1 Bụo ạKorint 1
1
1Mị ạPol phọ ọpo Ẹnaan ẹsaḅar bọ ẹsighe mọ aḍighi otelhedom ạJizos Kraist, rꞌaSostenis umor phọ ayira, 2#Iiḍ 18.1kụ ụge ḍịnya phọ ạḍien riruomaan inyina ạbuo ạsiosi phọ edi bọ ẹpe Kọrint, rꞌoomo awe phọ ạbuphe Ẹnaan mewoph bọ eḍighi bụo ọdi, rꞌoomo ạbuo areelhe kịrokiro phọ rọmagh ghan bọ ḍien phọ ạJizos Kraist Ọmoogh-we phọ ayira — kọ́lo ayira bịn, ọlo ạbidi rꞌayira ni.
3Ạḍiseph rꞌẹepho kꞌẸnaan Ọde phọ ayira rꞌạJizos Kraist Ọmoogh-we phọ ịrolonaan inyina!
Ạḍiseph dị aKraist rạngo ghan
4Mị ighol ghan ni inyina rạngo ḍịseph Ẹnaan oomo amem loor esi ọghor phọ Ẹnaan ịngo bọ inyina phọ mẹḅophoghan bọ Jịzos Kraist. 5Esi ạmuḅoph phọ ạmuen rꞌaKraist mịngo inyina ẹbalabala ẹelha dị ẹḅaram ịikpo ọghaaph rꞌolegheri ịyaar. 6-7Ịdipho nyina edi bọ rekori ghan ḍio phọ ạJizos Kraist Ọmoogh-we phọ ayira kamite bọ egaan phọ, ooḅi ọghaaph phọ aKraist mạkaraghi aḍiku ịphuuny anyina dị tụtu rꞌaḍiniin ạḍiseph inyina ítenom. 8Ọdi kạtol li sịphe ịphuuny phọ anyina kꞌaruukuna phọ, bịn rꞌịyaar inyina kị́biph ḍio phọ ạJizos Kraist Ọmoogh-we phọ ayira katu bọ. 9Ẹnaan phọ ịmagh bọ inyina mọ ịḅophoghan rꞌỌony phọ ọdi ạJizos Kraist Ọmoogh-we phọ ayira reḍighi ghan ni ịlo dị aguanaan.
Ịdi ạsiosi phọ mạaya
10Bụo asiya, mị ạsighe ḍien phọ ạJizos Kraist Ọmoogh-we phọ ayira kụ rịlhomom inyina mọ oomo phọ anyina ịmoogh ghan oniin ologhi rꞌeḍighinom ịyaar, amadian kụ́tol mun; ịḅoph oghuugh ẹḅoph ịlhom. 11Bụo asiya ạmi, mị rạkaaph ịduon, ịdi eḍighi bọ abuniin awe sịphe ọto kꞌaKloi kụ ụghaaph ụḅeni ịmi mọ ịruonu edi ni ogbo phọ anyina. 12#Iiḍ 18.24Ẹmhu ịphen mị rạkaaph bọ ịduon, mọ nyina mạaya. Oniin mọ, “Mị rạdaph Pọl”; oniin mọ, “Mị rạdaph Ạpolos”; oniin mọ, “Mị rạdaph Pita”; oniin kẹn mọ, “Mị rạdaph Kraist.” 13Nyina medi Kraist rụuku. ẠPol kụ aghol bọ ẹmhu phọ anyina amugh ḍuugh egbo phọ sịphe oreeny phọ ḍụghum? Ughol ḍien ạPol kụ iwur bọ inyina mụum mọ?
14 #
Iiḍ 18.8;
Iiḍ 19.29; Rom 16.23 Mị rạseph ni Ẹnaan mọ emuton Krịspos rꞌạGayos mị mụum úbur ọnon ọnyo anyina. 15Ḅịle kẹn ọnyo anyina kạ́kaaph mọ ughol ḍien ạmi kụ iwurogh bọ inyina mụum mọ. 16#1 Kọr 16.15(Mị ạḅile ni ạatughian mọ mị uwur ri mụum Stẹfanos rꞌọto ọdi, kụ ọlo mị ụ́kiom mun ologhi ọnon oye dị mị ạḅile awur mụum.) 17AKraist ịmi úrom owurogh ghan awe mụum, urom ghụn ịmi ọghaaph ghan ooḅi ọghaaph phọ. Mị ụ́kaaphom ghan ḍịidugha anem olegheri ịyaar aḅirini phọ, ọbo ịikpo aḍuugh egbo phọ aKraist loor oreeny phọ kepe ghan bọ oopho.
