs na Maŋgəlva tayərban səm azam taka taka pak ka dətər gən wəray azet kretiyenɗe nan pakə. 8Ɗəf maɓɓani əmpəs apsənək dəpel gən də maɗula, ɗəf maɓɓan bo apsənək dəpel gən də wəsəna. 9Ɗəf maɓɓani əmpəs tayəpsən ətaf an də sembe, ɗəf maɓɓan bo sembe naw mbəl git məs gbəgbaɗe. 10Ɗəf maɓɓan tamə tayəpsən sembe naɗɗe sokeneɗi, ɗəf maɓɓan bo sembe naɗɗa kleŋ. Ɗəf maɓɓan bo apsənək sembe nawɗakan Əmpəs na Maŋgəlva də əmpəs an ɗarə. Ɗəf maɓɓani əpel də ma məs məsəni ɓa, ɗəf maɓɓani əman ma məs məpelin. 11Amma əmpəs məs takayi pak dədaɗɗa wəza nani, tayəpsən ko naway pak va aza sembe nan va aŋgələ.
Gəɓa zə ɗəf taka dit zigeɗ azan temtem diiɗa
12Krestu tay gəɓa zən taka, məs dit zigeɗ azan temtem diiɗa. Gesiŋ gəɓa zən takayi, ko vi asan dit zigeɗ azan temtem zlaŋ takayi. 13Mənam pakə, Yahudiyenɗe dit ɗii məs Yahudiyenɗeŋ ɓa, balemɗe dit ɗii məs balemɗeŋ ɓa pakə, mərahək baptem də əmpəs məs taka naka, ka vi məsap gən adəv gəɓa zə ɗəf taka, mənam pak məkpaŋgək ɗii məsaaŋ əmpəs taka bo.
14Gəɓa zə ɗəf asana də zəga azan taka ɓa, say dit zigeɗ azan temtem diiɗa. 15Kuzuŋ tələn wanah na: Naw van nan ɓa, vini naw nəsap də gəɓa zən ɓa. Ɗə as pakə, gəɓa zə ɗəffəŋki. 16Walla sləman wanah na: Naw haran nan ɓa, vini naw nəsap də gəɓa zən ɓa. Də as pakə, atak na sləman dawsan zəga naza gəɓa zən ɓa. 17Va gəɓa zə ɗəf pak harani na, mbarmbari adawslereŋ di? Va gəɓa zə ɗəf pak sləmani na, mbarmbari adaw fokoŋ di? 18Yo Maŋgəlva asapetik zigeɗ naza gəɓa zə ɗəf pakə, ko awet di pak va aŋgələ. 19Va gəɓa zə ɗəf pak tay də zəga nazan taka kaaka'ə, asna gəɓa zə ɗəffi ɓa. 20Amma kakaŋ na, zigeɗ tahəŋ temtem diiɗa aza gəɓa zə ɗəf taka.
21Haran aɓapna ənahsən van na: Mi naw di'is di ɓa. Kiyən bo aɓapna ənahsən tələn na: Mi naw di'is di ɓa. 22Tay vas ɓa! Amma gəɓa zə ɗəf məs mədawla va mədakən, ndəni naw tər wəray day. 23Gəɓa zəm məs tahəŋ lew aram ɓa, aket mədazlga sləma day. Gəɓa zəm an na wili, mənam tatəɗɗemet də maɗulamə. 24Gəɓa zəm məs məŋgəl day net wəray tay naw ɗemet ɓa. Maŋgəlva asapanək gəɓa zən pakə, gəɓa zit məs məmeɗeŋɗe arəhaŋgək gakdak day pakə. 25Vi dəŋgəl əgay dəgəɗ gən awalaŋ gəɓa zən ɓa, amma dəsoŋ gən də əbaah sən ziti. 26An zəga naza gəɓa zə ɗəf taka nan tay də gbəgba'a, zigeɗ naza gəɓa zə ɗəf pak wasoŋ də gbəgba'a. An məgakdakani taka səmbeti, ndəɗaŋ pak wasoŋ zit nek dəndən.
27Munokum pak gəɓa zə Krestu kənanaŋ, ko naway pak səmbokum tay va zəga naza ɗəf asani. 28Ko naway pak Maŋgəlva apsənək wəza nan aweleŋgit kretiyenɗe: Dabəŋ masləŋɗe, ma sula'ən məs kleŋɗe, mohoketi məzərbanən zəga sit ɗiiyi, ɗii meɓɓet məɗɗaŋ sokeneɗi, ɗii meɓɓet məzu mbəl gitin məs gbəgbaɗe, gəm məzə baahaŋ sitin ɗiiyi, ɗii meɓɓet məsoŋ abet ɗiiyi, ɗii meɓɓet məpeleŋ də ma məs məsəni ɓa. 29Ɗii pakəŋ masləŋɗe ɓa, walla məs kleŋɗe ɓa, walla mərbaŋ zəgaŋ ɓa. Ɗii pakəŋ məɗɗaŋ sokeneɗ ɓa, 30walla məmbəl gitin ɗii məs gbəgbaɗe ɓa, walla məpeleŋ də ma məs məsəni ɓaɓa, walla məmanən ma ɓa. 31Məkayan əvəl məs dəday kiyit pakə.
Amma say nərban sukum gən əvəl an mogon day pakə.
ទើបបានជ្រើសរើសហើយ៖
1 Korintiyen 12: GDRNT85
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gidar New Testament © Bible Society of Cameroon, 1985.