1 Corintios 3
3
Mana rimanakuypa kawananpaq nishqan
1Wawqi panikuna, tsayno kaptinpis Espíritu Santu munashqanno mana kawapäkuptikimi Jesucristuta mana chaskikuq runakunatano qamkunata yachatsirqä. Qamkunaqa pishi wamranölaraqmi kapäkurqayki. 2Mikuyta manaraq yachaq wamrata chuchulawan maman ashmashqannömi noqapis qamkunata qalaykunan kaq yachatsikuykunalataraq yachatsirqä. Kananyaqpis mana tantiyakuq karmi pishi wamranölaraq karkaykanki.#Heb. 5.12-13. 3Chikinakur y rimanakur kawashpayki ¿manaku Jesucristuta mana chaskikuq runakunano kawarkaykanki? 4Wakinnikishi kayno nirkaykanki: <<Noqakuna Pablutami qatiraykä>>. Y wakinnikinashi kayno nirkaykanki: <<Noqakunaqa Apolustami qatiraykä>>. Tsayno nipäkushpayki ¿manaku Diosta mana cäsukuq runakunano karkaykanki?#1Cor. 1.12.
5Tsayno nipäkunaykipaqqa ¿pitaq Apolusqa? Tsaynöpis ¿pitaq noqa kä? Noqakunaqa Tayta Diosta sirviq runakunalami karkaykä. Tayta Dios churamashqanno sirviptïmi Jesucristuta chaskikärishqanki. 6Muruta muruq runanömi qamkunata wilapashqä Jesucristuta chaskikunaykipaq.#Hech. 18.4-11. Apolusnami mururaykaqta parquqno Jesucristupa wilakuyninta masta tantiyatsishushqanki.#Hech. 18.24-28. Muruta winatsimuqnömi Tayta Dios shumaq tantiyatsishushqanki Jesucristuman yärakärinaykipaq. 7Manami muruq kaqtsu ni parquq kaqtsu muruta winatsimun, sinöqa Tayta Diosmi.
8Muruq kaqpis parquq kaqpis chakra ali wayunanpaqmi arupäkun. Tayta Diosnami muruq kaqtapis parquq kaqtapis arushqanman tupu päganqa. 9Noqapis Apoluspis Tayta Diospa aruqninkunalami karkaykä. Qamkunanami Tayta Dios aruykätsishqan chakrano karkaykanki.
Tsaynöpis Tayta Dios sharkaykätsishqan wayinömi karkaykanki. 10Tayta Dios kuyamar churamashqa kaptinmi ali yachaq albañil cimientuta churashqanno arushqäkuna kaykan. Tsay cimientu janancho juk albañil perqata sharkatsishqannömi wakin runakunapis arurkaykan. Itsanqa shumaq tantiyakäritsun imano arushqantapis. 11Manami pipis cimientu churashqana kaykaqta jitariykur juk cimientuta churanmantsu. Jesucristumi cimientuqa kaykan.
12Wakin runakunaqa Tayta Dios munashqanno kawar tsay cimientu jananman qoriwan, qellaywan o kuyaylapaq chipchipyaykaq rumikunawan wayita sharkatsishqanömi karkaykan. Wakin runakunanami itsanqa Tayta Diosta mana cäsukur qeruwan, oqshawan o rämakunawan wayita sharkatsishqano karkaykan. 13Mayqanwan sharkatsiptintsipis juiciu final junaqnami lapan arushqantsipita Tayta Dios juzgamäshun. Tsay junaq juzgamashpantsimi lapan rurashqantsikunata ninawan probanqa. 14Cimientu janancho sharkatsishqantsikunata nina mana ushaptinqa premiutami chaskishun. 15Cimientu janancho sharkatsishqantsikunata nina ushaptinmi itsanqa ima premiutapis chaskishuntsu. Tsayno kaptinmi wayita nina rupaptin runa qeshpir salvakushqanno noqantsipis salvakushun.
16¿Manaku musyapäkunki Tayta Diospa templun kashqaykita? ¿Manaku musyapäkunki Espíritu Santu qamkunacho taykashqanta?#1Cor. 6.19; 2Cor. 6.16. 17Tayta Diospa templunta ushakätsiq kaqtaqa#3.17 Diospa templun payman yärakuqkuna kaptinmi templunta ushakätsintsi payman yärakuqkunata chikinakatsir, jutsata ruratsir o lutanta criyitsir. Tayta Diosmi ushakätsinqa. Qamkunaqa Tayta Diospa templun karmi santu karkaykanki.
18Shumaq tantiyakäriy. Wakinnikimi yarparkaykanki Diosta mana chaskikuq runakunano yachaq kashqaykita. Rasunpa yachaq kayta munarqa paykuna yarpashqanno ama yarpapäkuytsu. 19Diosta mana chaskikuq runakuna yachaq kashqanqa Tayta Diospaq manakaqlami kaykan. Palabranchöpis kaynömi qelqaraykan:
<<Yachaq kashqanta runa yarpaptinpis manami rasunpatsu yachaq kashqanta musyatsin>>.#Job 5.13.
20Tsaynöpis kaynömi qelqaraykan:
<<Tayta Dios musyaykanmi yachaqkuna imata yarpashqantapis.
Payqa musyaykanmi manakaqkunata yarpapäkushqanta>>.#Sal. 94.11.
21Tsayno niykaptinqa ama alabakäriytsu kayno nir: <<Noqaqa Apoluspa o Pablupa qatiraqninmi kä>>. Tantiyakäriy lapanpis qamkunapana kashqanta. 22Tsaymi noqapis, Apoluspis, Cefaspis, kay patsapis, kawaypis, wanuypis, kanan tiempupis y shamunanpaq kaq tiempupis qamkunapana lapan kaykan. 23Qamkunanami Jesucristupa kaykanki. Jesucristunami Tayta Diospa kaykan.
Attualmente Selezionati:
1 Corintios 3: qvmB
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2003, Wycliffe Bible Translators, Inc. All rights reserved.