Sakaria 1
1
Binwini Bisie Unwoti Kudɔ
1Uwi ɔni na Dario ɔɔdi lɛga lɛkwa linyɔdi kɔbuli maanedi kemmo ni, Unwoti ɔ́su Kenye Udiene Sakaria kenye kadi. Na ɔti ndi Berekaia ɔni ɔti ndi Ido.
2Ɔ́su-nwu ɔnini, “Ami, Unwoti Ɔyikune Ƒui, lɛ́kɛ ku bina bati kuuku kɔnyi geen. 3Nsu si amii bɛdubunwini bibo-mi kudɔ ni, ami lɛnɔ nsɔ lɛɛɛdubo kama bunwini bɔkya-mii.” 4Amii bitabla atu ɔkplu aani bina bati kuuku kalɛ. Kenye bediene bedeedi bani nélie bábavi bálɛ-ma kpakplaa geen ka bada bana ɔbladu buɛ baya na benwini bebo-mi kudɔ, nsu béni. 5Na wɛ na bina bati kuuku bammɔ bakya ɔƒaani? Na kenye bediene badi muedi belélie ngba uwi ƒui. 6Nsu ka béni mina etemila ku bɔlɛ bɔni na mina kenye bediene bálɛ-ma ɔsu ni, básiaku lɛla lɛni na baawia. Anwuɔsu bénwini bébevele-mi banini, “Unwoti Ɔyikune Ƒui, áni-bu kɔtu kɔni námanku bula ekpidi ani na bɔ́bla aani kalɛ na ásu ése.”
Ala Bɔnu Budeedi Bɔkɛnku Bapɔnkɔ Ku Bana Beliene
7Na kɔbuli leevu-kunwidi kɔni na baalɔ banii Sebat kuna limeyi aavlanyɔ-linedi lɛlɔ na lɛkwa lɛmmɔ kani kemmo ni, Unwoti úti nwuna linyesia lɛdi úte-mi. 8Usien ɔmmɔ ni, lɛ́nu ka ukyuli ɔdi ulie ɔpɔnkɔ ugyiedi ɔdi lɛlɔ na kɔwɛ lɛku lɛdi kemmo. Na babambadi badi lɛnɔ belie bapɔnkɔ begyiedi ku bani nse ƒuƒuu ku baƒualadi bamba lɛlɔ na nwuna kama. 9Na Katɔti ɔtu ɔdi unye mmɔ kalɛ na udie ala kalɔ ute-mi. Anwuɔsu líye-nwu nnini, “Ati, ɔma bene ndi bapɔnkɔ beliene bamɛni?”
Mmɔ na ɔtu ɔmɛni údie kenye ɔnini, “Ndubo-ɔ bɔsu.”
10Mmɔ kani na ukyuli ɔni nnye lɛku lɛmmɔ kemmo mmɔ údie kenye ɔnini, “Bekyuli bamɛni na Unwoti ɔ́tala ɔnii bebo babanu lɛla lɛni mɔɔlɛ́ na kalɔ lɛlɔ mɛni.”
11Amu na bapɔnkɔ beliene bammɔ básu Katɔti ɔtu ɔni nnye egyii ammɔ akɔ mmɔ banini, “Búsie bɔ́vi kesii biala na kalɔ kammɔ lɛlɔ na bɔ́nu ka keyi buɛɛ káƒɔ kayawi kammɔ lɛlɔ ƒui.”
12Ka únu kenye kammɔ ni, ɔtu ɔmmɔ údie kenye ɔnini, “Unwoti Ɔyikune Ƒui, akwa liti ku aavlanyɔ mɛni ka éti kɔnyi ákya Yerusalem ku Yuda lɛma lɛmmɔ ƒui. Na uwi ɔmani geen na adubo-ma kɔnyana bɔnu?”
13Na kenye kani na Unwoti ɔ́su nwuna ɔtu ɔmɛni lɛɛsia-nwu kɔnu na lɛɛkya-nwu kayi ɔkplu lɛnɔ.
14Anwuɔsu ɔtu ɔmmɔ ɔ́su-mi ɔnii nkɔ lɛla lɛmɛni lɛsa nte bekyuli na lɛsu-ma ka Unwoti ɔnini, “Ami Unwoti Ɔyikune Ƒui mɔɔyɔ́ Yerusalem mina ɔma kedee na nwuna lɛlɔ ala eegyie-mi anumi geen.” 15Lɛ́kɛ kɔnyi lɛ́kya kadi bekyuli bani nlie lɛlɔyɔ kemmo na ala adianku-ma. Ɔsika uwi na líti kɔnyi lɛ́kya Yerusalem ni, bébile ala na mmɔ bétulo kalɛ na ɔ́manku na baaadaku-ma lɛda munu munu.
16Anwuɔsu ndubɔnu Yerusalem kɔnyana. Na ndubɔya na basɔku ɔma unengudi ɔmmɔ batu ƒui na basɔku mina kakpakɔ batu benyene kana kenyekɔ.
17Líse kenye lɛnɔ ka ala adubɔsɔ atɛku mina lɛma lɛmmɔ. Na Yerusalem ɔsɔ unwini mina ɔma ɔƒunadi, na lɛsia mina ɔma kedee ɔmmɔ bekyuli kɔnu.
Ala Bɔnu Bunyɔdi Bɔkɛnku Bebuo Ese
18Na ɔmmɔ kama ni, lɛ́nu bebuo ese ene adi. 19-21Na ɔtu ɔni na Katɔti ɔ́tala ka ubedie ala ammɔ kalɔ unye mmɔ. Anwuɔsu líye-nwu nnini, “Ala ani na mɔɔnu mɛni kalɔ ndi bi?”
Amu na údie kenye ɔnini, “Ese amɛni enye ete kadi bekyuli bani négyingya Yuda ku Israel ku Yerusalem bekyuli na báya na basɔ beeebo keyi buɛɛ kadi.”
Ɔmmɔ kama ni, Unwoti údie ala bakywɛne ine badi ɔ́tina-mi na líye-nwu nnini, “Bi na ama badubo bɔbla?”
Údie kenye ɔnini, “Badubo ese ammɔ liƒu bɔkya na bebo-nya babwɛ na bebile bekisine bammɔ ɔyikun ƒui.”
Attualmente Selezionati:
Sakaria 1: lef
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.