პოპულარული ბიბლიური მუხლები 1 Pet̯ero 1-დან

გაზიარება

Nahumuyavizeni ḍuḍa Muungu, eye Baba jwa Ḅwana jwehu Yesu Kirist̯o; koro kahufwiya t̯ei muno, hat̯a kahupfa maisha mapfya. Kwa dzambo ḍya kwamba kamufufuya Yesu Kirist̯o kuyawa kwa wafu, kahupfa madzikwat̯yo makuu. Ndookomu hwakuindiiyani kupfokea hizi mvoni za Muungu aziwawekeeyezo wantuwe. Kazihuwekea mbinguni, pfantu zisipfowowa, wala kunangika, nolawe kujara.

Kwa dzambo ḍyevihivi, tsekeani muno ingawa hi saasambi ni had̯i mupatwe ni kula namuna ya maḍemo kwa muḍa. Haya maḍemo yadza t̯u, kuzipima hizi faro zenu kuyanga kwamba mumuserefat̯a Muungu ḍugha. Dza vya dhahaḅu ivyonapimwa na kudhereswa na moho, ndivyo vya faro zenu zivyokupimwani na kudhereswa, kuchiiya na kwa haya maḍemo. Na faro zenu kwa Muungu zina thamani kuchia dhahaḅu ambayo nsiku modza idzanangwa. Ndookomu ikiwa kwamba faro zenu zionegwa kwamba ni karit̯u, mudzapata shad̯u, marembo na hila nkuu, nsiku ya Yesu Kirist̯o adzeyokudza.

Ishinu nanywi, wani wadheru kwa kula njia dza hiviḍe vya huyu amuhaniye aivyo mudheru. Koro haya matsoro yamba, “Wani wadheru kwa kwamba mimi ni mudheru.”

Wani wana wat̯iifu kwa Muungu. Na mahendo yenu nayatset̯awaligwa ni hiziḍe t̯amaa mwizokuwa nazo musidzaimanya hi hachi.

D̯ubva pfenuyani matso muyat̯ariye haya haya urembo, na madzikwat̯yo yenu yonse yawe kwa hi t̯ei mudzeyofwijwa ni Yesu Kirist̯o, adzepfokudza.

Dza vya matsoro yaneneyevyo yakyamba, “Wanaad̯amu wonse waa dza mani, na rembo ḍyao ḍyonse ḍyaa dza kiyuwa. Mani yananyuuka, na kiyuwa kinaharachaa, Ela chuuwo cha Muungu kinakaa maishi.” Na hichi ndicho chuuwo kisumwiijwecho kwenu.