პოპულარული ბიბლიური მუხლები Matie 24-დან

გაზიარება

'Nyinylolii yi nɩkpa 'wlu 'mänanɩ tenyii, ‑sɩbhä a za, nɩkpaa 'kɔkɔmlɛ, wa 'bhɩa a ‑wawʋ yuë dlɩ zɛmö bhɩɛ 'lɩlɩlɩ. ‑Maa ‑ɔ 'nɩ 'na wɛlɩɩ kɛ'mö ‑sɛ ‑këë ‑ɔ ‑kä ‑mä 'gbë 'wʋ ghlɛɛ, Lagɔ yo puë.

‑Mä bhlɩɩ a këtiea 'wuë 'wʋ, 'Mänatɩtɩɩ ‑yɩ bhïlaa 'pɩwʋ mää Lagɔ 'kämanɩɛ a dɛɛ, ‑mä wa 'kɩɛ bhïlanɩ, nɩkpa 'wuë 'kɩɛ 'nʋ 'wë 'pɩwʋ 'kä 'yli bhɩɛ.

‑Lɛ a 'tɛnyɩ 'la 'mö, a yia tʋgwɩwɛlɩ 'nʋ. ‑Maa dlɩ nɩ tanyɩ 'mö wɔlɔnɩ, ɛ'ɛ ‑bhö nyɩasɛ, ‑maa tʋ yia saa 'wuë gwɩ klɩpaa. ‑Li 'la 'wuë yi ghlɛ, ‑maa, ɛ'ɛ ‑bhö ‑bhlɛ da'a 'pɩwʋ a 'ylibhɩɛtɛnyɩ mɛ.

Bhlɩ ‑mɛmɛɛ ‑nyɛ bhlɩ ‑mɛmɛɛ 'sɔ yia'ɛ tʋ gwɩ, 'bhlɩlowli ‑mɔmɔɔ a ‑nʋä ‑nyɛ 'bhlɩlowli ‑mɔmɔɔ a ‑nʋä 'sɔ, wa yia'ɛ tʋ gwɩ. Ngɔmʋgupegupe yia yi. 'Bhlɩ a ‑bɛ ‑gömö a dʋdʋʋ yia'ɛ tɩtlɛnɩ. ‑Maa ‑mi'la 'wuë, sɛɛ gbadɩnglɔ a 'wlusɛsʋ a gbaapögbaapɛ tɛɛ'ɛɛ, ‑sɩbhä ma‑a.

Zlɩɩ ‑nyɛ dʋdʋʋ 'sɔ, yɩ yi 'plɩ, ‑maa 'na bhïlawɛlɩɩ mɩɩ 'naa 'kää 'kwädlɩ 'plɩɩ.

‑Maa nɩkpa a ‑bɛ yia 'yli 'wlʋ, wa yia 'na nglɩɩ 'pä, wa yia nɩɩ, Puënyɔɔ Lagɔ ‑sɛɛ ‑lɛ 'mö wa glɩnɩɛ nʋ. Wa yia sa'a nɩkpa a ‑bɛ dula.

Lɛ a 'tɛnyɩ 'la 'mö, abhʋa na ‑nʋa, wa yeanyɩa nɩkpa kä'mö plɩnɩ, wa 'kanyɩ 'zwɩ zia, wa 'kanyɩ 'lɩbhä a 'kä 'ku. Sɛ a glɩnɩɛ na ‑nʋa a za 'bhlɩbhëa 'wuë yeanyɩa ‑gblɩ. ‑Sɩbhä a za, a gla'mö a ‑nʋa a ‑bɛ na dlɩtɛɛnɩgbʋ yuë dlɩ 'wʋ bhɩɛ. Wa yi ‑gblɩgblɩnɩ, wa yi wanyɩ 'wa ‑gblɩwaa kä'mö plɩplɩnɩ. Nɩkpa a ‑muë Lagɔ 'nɩɛ tiee, ‑wa laa wanyɩ Lagɔ 'a 'möbhïlanɩwaa, wa yi zumanɩ, wa yi nɩkpa a ‑bɛ dula.

Zezwii lɛ naa: «A nɩ 'nɛmanɩ anyɩ 'wʋ, ‑bɛ nɩ tanyɩa dula.

‑Sɩbhä a za, abhʋa na ‑nʋa a nɩ ‑ligba a 'kä ‑lɛ glɩ, ‑maa Nɩkpɛ a 'Yu, zlɩɩ a'aa ‑tɔnɩɩ, 'mö ɔ 'kää 'mö yi.

Zaa, a nɩ ‑ligba a 'kä ‑lɛ glɩ. ‑Maa 'tɛnyɩ a ‑Lowli 'kää 'mö yii, a 'nɛɛ ‑yi.

‑Maa zlɩɩ ‑nyɛ 'gïle 'la 'sɔ n 'kää 'mö yii, ‑bɛ 'niɛ ‑yi. Lagɔzuzukuu 'niɛ ‑yi. Yuu 'niɛ ‑yi, 'n ɛ 'nɩ ‑bhö Dɩbaa a 'yize mɔɔ.

‑Maa yiowaa ‑wa nʋä nɩɩ, Puënyɔɔ Lagɔ ‑sɛɛ ‑lɛ 'mö wa glɩnɩ, ‑wa nʋ'ɛ nɩɩ, Lagɔ a 'möbhïlanɩwaa wa glɩnɩɩ, wa yia saa 'wuë 'yli 'wlʋ. Nɩkpa 'la wa yi zɩzɛ 'kädɛ 'pä, ɛ 'kä nɩkpabhë dula wa 'kʋä Lagɔnɩkpa 'mö 'wʋ 'libhï. ‑Mä 'wa zɩzɛpäpʋ 'la 'mö, wa yi ‑li 'mö yɛla, wa 'kä Lagɔ a ‑nʋa a'bhï dulamö.

Zaa, Nɩkpɛ a 'Yu, ɔ ‑kä yie yii, sɛɛ nɩkpaa zʋ a‑a Nowee a 'tɛnyɩ 'möö, ‑sɩbhä wa 'kää 'zʋ. 'Tɛnyɩ 'la 'mö dɛɛ nyuu 'nɩa'a ‑bhlɛ 'bhlɩbhëa 'wʋ yiee, nɩkpaa ‑wa ‑bhölɩ a‑a, lililibho, nʋnɩmälibho, nglʋkwälibho, ghïlamölibho, 'mo wa kä a‑a. 'N 'gɔlʋ 'kɔdʋʋ ‑wʋ 'kä ‑bhɩɛɛ ‑buduu, Nowee yi a‑a wʋ tɛlɩtɛlɛ zɛmö bhɩɛ, 'n ɔ yi a‑a ‑mä wʋ 'mö plɛ, wa dila 'nɩɛ dɛ pö 'lɩlɩlɩ, 'n 'nyizakwëa yuë a‑a zɛmö ‑vu, 'n wa yi a‑a 'yli bhɩɛ. Sɛ ‑bhʋlʋ ‑kpɔ 'la, Nɩkpɛ a 'Yu, ɔ ‑kä yie yii, ‑sɩbhä nɩkpaa 'kää 'zʋ.