Потон 22
22
22-тӥ ЛЮКЕТ
1Кин ке ош яке ыж лушказ, сое вандӥз яке вузаз ке, соку со лушкам ошез понна вить ошсэ мед сётоз, лушкам ыжез понна ньыль ыжзэ мед сётоз.
2Кин ке гудӟиськыса пырись лушкаськисез кутӥз но сое шуккыса вииз ке, соку талэн вирыз понна со кыл уз куты. 3Нош лушкаськись шунды ӝужам бере виемын ни ке, соку сое виись мурт янгыше сюре. Лушкаськись дун тырыны кулэ, нош тырыны номыриз но ӧвӧл ке, сое ассэ мед вузалозы но лушкамезлэсь дунзэ мед тырозы; 4нош [сое кутӥзы ке,] со дорысь лушкам пудоез улэпкын шедьтӥзы ке, ош-а со, ишак-а со, ыж-а со, [соос понна] кык полэс дун мед тыроз.
5Мукет муртлэсь бусызэ яке виноград бакчазэ кин ке пудозэ лёгатыны лэзиз ке, [емышъёсты чакласа, аслаз бусыысьтыз мед тыроз, нош быдэссэ бусыез лёгатӥз ке,] соку пунэмзэ мед берыктоз аслаз бусыысьтыз тужгес но умой емышъёсын, виноград бакчаысьтыз самой ӟеч пурыосын.
6Тылпу потыса, жуг-жаг будосъёс ӝуаны кутскизы ке, отысен кабанъёс яке арано ю-нянь, яке бусы ӝуазы ке, соку тыл поттӥсь мурт дун тырыны кулэ.
7Кин ке матысь муртэзлы утьыны азвесьсэ яке мукет арбериоссэ сётӥз ке, нош кин ке соосты талэн коркасьтыз лушказ ке, соку, лушкаськись сюриз ке, со кык полэс дун мед тыроз; 8нош лушкаськисез ӧз ни ке шедьтэ, соку коркалэн кузёез судьяос азе мед лыктоз [но кыл сётоз], матысь муртэзлэн ваньбурез борды кизэ ӧз вутты шуыса. 9Ченгешонъёс потто ке кыӵе ке но ышем арбери пумысен, кудӥз сярысь кин ке но та мынам шуоз, ош пумысен, ишак пумысен, ыж пумысен, дӥськут пумысен ченгешонъёс потто ке, кыксылэсь ик та ужпумзэс судьяос кие сэрттыны-пертчыны сётоно: судьяос кинэ янгыш луэ шуизы ке, со мурт матысезлы кык полэс тырыны кулэ.
10Кин ке но матысезлы утьыны-вордыны ишаксэ яке ошсэ, яке ыжзэ, яке мукет пудозэ сётӥз ке, нош со кулӥз ке, яке со яраё, ӧлексы каремын ке, яке адӟись ӧвӧлтэм дыръя лушказы ке сое, 11Кузё-Инмар азьын кыкназы но куспазы кыл мед сётозы, басьтӥсь мурт матысезлэн ваньбурез борды аслэсьтыз кизэ ӧз вутты шуыса Кузё-Инмар азьын сётэм кыл соослэсь кусыпсэс мед тупатоз; пудолэн кузёез матысезлэсь сётэм кылзэ кабыл мед басьтоз, нош утись-возьмась мурт бырем пудо понна дунзэ берыктыны кулэ ӧвӧл. 12Нош пудоез со дорысь лушказы ке, соку кузёезлы дун тыроно; 13нош пудоез пӧйшур ке кесяз, возьматон-тодытон понна солэсь кылем лысьӧмзэ мед ваёз: кесям пудо понна со дун тырыны кулэ ӧвӧл.
14Кин ке но матысезлэсь пудозэ пунэмаса огдырлы вордыны басьтӥз ке, кузёез ӧвӧлтэм дыръя со ӧлексы луиз яке кулӥз ке, со понна пунэмась мурт дун тырыны кулэ; 15кузёез вӧзаз дыръя пудо ӧлексы луиз яке кулӥз ке, пунэмась мурт дун тырыны кулэ ӧвӧл; нош со, дун тырыса, пунэмамын ке вал, пунэмам понна тырем дун пудолэн кузёезлы мед кылёз.
16Кин ке курамтэ ныллэсь визьзэ тугаз но соин кӧлӥз ке, со понна та пиосмурт йырдон сётыны но сое кышно басьтыны кулэ; 17нош ныллэн атаезлэн со пилы нылзэ сётэмез ӧз ке поты, нылэз сантэмась пиосмурт нылмурт понна кӧня йырдон тырыны кулэ, сомында азвесь [ныллэн атаезлы] мед тыроз.
18Тунаськыса-пелляськыса улӥсь ведӥн кышноосты виыны кулэ.
19Пудо вылын азон сьӧлык лэсьтӥсь виемын луыны кулэ.
20Кузё-Инмарлы сяна, мукет инмаръёслы курбон сётӥсь быдтэмын луыны кулэ.
21Сьӧрлось лыктэм муртэ ӝикатыса-ёртыса эн возьы, эн ултӥя сое, уго тӥ но Египет музъемын лыктэм калык вал.
22Палкышноосты, анайтэм-атайтэм нылпиосты ӝикатыса-ёртыса эн возьы. 23Тон соосты ӝикатыса-ёртыса возьыны кутскид ке, соос Мыным тэльмырыса вазиськизы ке, Мон соослэсь викышъямзэс кыло, 24соку Мынам вожпотонэ ӝуатскоз но Мон тӥледыз мечен виыло, кышноосты палкышно кылёзы, нылпиосты анайтэк-атайтэк кылёзы.
25Мынам калыке пӧлысь куанер муртлы пунэмен уксё сётӥд ке, сое ёртыса эн возьы, мултэсмытыса коньдондэ берен эн куры. 26Матыседлэсь дӥськутсэ залоглы басьтӥд ке, шунды пуксьытозь тон сое берыкты, 27уго куанерлэн та одӥг гинэ шобырсконэз, мугорзэ шобыртонэз, кызьы со шобырскытэк кӧлалоз? Озьыен, со Мыным вазиськиз ке, Мон сое кыло, уго Мон гажась-жалясь.
28Судьяос сярысь урод кылъёс эн вера, калыкедлэсь кивалтӥсьсэ эн тышкаськы.
29Иншырысьтыд нырысь юдэ, виноград нелькон интыысь нырысь винадэ [Мыным вайыны] эн ӝега; пиосыд пӧлысь нырысь вордскем пидэ Мыным сёт. 30Озьы ик кар ошеныд, ыженыд, [ишакеныд]: сизьым нунал ӵоже соос анайзы вӧзын мед улозы, нош тямысэтӥ нуналаз соосты Мыным сёт. 31Соку тӥ Мынам святой адямиосы луоды; бусыын пӧйшурен кесям пудолэсь сӥльзэ эн сие, пуныослы куштэ.
Currently Selected:
Потон 22: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016