1 Corintios 5
5
Mädistanwan punuq runata qarqunanpaq Pablo yätsishqan
1Qamkunacho juk runa mädistanwan taykashqantami musyashqä. Paywan tarqa pasaypa penqakuypaq fornicación jutsatami ruraykan. Tsayno runataqa Jesucristuta mana chaskikuq runakunapis jamurpanmi.#Deut. 22.30. 2Tsayno kaykaptinqa ¿imanirtaq mana penqakärinkitsu? Penqakärinaykipa trukanqa kushikurkaykankimi. Tsay niraq runataqa ¿imanirtaq juntakashqaykipita qarqupäkunkitsu?
3Qamkuna kaqcho mana kaykarpis nawpaykicho kaykaqnömi kaykä. Tsaymi tsay runataqa mayna juzgashqä. 4Señor Jesucristupa jutincho juntakäriptiki noqapis qamkunawan kaykaqnömi kaykäshaq y munayniyuq Jesucristupis qamkunawanmi kaykanqa. 5Tsayno kaykaptinqa tsay runata Satanáspa makinman kachaykuy. Tsaycho nakar jutsanta kachariptinraqmi Señor Jesucristo kutimur salvanqa.
6Tsay runata mana qarqurqa alabakurpis mana alitami rurarkaykanki. ¿Manaku musyapäkunki tsay jutsaqa walka levadürala mäsata jakatsishqanno kashqanta?#Gál. 5.9. 7Tsayno kaykaptinqa qamkunacho kaykaq levadürata jitaqno tsay runata qarqupäkuy. Tsaynöpami mushuq mäsapita rurashqa levadüraynaq tantano kapäkunkipaq.#5.7 Pascua fiesta qalaykunanpaqmi Israel runakuna levadürata wayinkunapita jitarir levadüraynaq tantata rurapäkuq. Tsay costumbriman tinkutsirmi wawqi panikunata Pablo nirqan jutsata ruraq runata juntakashqanpita qarqunanpaq. Juntakashqancho jutsata ruraq runa mana kaptinnami mushuq mäsapita rurashqa levadüraynaq tantano wawqi panikuna kanqa. Pascua carnishno Jesucristo [noqantsi rayku] wanutsishqa kaptinmi rasunpa levadüraynaq tantano karkaykanki.#Éxo. 12.15; 13.7; Deut. 16.3. 8Tsayno kaykaptinqa Pascua fiestata rurananpaq levadürata jitariqno jutsa ruraykunata y mana ali ruraykunata kacharishun. Tsayno kacharir Tayta Diospa wilakuynin nishqanno kawashun.
9Puntata apatsimushqä cartachöpis#5.9 Tsay cartaqa oqrakashqami kaykan. Maycho kashqantapis manami musyantsitsu. maynami nishqä fornicación jutsata ruraq runakunawan mana juntakänaykipaq. 10Manami lapan tsayno kawaq runakunapita witikärinaykipaqtsu tsayno niykä. Tsaynöpis manami lapan codiciösu runakunapita, suwakunapita y ïdulukunaman yärakuq runakunapita witikärinaykipaqtsu niykä. Paykunawan mana juntakarqa ¿mayparaq aywapäkunkiman? 11Tsayno kaptinpis wakin runakunaqa <<Jesucristumanmi yärakü>> niykarmi fornicación jutsata rurapäkun, imapaqpis codiciösu kapäkun, ïdulukunaman yärakärin, runapa wasanta rimapäkun, borrächu kapäkun y suwakärin. Paykunawan mana juntakänaykipaqmi niykä. Paykunawanqa mikunalaykipaqpis ama juntakaytsu.
12Noqantsi manami munayniyuqtsu kantsi Jesucristuman mana yärakuqkunata juzganantsipaq. Jesucristuta chaskikuq mayintsikuna jutsata ruraptinmi itsanqa juzganantsipaq y corriginantsipaqpis munayniyuq kaykantsi. 13Jesucristuta mana chaskikuq runakunataqa kikin Diosmi juzganqa. Jesucristuta chaskikuq mayikikunata corriginaykipaq munayniyuq kaykarqa mädistanwan kakuq runata juntakashqaykipita qarqupäkuy. Tsaynöpami mana ali ruraykuna qamkunacho mana kanqatsu.#Deut. 13.5; 17.7; 19.19.
Attualmente Selezionati:
1 Corintios 5: qvmB
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2003, Wycliffe Bible Translators, Inc. All rights reserved.