Hạbakuk 3
3
Ịiḅereghi ạHabakuk
1Ẹphen kụ ịiḅereghi ạHabakuk oyil phọ:
2Ọmoogh-we, mị mạnaghan ni ịpe nạ maḍighi bọ,
kụ eḍigh ḍiigu esi ạmi.
Nyịidipho ḅịle aḍighi sịen amem mọ ayoor
iboom ạraraar phọ nạ aḍighi ghan bọ.
Mọogh ọnma ighirigiir ghạlamo ịyaar repin ologhi ạna.
3Ẹnaan mẹḅile ẹḍua ẹpe Idom retu;
Ẹnaan aruukuan ẹḍua ẹpe aroogbolom mọ ạParan kụ retu.
Eegu phọ ọdi eekpereghiom okuaḍio phọ
kụ de phọ ạḍiseph ọdi kụ imuza.
4Ọdi ratu rꞌạḍiḅaal ọmeephian okuaḍio;
ạḍiḅaal ẹḍua ghan ḍịghaagh ọdi kụ rẹmu;
ịsiphe kụ ẹdi ịikpo ọdi ạaghian.
5Ọdi atom ghan ẹzegh kụ reḍiemi
kụ ạto mọ aḍuugh ẹdaph.
6Mem lọ ọdi asophe, ade phọ epiigha;
aḍiphogh ọdi reḍighi ghan dị areelhe phọ reekpereghan ghan.
Ạraaḅaraph phọ ẹrol ghan bọ kꞌagee-pọ meetughuḍian;
aroogbolom kꞌạsia kꞌạsia phọ meḅi ẹki ude,
aroogbolom mọ ọdi arelhe ghan bọ geedi phọ.
7Mị ụmiin ni awe aKusan ọmoogh oghiilaan
kụ awe ạMidian okper kper.
8Ạriphiiny phọ kụ iḍighi ịdi ephin ologhi ạna ḍụghum, Ọmoogh-we?
Ọphiiny ạbazi kụ aḍighi nyịna ịlo ophin ologhi ḍụghum?
Nạ ụzoghi ạnyu ọotu;
ọotu oghim mọ kụ oghuugh,
ịdipho nạ aruomaan bọ ọkpar opu weye ạna.
9Nạ uukolobian oḍighinom ạkumugh phọ ạna,
ạnya ọraḅal ịkpina phọ ạna.
Ọmeephian ạna aḅom de phọ apoghoghomi.
10Mem dị ạraaḅaraph phọ ẹmiin nyịna, bịdi eekpereghan;
ạmuum ạḍua okuaḍio phọ ameleghu.
Ạrumuum mọ edi bọ ologhi ade phọ imoogha ni,
kụ oologh ạbidi aphooph ạghi ạnyu.
11Etenom mọ ịkpina phọ ạna reten bọ
rꞌonmeeghu ọsoph ạna rạmuanan bọ,
erumuḍio phọ rꞌụnwanyu phọ ẹmeera sim.
12Nạ arelhe aten de phọ rꞌịnyaam esi ophin ologhi;
rꞌọghagh ologhi kụ ẹdi nạ ạazeghi reelhe phọ.
13Nạ ụghi ọphel awe anyina,
ọphel ọdaam mọ nạ ạsaḅar bọ.
Nạ ạgur alher oḍiemiom ạbuo ạsipioghom mọ
kụ aagulemi bụmatuan phọ ọdi.
14Ịkpina ạna ephunyi oḍiemiom awe ẹgham mọ ọdi
mem dị eru mụdi oghim ọowalami ayoor,
rꞌọnmoghoghoom ghan mụdi ạbuphe rọgbiphoghom ghan bọ rukulom reten ịbooghian.
15Nạ ạrol ạnyu ạrusu ẹgham mọ ạna kụ ạazeghi igbogh ạriphiiny phọ
kụ amuboom ạmuum amitiom oopha.
16Mị ạnaghan oomo ịphen, kụ akper kper;
ịidoronhu epiigha rꞌaḍiigu.
Aloor ạmi edugh
kụ ạrada ạmi reekpeteghaan ude phọ.
Mị kaḅoorian ni kụ akori mem mọ mọ eru
mem dị Ẹnaan kẹliom bọ bụphe uzuom bọ iyoor.
17Ghạlamo ireeny ạfig phọ ị́moogh mun rughuuny
kụ iimuma ị́tol loor iizin avain phọ,
ghạlamo ireeny ọliv phọ ímitiom mun mụnum
kụ iizo phọ ímuum mun ịbiakpa,
ghạlamo oomo iyool-ịga imuughu ni
kụ ịyaar ílho sịphe ạsidol ạsinam,
18mị kạḅile ni ạmoogh iboh rꞌọḅaal ologhi
loor esi dị Ọmoogh-we Ẹnaan phọ kụ ọpelia ạmi.
19 #
2 Sạm 22.34; Ạsuo 18.33 Ọmoogh-we phọ rụngo ghan ịmi ịikpo.
Ọdi ạkparami ruwol ạmi ịdipho ọnuen, aḍighi ịdi mị rákpetaan ghan,
kụ aḍighi ịdi ịyaar ịmi ị́ḅogh sịphe ạraaḅaraph phọ.
Currently Selected:
Hạbakuk 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS