If you would like a copy of this version please contact info@davaraudiobibles.org

Duruma Bible © 2020, Bible Translation and Literacy East Africa. (Text)
Duruma Audio Bible ℗ 2025, Davar Partners International. (Audio)

Lagana iphya Ra Chiduruma

Duruma - 1999 Edition (Drama NT)

Jeso ariphomarigiza kufunza maneno gago, waamba ahumwae vivi, “Tsʼikukʼuu ya Pʼasaka ni muhondo dza vivyo mumanyavyo kare, na mimi Mutʼu yelaa dzulu nindalaviwa kwa atʼu ai aniulage kwa kunikotʼa misumari musalabani.”
Ukati uo, makuhani abomu na atumia a Chiyahudi nao, ákala adzonana phamwenga dzumbani ra utawala kwa Kayafa, yekala ndiye kuhani mubomu. Ao ákala anadzila vyondamugwira Jeso chelevu, na amuulage. Ela kuko kwao kudzilani áambana vivi, “Nahutsʼimugwireni uu ukati wa tsʼikukʼuu, atsʼidze atʼu akamanya, na akabitʼa muyuwano.”


Jeso ariphokwenda Betania, wakwendaphenya nyumbani mwa mutʼu mumwenga aihiwaye Simoni wa mahana. Ndo ariphokala unarya leu, muchetʼu mumwenga waphenya na tʼupa ya alabasita yokala yina mafuha ga gali, ga kunukʼatʼo, na achanza kumumwagira Jeso mafuha gago chitswani. Ela ahumwae ariphoona gago, átsukirwa muno hata achambana, “Heka unagabananga gano mafuha yuno muchetʼu? Maana, mafuha gaga gangari kuguzwa na gakalaa pʼesa nyinji zenye, zirizo zingari kuhewa achiya.” Ela Jeso yiye achikala udzigamanya gago gao gokala anagagomba, na ndo hata achiaamba, “Kwadze munamuyuga yuno muchetʼu? Yiye godzinihendera ni madzo. Achiya mundakala nao tsʼiku zosi. Kwa vivyo, ahenzaye kwaaviza, undaaviza, ela mimi bee kʼamundakala nami tsʼiku zosi. Yuyu muchetʼu udzinimwagira gago mafuha kuubambanya chimbere mwiri wangu kwa maziko. Ninamwambira jeri mino, duniani kosi kondasumurirwa Nguma Mbidzo, gaga godzihendwa ni yuyu muchetʼu nago ni seti gahadzwe kumukumbikira.”


Juda Isikariyoti, mumwenga wa aratʼu ahumwa a Jeso kumi na airi, wakwenda kwa makuhani abomu achendaauza vivi, “Nichendamonyesa Jeso mwimwi, mundanipʼani?” Makuhani abomu achimupʼa phapho kare vipande mirongo mihahu vya pʼesa. Ndo kulaira ukati uo, Juda achanza kutsakula nafasi mbidzo ya kwaonyesa Jeso amugwire.


Tsʼiku ya kwanza ya tsʼikukʼuu ya mikahe yotsʼitiywa hamira, Jeso watuwiwa ni ahumwae achiuzwa vivi, “Vyakurya vya tsʼikukʼuu, unahenza hukavibambanyephi sino?” Jeso achiaamba, “Endani mudzini, kura kwa mutʼu wehu mukamwambe, ‘Mwalimu wehu udzihuhuma hudze hukwambire kukala, ukatiwe ufika phephi. Kwa vivyo, unahenza adze arye Pʼasaka phamwenga na siswi ahumwae mumu mwako nyumbani.’ ” Ndo ao ahumwa hinyo achendahenda dza vyokala adzambwa, na achanza kujitʼa leu ra tsʼikukʼuu. Dziloniye, Jeso na aratʼu ahumwae kumi na airi, ásagala phamwenga achirya leu. Na ariphokala anarya, Jeso waamba, “Ninamwambira jeri, mumwenga wenu mwimwi phapha undaniguza.” Phapho ahumwae achishononeka muno, hata achigomba mumwenga-mumwenga kwamba, “Bee nami mimi tsʼimi Bwana, hebu ndimi?” Jeso yiye achiamba vivi, “Yiye atsʼatsʼaye mukahe bakuli mwenga na mimi ndiye yendaniguza. Mimi Mutʼu yelaa dzulu nindakwendaulagwa dza Maandiko ga Mulungu gaambavyo dzulu yangu, ela undamanya mwenye yiye mutʼu yendaniguza! Yiye hata ni baha kala kʼavyalirwe!” Juda yekala ndiye yendamuguza Jeso achigomba naye achiamba, “Akale ni mimi Bwana?” Jeso achimuudzidza achiamba, “Udzigamala.”


Jeso na ahumwae vyokala anaenderera kurya leu, Jeso wahwala mukahe achilavya mumvera kwa Mulungu, chisha achiumega-mega achiapʼa ahumwae na achiamba, “Uu ni mwiri wangu, hwalani murye.” Chisha, Jeso achihwala chikombe cha divai, achilavya mumvera kwa Mulungu achiapʼa na achiaamba, “Anwani na kusazirana hata mosi. Maana, yiyi ni milatso yangu yihakikishayo Lagano ra Mulungu na atʼu, mana, milatso yangu yindamwagwa kwa hata atʼu anji asamehewe dambi zao. Ninamwambira mino, tsʼindanwa divai kahiri hata hudze hunweni hosini divai mbiphya kuko Ufalumeni kwa Baba.”
Musindikizowe osi achiimba pʼambiyo na achiuka, achenda mulima wa Mizeituni.


Jeso na ahumwae ariphokala anenda vyao kuko mulima wa Mizeituni, yiye waamba vivi, “Usiku uu wa rero mwimwi mosi mundachimbira muniriche. Maana, Maandiko ga Mulungu ganaamba,
‘Nindamupiga murisa hata agwe,
nago magonzige gandatsamukana.’
“Ela nichifufuka, nindamulongolera kwenda Galilaya.”
Pʼetero achimwamba, “Aa asena hata akakuchimbira osi, ela mimi tsʼindakuricha kamare!” Jeso achimuudzidza achimwamba, “Ninakwambira jeri mino uwe Pʼetero, usiku wa rero jogolo richiika, undakala udzinitina kʼano tʼahu.” Pʼetero naye achimwamba, “Hata kumba ni kufa mimi ni kwete nife nawe, ela tsʼindakutina kamare!” Phapho hata ao ahumwa anzie osi nao achiamba vivyo.


Yiye Jeso na ahumwae ákwenda hata phatʼu phaihiwapho Getisemane, na achiaamba vivi ao ahumwae, “Sagalani phapha mino ninenda pharatʼu mbere nikavoye.”
Na achiuka na ano Pʼetero, Jakobo na Johana anangwa a Zebedayo, na kuko Jeso achigwirwa ni shenene na achiyugika muno. Phapho achiaamba ano Pʼetero, “Shenene yihenda muno mwangu moyoni hata yindanirya. Kwa vivyo, sagalani phapha muchese matso na mino.” Ndo achisengera mbere vichache achifinikʼirika vifunefune, na achivoya vivi, “Baba, vichikala vinaidimikika, niusira yiyi shenene yonipangira. Ela hata vivyo, henda vivyo uhenzavyo uwe, tsʼihivyo mimi nihenzavyo.” Chisha, Jeso achizuka achiuya kuratʼu kwa ahumwae ahahu, na achendaaona aphotserwa. Achimulamusa Pʼetero achimwamba, “Kwadze murere? Kʼamwidimiredze kukala matso nami hata kumba ni saa mwenga tu? Bee tsʼilaleni mwimwi, na voyani kwa hata muchijezwa, mutsʼigwe dambini. Ninamanya mino munagahenza na moyo, hata ni munashindwa tu.”
Ariphomala kugomba gago, achenda kʼanda kahiri hicheye na achivoya vivi, “Baba, chikala kuniusira yiyi shenene yonipangira kʼaviidimikika hata yiyo ni seti yinipate, hʼaya bee uhenzaro narikale.” Jeso achizuka achiauyira kahiri aratʼu ahumwae ahahu, na achendaaona arere, mana, ákala ashindwa ni usingizi.
Jeso achiaricha kahiri achendavoya lwa hahu mavoyo gago ga mwanzo na phiriye. Chisha, achizuka achiauyira ao ahumwae ahahu achendaalamusa na kuno unaamba, “Mwimwi mucheri kudzigolosa hata vivi? Lamukani bee kwakukala, saa yangu ya konyeswa kwa adambi anigwire mimi Mutʼu yelaa dzulu, yifika. Zukani hwendeni vyehu. Mutʼu yendaaonyesa atʼu mimi anigwire, hiyuno unadza.”


Ndo Jeso ariphokala ucheri kugomba gago, Juda mumwenga wa aratʼu ahumwae kumi na airi achidza. Yiye wakala ulongoza duu bomu ra atʼu okala ana pʼanga na magundu. Atʼu ao ákala áhumwa ni makuhani abomu, na atumia a Chiyahudi. Juda yekala undaaonyesa ao atʼu Jeso amugwire, wakala udziaambira chimbere vyokala undahenda kwamanyisa ni yuphiye Jeso. Yiye wakala udziaamba, “Yendakwendamudonera tu, manyani ndiye mutʼu wenu mumuhenzaye, hʼaya phapho mumugwire.” Ndo phapho Juda achimusengerera kare Jeso achimwamba, “Kʼamuna utʼu, mwalimu?” Chisha achimudonera. Jeso yiye achimwamba, “Henda godzikufisa baye.” Phapho kare aratʼu atʼu okala ákudza na yiye Juda, achidzamulinga Jeso achimugwira.
Muhumwa wa Jeso mumwenga phapho achitsomola upangawe achimutema muhendikazi wa kuhani mubomu hata achimutosa sikiro. Ela Jeso achimwamba, “Hʼai, hʼai, hʼai! Wudze upangao mwakwe chowani, mana, osi apigao kʼondo na upanga, andaulagwa na upanga vivyo nao. Kala mimi ninahenza wavizi, kʼamona ningari kumuvoya Baba, naye angari kuhuma maruru malaika helufu mirongo mifungahe na mbiri! Ela mino tsʼimuvoyere Baba Mulungu wavizi, kwa hata garatʼu Maandiko goamba kukala, gaga gahendekago vivi ni seti galairire, gachimire.”
Chisha, Jeso achiramba riro duu ra atʼu okala adzimugwira, “Aa! Mudzikudza na pʼanga na magundu munigwire dza kwamba mimi nákala ninahenza nipinduwe sirikali? Samba chila tsʼiku nákala nichifunza atʼu mumo boma ra Hekalu? Heka kʼamunigwirire kuko? Ela gaga gosi vivi ganahendeka, kwa hata maneno ga Mulungu goandikwa ni agomvie gachimire.” Phapho ahumwae osi achimuricha achichimbira.


Ao atʼu okala adzimugwira Jeso, áuka naye hata kwa nyumba ya Kayafa yekala ndiye kuhani mubomu, kuriko atumia a Chiyahudi na alimu a shariya ákala arundikana. Pʼetero achiatuwa, ela wakala u nyuma kure vichache. Na achenda hata achiphenya mumo bomani mwa kuhani mubomu achisagala phamwenga na ao arinzi, kulolera gondalairira.
Ndo makuhani abomu na ngambi yosi achitsakula chisingwa cha kumusingizira Jeso, kwa amunyonge. Ela kʼaapatire kamare hata aripho atʼu anji ákudza achilavya ushaidi wao wa ulongo. Musindikizowe, alume airi álaa phapho mbere na achiamba vivi, “Mutʼu yuyu waamba, ‘Ninaidima kuribitʼa Hekalu ra Mulungu, na nikarijenga kahiri kwa tsʼiku tʼahu.’ ” Kuhani mubomu achiunuka na achimwamba Jeso vivi, “Udzigasikira mba godzikwamba ano alume airi? Hʼaya uchikala una ra kuudzidza, udzidza.” Ela Jeso yiye achinyamala tu zii. Phapho kuhani mubomu achimwamba, “Sema ujeri mbere za Mulungu ariye moyo! Hwambire chikala uwe ndiwe yiye Kʼirisito, Mwana wa Mulungu!” Jeso achimuudzidza achimwamba, “Uwe udzigomba. Ela ninamwambira mosi mino kukala, gachisira gaga mundanona mimi Mutʼu yelaa dzulu na nisegere mukono wa kulume wa Mwenyezi Mulungu na ni mainguni ninadza.” Kuhani mubomu ariphosikira gago, waahula valore, chisha achiamba, “Yuyu Jeso unamukufuru Mulungu! Kwa vivyo kʼahutakiya ushaidi unjine kahiri! Mwimwi mosi mudzigasikira makufuruge. Sambi mwimwi munaambadze?” Ao achimuudzidza achiamba, “Yiye unawirya kunyongwa!” Phapho ao atʼu achimulatsʼira mahe ga uso, chisha achimupiga ngumi. Anjine achimupiga makofi na kuno anamuuza vivi, “Hwambire we Kʼirisito, ni ani yedzikupiga?”


Ukati uo, Pʼetero wakala ucheri kusagala mumo bomani. Ndo mumwenga wa ahendikazi a chiche a kuhani mubomu achimusengerera achimwamba, “Hata uwe udzikala u phamwenga na Jeso muchina Galilaya!” Ela Pʼetero achitina mbere zao osi phapho achiamba, “Tsʼirimanya riro urigombaro!” Chisha, achiunuka achenda kʼanda, phephi na kuko muyango wa riro boma. Muhendikazi munjine wa chiche achimona, na achiaamba okala aimire phapho, “Mutʼu yuyu ukala u phamwenga na Jeso muchina Nazareti.” Pʼetero achitina kahiri achiamba, “Haki ya Mulungu, mutʼu yiye tsʼimumanya.” Kwimaima vichache, aratʼu atʼu okala aimire phapho achimusengerera Pʼetero na achimwamba, “Hakika uwe u mumwenga wa a Jeso, kwakukala, hata uo ugomvio chisha unahumanyisa kukala, u mumwenga wao.” Phapho Pʼetero achilapha achiamba, “Haki ya Mulungu mimi kuulagwa ni phapha, mutʼu yiye tsʼimumanya! Nichikala ninalemba, Mulungu naanone!” Pʼetero ariphogomba vivyo tu, jogolo richiika kare. Phapho Pʼetero achikumbikira garatʼu maneno gokala udzambirwa ni Jeso kukala, “Usiku wa rero jogolo richiika, undakala udzinitina kʼano tʼahu uwe Pʼetero,” phapho achilaa konze ya riro boma, achendarira muno.

Listen to Matayo 26