MÁI 11

11
Jísu lɛɛ hái Jɛlúsɛl̃ɛ
(Máfiyu 21:1-11; Lúu 19:28-40; Njɔú 12:12-19)
1Ná Jísuni ti ɣɛ́i náa bɛɛní Jɛlúsɛl̃ɛ taa walái h̃uu wá, tí fóloni Ɔ́levi Wuluí Yíhei wa í taí sítii suubéla taá ti lolí ngáa Bɛféji ɛ́ɣɛ Bɛ́tani. Kɛ Jísu i volú yélaa félengɔ lɔ́venga, 2i ɣɛ ti w̃a, “A lí taí sí h̃u í mu wutúwɔ, wáá lɛ nɔ́ɔ léi kɛ wú soohaalé sólangi lɔ́nga sí nuu fíli áá nɛ́ɛ́ heiní kɔ́ma ɔ́ɔ́ síya kpulɔ́ngɔ. A fuló, wú váá la mbéinda. 3Ná nuu fíli áá wú w̃ɔ́ɔ́ni, i ɣɛ ta, ‘Ndeénii le wáá ná ɣɛ́?’ a ɣɛ́ ma, ‘Kaamɔ́ɔ́ béɣengɔɔ lé ma aáva aá lɔ́ɔ ngángaima kuu h̃úú lukpúngɔ laa lówah̃u.’ ”
4Kɛ tí liingá, tí soohaalé sólangi w̃áále kpulɔ́ngɔ kóngi wa, i lóóni ngáá pɛlɛ́i laa vélei. Ná tí ɣɛ́i taa fúlo, 5kɛ sítii ti ɣɛ́i lóóni na kɛ tí tí w̃ɔ́ɔ́ninga, ti ɣɛ́ tí w̃a, “Ndeé le wáá soohaalé sólangi ná húlo?”
6Nátii tí ti woo yápoteni nɔ́ɔ jɔ́ kíya Jísu í ndéni ti w̃a. Nungáitii pa tí be ti wa, tí líí lá. 7Ná ti lííni ngáá soohaaléngi ná Jísu yelé, tí tí gúla w̃aah̃u gúlaitii pɛlɛ polú, Jísu í lɛ, í héi maah̃u. 8Nuu bíh̃iw̃aa tí tí gúla w̃ááh̃u gúlaitii ngá ndáá laáni peleí w̃a ngutúwɔ. Ti lɛ́ingaa va ngulú yéke gúlo gulóaitii ti ɣɛ́i tevéni ngulúitii mba tí fáha fáha peleí w̃a. 9Faŋaí sí í ɣɛ́i Jísu w̃aa velé lá ɛ́ɣɛ sí í ɣɛ́i maa buunɔ́ ti ɣɛ́i taá woo gúla, tíwaa ɣɛ́ ta, “A mú Ngála ndaaw̃áálɛ! Hɛ́ɛ́ lɔ́ ma lɛ́i íwaa vá Ndemɔí Ngála ndaahéingi h̃u! 10Hɛ́ɛ́ lɔ a mu káwala Deevé w̃ásandai w̃á íwaa vá! A mú Ndemɔí Ngála ndaaw̃áálɛ!”
11Kɛ Jísu i lɛɛngá Jɛlúsɛl̃ɛ taa h̃u, í lí Hɛ́ɛ́ma Yála Pɛ́lɛi góvii h̃u, í wɔ́lɛ wɔlɛ́ na kpɛ́lɛɛ. Kɛ́ sífaa kpindíí í ɣɛ́i náá áá vɛ́lɛ, i liiní Bɛ́tani taa h̃u taá pólu yélaa púúngɔ maah̃úú félengɔitii.
Jísu i féki wuluí véleni
(Máfiyu 21:18-19)
