Потон 1
1
1-тӥ ЛЮКЕТ
1Тани Иаковен [атаенызы] ӵош Египет музъеме пырем израиль пиослэн нимъёссы, соос ваньзы ас семьяенызы пыризы: 2Рувим, Симеон, Левий но Иуда, 3Иссахар, Завулон но Вениамин, 4Дан но Неффалим, Гад но Асир. 5Иаковлэн кус улысьтыз ваньмыз-ӧвӧлэз сизьымдон [вить] лул потӥз, нош Иосиф соку Египетын вал ини. 6Иосиф кулӥз, солэн вань агай-вынъёсыз, соин ӵош улэм муртъёс но кулӥзы; 7нош Израильлэн пиосыз йылӥзы но йылӥзы, тросгес но тросгес луизы, туж юнмазы, та музъем быдэсак соосын пачылмиз.
8Египетын выль эксэй пуксиз, со Иосиф сярысь номыр но уг тоды вал, 9со ас калыкезлы шуиз: «Тани, израиль пиослэн калыксы трос луэмын, со асьмелэсь кужмогес; 10ваелэ кескич амал шедьтоме, азьланяз со медаз ни йылы; уго ожмаськон пуромоно луиз ке, со асьмелэн тушмонъёсынымы огазе кариськоз, асьмелы пумит ожмаськон тӥрлыксэ ӝутоз но [асьме] музъемысь кошкоз». 11Секыт ужъёсын сое куасалтон понна ужан доры солы кивалтӥсьёс пуктӥзы. Запас нянь возён понна та калык фараонлы Пифом но Раамсес каръёс-городъёс пуктӥз, [озьы ик Он карез, мукет нимыз солэн Илиополь]. 12Нош макем сое курадӟытӥзы, со эшшо но йылӥз, эшшо но тросгес луиз, таин сэрен [египет калык] израиль пиослэсь кышканы кутскиз. 13Со понна ик египет пиос израиль пиосты жугыса-тышкаса ужаны ёртылӥзы, 14секыт ужатыса – горд сюен вырытыса, кирпичъёс лэсьтылытыса, бусыысь вань ужъёсты быдэсъятыса, вӧсь карыса ужаны ёртыса – соослэсь улонзэс чидантэм секыт карылӥзы.
15Гогы кыскась еврей кышноослы, огезлэн нимыз Шифра, мукетызлэн Фуа, Египетлэн эксэез косон сётыса 16шуиз: «Еврей кышноослэсь гогызэс кыскакуды, нуны ваён дыръязы чаклалэ: пи нунызы вордӥськиз ке, сое вие, нош ныл ке вордӥськиз, мед улоз». 17Нош гогы кыскась кышноос Инмарлэсь кышканэн улӥзы, Египет эксэйлэн косэмезъя ӧз лэсьтэ, нылпиосты улэп кельтылӥзы. 18Египет эксэй, гогы кыскась кышноосты дораз ӧтьыса, соослы шуиз: «Малы тӥ тазьы ужаськоды – нылпиосты улэп кельтӥськоды?» 19Гогы кыскась кышноос фараонлы шуизы: «Еврей кышноос египет кышноос кадесь ӧвӧл, соос тазаесь, гогы кыскась вуытозь, соос нуны вайыса вуо ини». 20Та понна гогы кыскась кышноослы Инмар ӟеч кариз, калык но йылӥз, туж кужмояз. 21Гогы кыскась кышноос Инмарлэсь кышканэн улэм понна Инмар соослэсь выжыоссэс юнматӥз. 22Соку фараон аслаз вань калыкезлы таӵе косон сётыса шуиз: «[Еврейёслэн] пизы вордӥськиз ке, ваньзэсты шуре куялэ, нош нылъёссэс ваньзэсты улэп кельтэ».
Currently Selected:
Потон 1: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016