Потон 3
3
3-тӥ ЛЮКЕТ
1Моисей Иофор варматаезлэсь, Мадианысь священниклэсь, ыжъёссэ возьмаса улӥз. Одӥг пол со ыж уллёзэ кыдёкысь луоё кыр дуннее вуттӥз, Хориве, Инмарлэн гурезь дораз, вуиз. 2Соку со азе ӝуась тёрнпу куак пушкысен Кузё-Инмарлэн Кылчинэз возьматскиз. Со адӟиз: тёрнпу куак тылын ӝуа, но ӝуаса уг быры. 3Моисей шуиз: «Мыныса учко ай та быдӟым возьматскон шоры, кызьы озьы куак ӝуаса уг быры». 4Кузё-Инмар адӟиз солэсь учкыны мынэмзэ, соку Инмар куак пушкысен солы вазиськыса шуиз: «Моисей! Моисей!» Со шуиз: «[Кузё-Инмаре,] тани мон со!» 5Соку Инмар шуиз: «Татчы матэ эн лыкты; пыдысьтыд кутчандэ кыль, тынад али сылон интыед – святой музъем ук». 6[Солы] шуиз: «Мон – тынад атаедлэн Инмарез, Авраамлэн Инмарез, Исааклэн Инмарез, Иаковлэн Инмарез». Моисей ымнырзэ ворсаз, Инмар шоры учкыны кышказ уго. 7Соку Кузё-Инмар [Моисейлы] шуиз: «Аслам калыкелэсь Египетын курадӟемзэ адӟи, ужамзэс чакласьёслэн ӝикатэмзылы чидатэк, викышъяса бӧрдэмзэс кылӥ. Солэсь куректон-кайгуоссэ тодӥсько, 8соин ик Ас калыкме со музъемысь, египет калыклэн киулысьтыз мозмытыны, йӧлын, чечыен бызись ӟеч, эркын музъеме поттыны мынӥсько, хананейёслэн, хеттейёслэн, аморрейёслэн, ферезейёслэн, [гергесейёслэн,] евейёслэн, иевусейёслэн улоно музъемазы вайыны мынӥсько. 9Тани, израиль пиослэн викышъяса бӧрдэм куаразы Мон доры вуиз, Мон адӟи, кызьы египет калык соосты ултӥяса возе. 10Озьыен, мын: Мон тонэ фараон [Египетлэн эксэез] доры ыстӥсько; Мынэсьтым калыкме, израиль пиосты, Египетысь потты». 11Моисей Инмарлы шуиз: «Кин мон сыӵе фараон доры [Египетлэн эксэез доры] мыныны но израиль пиосты Египетысь поттыны?» 12Соку [Инмар] шуиз: «Мон тонэныд огазьын луо; Мон тонэ ыстӥ шуыса, тани тыныд тодмет: [Мынэсьтым] калыкме Египетысь поттӥд ке, та гурезьын Инмарлы вӧсяськыса улоды». 13Соку Моисей Инмарлы шуиз: «Тани, мон израиль пиос доры лыкто но соослы шуо: ”Тӥляд атайёстылэн Инмарзы монэ тӥ доры ыстӥз”. Нош соос мыным шуозы: ”Кызьы Солэн нимыз?” Соку мон соослы мар шуом?» 14Инмар Моисейлы шуиз: «Мон Со, Кин Вань». Собере шуиз: «Израиль пиослы тазьы шу: ”Кинлэн нимыз «Мон Вань», Со монэ тӥ доры ыстӥз”». 15Инмар Моисейлы шуиз на: «Тазьы шу израиль пиослы: ”Тӥляд атайёстылэн Инмарзы Кузё-Инмар, Авраамлэн Инмарез, Исааклэн Инмарез, Иаковлэн Инмарез, Со монэ тӥ доры ыстӥз”. Тани Мынам пумтэм вапумъёслы нимы, Монэ выжыысь выжыосы тодазы возёзы. 16Мын, израиль пиослэсь тӧрооссэс огазе люка но соослы шу: ”Тӥляд атайёстылэн Инмарзы Кузё-Инмар, Авраамлэн [Инмарез], Исааклэн [Инмарез], Иаковлэн Инмарез, мыным возьматскыса шуиз: Мон тӥ доры вуылыса адӟи, кызьы Египетын тӥледыз возё. 17Собере шуиз: Тӥледыз, египет калыклэн ултӥян улысьтыз поттыса, хананейёслэн, хеттейёслэн, аморрейёслэн, ферезейёслэн, [гергесейёслэн,] евейёслэн, иевусейёслэн музъемазы ваё, йӧлын чечыен бызись музъеме ваё”. 18Соос тынэсьтыд верамдэ санэ понозы. Израильлэн тӧроосыныз ӵош [фараон] Египетлэн тӧроез доры мыноды но солы шуоды: ”Еврейёслэн Инмарзы Кузё-Инмар милемыз ӧтиз. Куинь нунал мынымон кеме луоё кыр дуннее мыныны милемыз лэзь, Инмармылы Кузё-Инмарлы курбон сётыны мед быгатомы”. 19Но Мон тодӥсько, [фараон] Египетлэн эксэез тӥледыз мыныны уз лэзьы, сое кужмысь ӧд ке косы. 20Киме ӝуто но Египетэз со пушкын лэсьтоно вань паймымон ужъёсыным погырто, собере со тӥледыз кошкыны лэзёз. 21Мон египет калыкез та калык шоры лякыт синмын учкись каро, татысь кошкыкуды, буш киын уд кошке. 22Вань кышномуртъёс бускель кышнозылэсь, солэн корказ улӥсь кышномуртъёслэсь азвесь, зарни арбериоссэс, дӥськут курозы, соин тӥ пиостэс, нылъёстэс чебер дӥсялоды, египет калыклэсь узырлыксэ сьӧрады нуоды».
Currently Selected:
Потон 3: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016