Mefaʼ Meziŋ-ntō 11
11
Piɛ a á ega á Yelósalɛm, ḿbɛ́tɛ ajū mīi, yí ŋghʉ̄ á mba Kɔɔnɛye
1 Meziŋ‑ntō mbɔɔ epɔ̄ memía metsem pīi, é ntē ŋgɔŋ Yudéa, é shʉʼ njúʼ á légɛ, epuɔ pīi pɔ́ té epuɔ Yúda á, pɔ́ é júʼ ashuŋne Ndém, ńchʉ́ nnɛ̄t mvéŋ. 2Piɛ á shʉʼ mbīŋ nzem tɛ ŋkó á Yelósalɛm, emɔ̄ʼ epuɔ á nnɔ epuɔ Yɛɛ́so, mbɔ pɔ́ gɛ ŋŋíŋɛ ŋ́gɛ, mɛ́ e láʼ etém epuɔ pīi, pɔ́ té epuɔ Yúda á, tɛ́ pɔ́ ecʉ́ʼ azɔ́p epuɔ Yɛɛ́so. Epuɔ puɔ mɛ́t, é zi á lethū alɔ́ʼ zí, 3ńdé ŋ́gɛ: «O ó ŋghʉ̄ páʼ lā, ŋ́gʉɔ ŋgúa epuɔ pīi, pɔ́ té epuɔ Yúda á, tɛ pɛ a pɔ́p é zéŋ mbúte etsō mpfɛ́t é?»
4Piɛ á lɛ nzī á lepɛ̄te anāŋ anāŋ, éshúŋ á wɔ́p ŋ́gɛ: 5«Meŋ kɛ á tésɔŋ Jope, ńnɔŋ eswíŋtɛ á Ndém. Mmɔʼ njʉɔ te lí é shʉʼ á mbū meŋ, meŋ jʉ́ɔ amɔ̄ʼ azō, á fhó á lephū esóʼo mé esī, ŋ́gɔ́ páʼ mía apū nzhó zīi, mɛ́ kuʼteé meshhʉ̄ lekua lā, éshʉʼ ntshí á mvhɔ meŋ. 6Meŋ echʉ́ nnɛ̄t ncʉ̄te ntē éwú, ńjʉ́ɔ, mena mekhu lekua, é pú ŋgɔ́ á ntē éwú, epi mbaʼ, ŋ́ghʉ̄ emɔ̄ʼ pīi, é shuŋɔ levem tsɔ́p á esī, ŋ́ghʉ̄ meséŋ. 7Meŋ ejúʼ ŋghi ŋiŋ, é tɔ́ŋ á gá ŋ́gɛ: “Piɛ, lu á esī, ńzwhíte mpfɛ́t.” 8Meŋ etsɔ́ʼ ŋ́gɛ: “Azaŋa zá me Atsyapuɔ, meŋ ndaá nzi ŋgɔ́ aleʼé, ḿpfɛ́t ajūɔ epe ɛ́, meŋ te pfɛ́t á ajūɔ nzhɛ ɛ́.” 9Ŋghi mɛ́t é zéŋ efhó á lephū, éshʉ̄ʼ mmɔʼ legʉɔ, ńdé ŋ́gɛ: “O te pɔŋté á letɔ̄ŋ ajū mīi, Ndém a á ŋghʉ̄, epe é té zɛ́t éwú ú, é lɛ ajūɔ epe ɛ́.” 10Azō mɛ́t á sóʼo épúp, tɛ esóʼo ŋgʉɔ ntɛ́t, ńdɛ mbīŋ nzem mé lephū. Á mi páʼa.
11Afʉʼ mɛ́t, mbɔ epuɔ métɛ́t pīi, mɛ́ efhó á Sezale ntó á wɔ́p ŋ́gɛ, pɔ́ eshʉʼ ntɔ́ŋ á gá, pɔ́ é shʉʼ tɛ ŋkó á mba yīi, meŋ kɛɛ́ nnáŋa éwú. 12Azwakne Ndém á lé mé meŋ ŋ́gɛ, pek a pɔ́p e egʉ̄ɔ, tɛ ndɛ́ʼ meŋ ntɛ̄ʼte á wɔ́p. Epɔ̄ memía pwɔ̄ ntokó, é le gʉ̄ɔ azɔ́p. Mɛ́ le gʉ̄ɔ tɛ ŋkó á mba Kɔɔnɛye, pek a pɔ́p metsem é pú ŋkó á ŋgyā. 13Ŋ́kó éwú épúp, á zi á lepɛ̄te eshúŋ á wék ŋ́gɛ, cɔʼ Ndém a ke shʉ̄ʼ á ŋgyā yí, ńdé á mbū yí ŋ́gɛ, a etó epuɔ á Jope, pɔ́ egʉɔ ntɔ́ŋ mmɔʼ ŋiŋ yīi, a á éwú, ńdɔk eshʉ̄ʼ, lezēŋ tsí é gɔ́ lɛ Simɔŋ Piɛ. 14A a eshʉʼ eshúŋ á yí á ashuŋne zīi, a a láʼ elɔk etswɛ́te, mbɔɔ epuɔ atseŋ ŋgyā pí. 15Meŋ ndɛ̄ nzī á letswi ŋke mbɔŋ, ńzɛ́t nzhɛ á eshúŋnɛ, Azwakne Ndém á sóʼo ŋkó tɛ ndó ntē epuɔ mɛ́t, ńdeŋ ndeŋ páʼ, á le gē ezi, ésóʼo ŋkó á ntē pímpɛ épúp lā. 16Meŋ jʉ́ɔ épúp, ńdɛ ŋkímte páʼ Atsyapuɔ Yɛɛ́so, a le lé ŋ́gɛ: “Jáaŋ a á si nnōʼo epuɔ á ntē ntshi, ḿbiŋ ŋgɔ́ mé pɛ, mbɔ mɛ́ e shʉʼ eyá á wɛ́ á Azwakne Ndém.” 17Páʼ Ndém a ke yá lewūʼ á mbū epuɔ pwɔ̄, é zéŋ ŋgɔ́ á kwaʼ tsīi, a le yá á mbū pímpɛ, áfʉʼ zīi, ḿpɛ é le fɛ́ nnɛ̄t ŋgyá á mbū Atsyapuɔ Yɛɛ́so Klísto lā, meŋ ké ḿbiŋ ŋgɔ́ páʼa, ŋ́gɔ́ á awɔ́, tɛ ŋgɔ̄ á ndʉʼɛ̄ anu zīi, Ndém yí méŋwɛ̄t, a á kɔŋ ŋ́gɛ, a egɔ́ épúp é?»
18Epuɔ é júʼ anu Piɛ jʉɔ mɛ́t, tu wɔp á pwɛ́t. Pɔ́ zi á lewuʼte á Ndém ndé ŋ́gɛ, Ndém a lɔkɔ ntsɔ́ʼɔ nzhɛ ŋ́gɛ, epuɔ pīi, pɔ́ té epuɔ Yúda á, e egɔ̄ nnɛ̄t zɔp, ŋ́gwáʼ atswhī tepɔŋ zɔ́p, a eghʉ̄ pɔ́ eláʼ ntā á lezēŋ yí.
Ŋke mbɔŋ Yɛɛ́so é gʉɔ tɛ ŋkó á Aŋtiɔsh
19Páʼ mɛ́ le zī á lelʉɔ̄ʼ epuɔ Yɛɛ́so, tɛ efhó á afʉʼ zīi, mɛ́ le zwhí á Etiɛn lā, pɔ́ zi á lekʉ, ésāŋ ejʉʼ. Emɔ̄ʼ epuɔ é gʉɔ mé ŋgɔŋ Fenísia. Emɔ̄ʼ epuɔ é gʉɔ mé Shʉple. Emɔ̄ʼ epuɔ é gʉɔ mé tésɔŋ Aŋtiɔsh. Ŋ́kʉ̄ épúp, ńnɔŋ te eshúŋɔ anu ŋke mbɔŋ á mbū ŋiŋ, té gɔ́ yīi, a á ŋiŋ Yúda á. 20Emɔ̄ʼ epuɔ Yɛɛ́so pīi, pɔ́ é epuɔ Shʉple, mbɔɔ epuɔ Silɛ̄ne, é gʉɔ azɔ́p mé Aŋtiɔsh. Ńzī á leshūŋne mbɔɔ á mbū epuɔ pīi, pɔ́ té epuɔ Yúda á#11.20 Epuɔ puɔ mɛ́t pīi pɔ́ te epuɔ Yúda á lā, é lɛ epuɔ Glɛk.. Ńtswī ŋke mbɔŋ Atsyapuɔ Yɛɛ́so á mbū pɔ́p. 21Ndém á nɔŋ ntswítɛ á wɔ́p, epuɔ tɛ nzáne é tsé á nzem Atsyapuɔ Yɛɛ́so, éfɛ́ nnɛ̄t zɔp ŋgyá á mbū yí.
22Anu jʉɔ mɛ́t, á kó á metuúŋ megaŋ alúŋ epuɔ Yɛɛ́so pīi, é Yelósalɛm. Pɔ́ lɛ ntó á Baanabas á Aŋtiɔsh. 23Á gʉɔ tɛ ŋkó éwú, ńjʉ́ɔ páʼ Ndém a ke tswī apɔŋɔ́ ntē te ndhʉ ánɛ epuɔ mɛ́t, ŋgɔŋ é pɔŋ á yí, á semte á wɔ́p ŋ́gɛ, pɔ́ etswiʼne ndɔ̄k á taʼ ntē, ńdɛ̄tne ánɛ Atsyapuɔ Yɛɛ́so. 24Baanabas wuɔ, a lɛ ŋiŋ, ŋ́gwɛ̄ ntē mbɔŋ, mbɔ a lē mbú efɛ́ nnɛ̄t zi, ŋ́gyá á mbū Yɛɛ́so. Azwakne Ndém á gɔ́ á ntē yí tɛ ndó. Emɔ̄ʼ epuɔ tɛ nzá á Aŋtiɔsh, é zéŋ nnɔ̄ŋ efíɛ́ nnɛ̄t ŋgyáa á mbū Atsyapuɔ Yɛɛ́so. Alúŋ epuɔ Yɛɛ́so, á nɔŋ ntswīʼnɛ efūŋɔ. 25Púp, Baanabas á shʉʼ nnáŋ tɛ ŋgʉ̄ɔ mé Táase, á efaāʼ Sɔ́ɔl. 26Ńdáʼ efāʼ á yí tɛ njʉ́ɔ, pɔ́ yí é piŋ nzem mé Aŋtiɔsh. Ńnáŋ éwú á taʼ ŋguʼ, pɔ́ a alúŋ epuɔ Yɛɛ́so zīi á éwú. Pɔ́ nɔŋ nzíʼnɛ epuɔ tɛ nzá. Mɛ́ le zīi á Aŋtiɔsh ega mɛ́t, á letɔ̄ŋ epuɔ Yɛɛ́so lɛ meklítɛn. 27Á lɛ ánɛ meleʼé mɛ́t, emɔ̄ʼ metswi‑ŋke Ndém é fhó á Yelósalɛm, ŋ́gʉ̄ɔ mé Aŋtiɔsh. 28Azwakne Ndém á lɛ ŋghʉ̄, mmɔʼ ŋiŋ wɔp á lu á esī, mɛ́ tɔ́ŋ á yí lɛ Agabus, ńzī á lesāʼ ŋ́gɛ, mía mía afʉɔne a a shʉʼ ewhʉ á ntē ŋgɔŋ ntsem. Á shʉʼ ŋgwhʉ̄ épúp, á afʉʼ zīi, Klɔde á lɛ á ŋwɛ́t ŋgɔŋ Lóma. 29Epuɔ Yɛɛ́so pīi pɔ́ é Aŋtiɔsh, é júʼ anu Agabus mɛ́t épúp, ńnáŋ á esī á nnɔ pɔ́p, ŋ́kwāŋte, tɛ ndé ŋ́gɛ, epuɔ metsem é ecūpte ŋkāp, mɛ́ elɔk ntswíte epɔ̄ memía pīi, pɔ́ é ŋgɔŋ Yudéa, awíɛ awíɛ á eyá páʼ, a á kuʼ éwú. 30Pɔ́ lɛ ncūpte ŋkāp, mɛ́ tó á Baanabas pɔ́ Sɔ́ɔl ŋ́gɛ, pɔ́ elɔk ŋgʉ̄ɔ ŋgyá á mbū epɔ̄ melʉɛ ánɛ alúŋ epuɔ Yɛɛ́so.
Currently Selected:
Mefaʼ Meziŋ-ntō 11: ybb
Highlight
Share
Copy
Want to have your highlights saved across all your devices? Sign up or sign in
© CABTAL