12Foló vékai ná w̃a ti ɣɛ́i taa gúla Bɛ́tani wa taá polú yélaitii táá lí, ndɔlɛí i ɣɛi Jísu w̃a. 13Kɛ i ngulúi tá lɔ́nga kélei taa tolí ngáá féki, njimbángɔ. Kɛ i liingá na ngáá í wɔ́lɛ nga ngáá ngi wángi, kɛ́ ná í fóloni na, aa ngi wá tɔ́ni ngá kɛ léi ngá ndáɣaitii, bɔw̃álale mba sɔ́wɔi aa nɛɛ ɣɛi lá. 14Kɛ Jísu i ɣɛa féki wuluí ná w̃a, “Kúnafɔ yɛ́i mɔ́ɔ́ wa.” Jísu volú yélaitii pa tí mɛ́nini sí í ndéni.
Jísu i liiní Hɛ́ɛ́ma Yála Pɛ́lɛi góvii h̃u
(Máfiyu 21:12-17; Lúu 19:45-48; Njɔú 2:13-22)
15Ná Jísuni ngaa polú yélaitii tí fóloni Jɛlúsɛl̃ɛ, i liiní Hɛ́ɛ́ma Yála Pɛ́lɛi góvii h̃u. Í pɛ́lɛ nungái sítii kpɛmá na ti ɣɛ́i taá sááɣa wɔlingái maaɣɛ ɛ́ɣɛ sítii ti ɣɛ́i taá sááɣa wɔlingái ngiyá ti w̃a. Ná vólu, sítii ti ɣɛ́i ngáá kápa sínji mbélaa, í ti lééveitii tóka lóka ɛ́ɣɛ poovóó maaɣɛ mbélaitii ti bɔ́kpɔngaitii. 16Ɛ́i belé kɛ nuu fíli ɔ́ɔ́ lí ngáá yawo ỹaaká Hɛ́ɛ́ma Yála Pɛ́lɛi góvii h̃u.
17Kɛ Jísu i pɛlɛngá nungáitii kalambóma, íwaa ɣɛ́ tí w̃a, “Kɛmbɛ pɔnɛngɔ́ɔ́ le Ngala Kɔ́lɔi h̃u ngáá Ngalá ngí ɣɛ́ngɔ ta, ‘Taa ɣɛ́ taa ní vɛ́lɛi lóli ngáá Ngala fɛ́li pɛ́lɛi nuu kpɛ́lɛɛ fááw̃a’? Kɛ́ wú náá ɣɛ́a ngáá ŋuỹá yélaa tí ỹándaa!”
18Ná Ngala sááɣa gula mbélai ti wutúwɔaitii ɛ́ɣɛ kaamɔítiini Ngala sávai hááw̃a tí ngói sí ỹɛ́nini Jísu í ndéni, tí pɛ́lɛni náa pele wɔlíma mba ngáá tí paa. Ti ɣɛ́i taa lúwa mba, bɔw̃álale faŋaí gíndaa vílingɔ i ɣɛi lá ngáa ngi gálambongi í ɣɛ́i áá mbo.
19Ná kpíndi í vɛ́lɛi, Jísuni ngaa polú yélaitii ti gúlani tái ná h̃uu wá.
Lá ngáá Ngalá
(Máfiyu 21:20-22)
20Ná Jísuni ngaa polú yélaitii ti ɣɛ́i taa híya peleí h̃u ngelendáá lɛtɛngí táá lí Jɛlúsɛl̃ɛ, ti féki wuluí lɔ́ni mbengɔ́ í yéi í fólo ngi hápei w̃a fáli. 21Kɛ Pítɛ gi ngí hitɛngá ná, i ɣɛ Jísu w̃a, “Kaamɔ́ɔ́, wɔlɛ lɛ́ɛ́, féki wúlui yí péleni i yénga!”
22Kɛ Jísu i ɣɛa ta, “A lá ngáá Ngalá. 23Ngí tɔɔỹái le wú w̃á, ná nuu fíli áá ɣɛ́ ngihé ngwálai sí w̃á, ‘Yooɣé, yí lí, yí bɔ́wɔ víli yívoi wu,’ maa w̃ɔ́i va ɛi ɣɛ nda tála gúlani lií h̃u, kɛ́ í lá lá ngáá sí í ndéngɔ aa ɣɛ, maa hái aa ɣɛ maa w̃ɔ́i yɛ.” 24Jísu í mɔ́ɔ ɣɛ ti w̃a, “Faalɔ, ngí ndé wú w̃á, sí fíli wáá kál̃aa w̃ɔ́ɔ́ni wú Yála fɛli ngói h̃u, a lá lá ngáá wá lɔɔ vá maahɔ́lɔma, aáva wáá mááhɔlɔ. 25Ná vólu, ná yáá ɣɛ́ yáa Ngala fɛ́li nuu háá baalɛ mba i í gí ma, maa w̃ɔ́i w̃ááhaalo kɛinɔɔ́ í Kɛ́ɛ́ɣɛ Ngála í ngelegóóh̃u ɔ́ɔ́ í háá ỹɔítii suuhaaló. [ 26Kɛ́ ná yɛ́i ɣɛ́ suuhaaló mbóni, í Kɛ́ɛ́ɣɛ Ngála í ngelegóóh̃u, ɛi í háá ỹɔítii suuhaaló.]”
Mɔɔningí kɔwɔ́ato Jísu yakpangí wa
(Máfiyu 21:23-27; Lúu 20:1-8)
27Kɛ Jísuni ngaa polú yélaitii ti mɔ́ɔ folónga Jɛlúsɛl̃ɛ. Ná Jísu í ɣɛ́i áá lɔ́ve tɔvé Hɛ́ɛ́ma Yála Pɛ́lɛi góvii h̃u, Ngala sááɣa gula mbélai ti wutúwɔaitii taá kaamɔítii Ngala sávai hááw̃a ɛ́ɣɛ kele ɣelé mbélaitii tí lííni Jísu yelé. 28Kɛ ti Jísu w̃ɔɔningá, ti ɣɛ́ ma, “Ngakpángi híí bɛɛ́ lɔ í í yáá yíwaa fái sítii kɛ? Ele vá tɔ í maa yákpangi héngɔ í yáa?”
29Kɛ́ Jísu i ti woo yápoteni, i ɣɛ ti w̃a, “Nyá bɛ́lɛ nyá lɔɔ wú w̃ɔ́ɔ́ni ngáá mɔɔni ngílaa. Ná wáá ngapóte, ngáá ndé náá wú w̃á ngakpángi sí í ngéya ngáá faí sítiini kɛ.” 30I ɣɛ ti w̃a, “Nguyaí Njɔú í ɣɛ́i áá mbo, ngi yákpangi i gulaní Ngalá ngéya baa nuu búsa yáa? A nde má!”
31Kɛ tí ndénga ỹɔw̃ɔ́ ỹɔ́w̃ɔ lówah̃u, táá ɣɛ́ ta, “Ná a maa ɣɛ́ ta, ‘I gulaní Ngála ngéya,’ aa mu w̃ɔ́ɔ́ni, i ɣɛ ta, ‘Kɛ ndeénii le hɔ́ɔ́ wáá láni ngáá Njɔú?’ 32Aáva a mɔí ɣɛ́ ta, ‘I gulaní nuu búsa yáa…’ ” Ti sí léni bɔw̃álale nduwá í ɣɛ́i ti h̃u nungáitii fááw̃a, sífaa nungáitii kpɛ́lɛɛ ti ɣɛ́i laní la ngáá kɛ Njɔú i ɣɛ́i ngáá Ngalá ndaa háá lé mɔ́ɔ́. 33Faalɔ, ti Jísu woo yápoteni, ti ɣɛ́ ma, “Naá kɔ́lɔ.”
Kɛ Jísu i ɣɛa ti w̃a, “Kɛ nyá bɛ́lɛ ngɛ́i nde hɔ́ɔ́ wú w̃a ngakpángi sí í ngéya ngíwaa fái sítii kɛ ma.”

Currently Selected:

MÁI 11: KNNT

Highlight

Share

Copy

None

Want to have your highlights saved across all your devices? Sign up or sign in