AKraist kụ ịikpo phọ rꞌolegheri ịyaar phọ Ẹnaan
18Ọghaaph aḍuugh phọ aKraist loor oreeny phọ ọ́ghigh ịyaar esi ạbuphe rope bọ, kụ aḍighi ni ịikpo phọ Ẹnaan esi ayira phọ rọpel bọ kotene. 19#Azay 29.14Ạḍinya iigbia phọ ẹḅem mọ,
“Mị kapiemi ni olegheri ịyaar aweye iloghi phọ,
ạpueghi ọnaghan ạḍughum ạbuo igbogh ịtuugha phọ.”
20 #
Job 12.17; Azay 19.12; 33.18;
Azay 44.25
Ika kụ ẹmhu ịphen phọ esi ạbuo olegheri ịyaar phọ rꞌạbutughemia iilogh phọ rꞌạbuphe rọoḅeghion bọ kọnunuan olegheri ẹmhu ịlo aḅirini phọ? Ẹnaan meḍeenaan ni mọ olegheri ịyaar aḅirini phọ ọphon pọ elologhi.
21Ẹnaan esi olegheri ịyaar phọ ọdi eḍighi ni dị awe kọ́sighe olegheri ịyaar ọlo ạbidi kụ olegheriom nyọdi. Ịḅeeraan ghụn Ẹnaan ọtuan adom elologhi phọ yoor rotelhe bọ ọphel ạbuphe omeeraam bọ. 22Bụo aJu phọ ropuru ghan ọmiin eḍeenaan, bụo aGris kọwa olegheri ẹmhu ạraraar aḅirini phọ, 23kụ yira ghụn rọkaaph ghan ịlo aḍuugh phọ aKraist loor oreeny phọ. Ọghaaph phọ ọphon kụ aḍighiigh dị keḍighi dị bụo aJu phọ komeleghu, ḅịle kẹn ịyaar dị aruuruen phọ kọ́maghami ịyaar. 24Kụ esi ạbuo aJu phọ rꞌaruuruen phọ ạbuphe Ẹnaan mẹsaḅar bọ, ọghaaph phọ ọphon kụ aKraist, ịikpo phọ rꞌolegheri ịyaar phọ Ẹnaan. 25Ịlo rogbiom mọ elologhi Ẹnaan epu ghụn ni olegheri ịyaar awe, ḅịle kẹn ịlo rogbiom mọ aḍidugh Ẹnaan ẹkpar ghụn ni epu ịnyaam awe.
26Bụo asiya, ịkiom ologhi dọl phọ nyina ẹrol bọ mem mọ Ẹnaan ịmagh bọ inyina. Bụdi awe aḅirini phọ ogbiighiom mọ olegheri ni ịyaar ọḅile ọmoogh ịikpo rꞌạdol eghuan úḍiza sịphe ogbo phọ anyina. 27Ẹnaan ịtuan osiphe umugholoor weye olegheri ịyaar phọ kụ ẹsaḅar bọ bụphe awe aḅirini phọ ụ́maghami bọ ịyaar. Ịtuan kẹn ni osiphe umugholoor weye ịikpo phọ kụ ẹsaḅar bọ bụphe awe aḅirini phọ ogbiighiom bọ mọ odugh ni phọ. 28Ẹnaan ịtuan ophiemi awe phọ aḅirini phọ ọmaghami bọ ịyaar kụ ẹsaḅar bọ bụphe bịdi ophogh bọ osooromi ẹsighe, bụphe ụ́maghami bọ ịyaar, ụ́moogh bọ ịyaar oḍighinom mọ. 29Ịphen phọ eḍeenaan mọ oye dị kabaga ghisigh Ẹnaan ólho. 30Ẹnaan kụ azin ạmuḅoph phọ anyina rꞌạJizos Kraist. Ẹnaan kụ irom bọ nyọdi mọ ụngo iyira olegheri ịyaar rꞌaruukuan phọ ọdi, ạḅile ạtagharan kụ uwoph iyira esi ịkaraph phọ ayira. 31#Jer 9.24Ịduon kụ iḍighi kụ ạḍinya iigbia phọ ẹḅem bọ mọ, “Oye lọ rạwa obaga ạtuan ghụn ịpe Ọmoogh-we phọ maḍighi bọ kụ abaga ghan!”
Currently Selected:
1 Bụo ạKorint 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS