Zɛnɛse Tuɛ mɛni ƃóɔɔ
Tuɛ mɛni ƃóɔɔ
Zɛnɛse laai su-kulâi ƃa “Gɔ́ɔ pîlanii.” Gɔlɔi ŋí a lôno é pîlaŋ ŋ̀éniɛi kpɛtɛ tãi ma da núu-kpune. A lôno ŋɔ́nɔ é pîlaŋ sɔnyɔ̂ŋ da mɛni sôli káa ma ŋ̀éniɛi su da berei Ɣâla a tûa la a núu-kpunei. Gɔ́ɔ pîlanii kɔlɔi ŋáa kɔlɛ̂ɛi gîei feerɛ:
1) Gɔlɔ-ŋuŋ 1--11 pílaŋɔ̂ɔi ŋ̀éniɛi kpɛtɛ mɛni ma da núu-kpune maa-ŋuŋ ŋɔmɛni-pɔlɔi. Bîlaŋɔɔi ŋɔ́nɔ Adaŋ ma da Iî, Kîŋ da Ebɛɛ, Nôa da Ǹya-fɛɛ Kɛ́tɛi é pɛ́lɛ Beebɛ pɛrɛ kɛ́tɛi ma.
2) Gɔlɔ-ŋuŋ 12--50, Eezuɛ-ŋai dínuu-pɔlɔ-ŋai maa mɛni-pɔlɔi pɔ̃yɛ̂ɛi zu. Maa-ŋuŋ ƃa Eberaɣɛ̃ɛ nyii kɛ̀ a ǹáa a Ɣâla gɛ́ Ɣâla wóo mɛnii. Eberaɣɛ̃ɛ ǹóŋ Aise ŋɔmɛni-pɔlɔi da ǹóŋ ŋɔlóŋ Zeeka, nyii da kâa kɛ̀ ma Eezuɛi, da Zeeka ǹónîi-sinaa puu-káo feerɛi nyii-ŋai kɛ̀ a Eezuɛ sii puu-káo feerɛi dínâŋ. Zeeka ǹóŋ dɔnɔ nyii da kâa kɛ̀ mà Zosɛi ŋɔmɛni-pɔ̂lɔi, da m̀ɛnii gɛ̀ Zeeka da ǹônii é pɛ́lɛ ŋɔpɛ́rɛi mu-ƃelai dîa díkɛ pà Ize lɔii sui mâ.
Berei máŋ gɔlɔi ŋí a lôno la é pîlaŋ nûa diai, mɛni-ŋuŋ a nɛ̀ kûai nyàa ƃa mɛnii Ɣâla a gɛi. Gɔ́ɔ pîlanii ƃa a gɛɛ Ɣâla ƃé ŋ̀éniɛi kpɛ̀tɛ. Gbɛɛ ŋái ƃa Ɣâla a pâi kɛ̂i nɔ́ wɔ́lɔ ŋɔwɛli-kɛ-maai lɛ̂i ŋɔnûai dîa. Gɔlɔi ŋí gwaa kélee ma mɛni-ŋuŋ gáa naai nyàa ƃa, Ɣâla nyii gáa a mɛni ŋá-tee-nuui, gɛ́ zɔnyɔ̂ŋ-ƃelai kula-maa kɛ̀, gɛ́ tɔ̂ɔ ŋɔnûai túɛ, gɛ́ kpɔŋ-maa tɛ̀ɛ dípɔ, gɛ́ dífulu-laai téniŋ tɔ̂ɔ. Dí gɔlɔi ŋí pɔ̃yɛ a gɛɛ dí ǹûai ŋí dílaa-laai lɛ́, a gɛɛ ŋɔ́nɔ ǹáa-laai ŋí é lɛ́ɛ ɣele ma.
M̀ɛni-ŋûŋ-ŋai gɔlɔi ŋí sui
Ŋ̀éniɛi da núu-kpune kpɛtɛ mɛ̂ni (1:1--2:25)
Sɔnyɔ̂ŋ kɔ́ɔ pîlanii da gula maa (3:1-24)
É síɣe Adaŋ ma é tóo Noa ma (4:1--5:32)
Noa da ǹya fɛ̂ɛ kɛ́tɛi (6:1--10:32)
Beebɛ pɛrɛ kɛ́tɛi (11:1-9)
É síɣe Sɛ̂ŋ ma é tóo Eberaŋ ma (11:10-32)
Eberaɣɛ̃ɛ, Aise da Zeeka (12:1--35:29)
Isɔɔ ŋɔsuui (36:1-43)
Zosɛ nêɣe da ǹîa-ni (37:1--45:28)
Eezuɛ-ŋai dí káa Ize (46:1--50:26)
Attualmente Selezionati:
Zɛnɛse Tuɛ mɛni ƃóɔɔ: KWB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2012 Bible Society in Liberia