Mateo 2
2
Nileli nɛ je beleku ɔ
1Benɛ pa fɔ Yesu ngɛ Betlehem ngɛ Yudea ngɛ matsɛ Herode yi nɔ se ɔ, oʼɛ, ni leli je beleku ba Yerusalem ba bi ke: 2“Jije Yudafo ɔmɛ a matsɛ ɔ nɛ a fɔ ɔ ngɛ? Wa na edodoe ngɛ beleku, nɛ wa ma lɛ jami.” 3Benɛ matsɛ Herode nu enɛ ɔ, e kɛ Yerusalem tsuo nu sawale; 4nɛ e bua ma a mi osɔfo nikɔtɔma amɛ kɛ mlaa tsɔɔli ɔmɛ tsuo a nya kɛ kpe nɛ e bi mɛ he nɛ a ma fɔ Kristo ɔ ngɛ. 5Nɛ a de lɛ ke: “Ngɛ Betlehem ngɛ Yudea; se bɔ nɛ gbalɔ ɔ ngma ji nɛ ɔ nɛ:
6‘Nɛ mo, Betlehem, Yuda zugba a, pi
mo ji nyafii pe kulaa ngɛ
Yuda ganɔ ɔmɛ a kpɛti.
Se o mi nɛ ganɔ nɛ ma kpaka
ye ma Israel ɔ maa je.’ ”
7Kɛkɛ nɛ Herode tsɛ ni leli ɔmɛ zaa nɛ e bi mɛ fitsofitso be mi nɛ dodoe ɔ je. 8Nɛ e ha a ya Betlehem nɛ e ke: “Nyɛɛ ya nɛ nyɛ ya hla bimwɔyo ɔ fitsofitso, nɛ ke nyɛ na lɛ ɔ, nyɛ ba de mi konɛ imi hu ma ba nɛ ma ba ja lɛ.” 9Se benɛ a nu matsɛ ɔ munyu ɔ, a pue nɔ kɛ ho. Nɛ oʼɛ, dodoe ɔ nɛ a na ngɛ beleku ɔ nyɛɛ a hɛ mi hluu kɛ ya si dodoe ɔ ba da he nɛ bimwɔyo ɔ ngɛ ɔ yi mi. 10Nɛ benɛ a na dodoe ɔ, a na bua jɔmi wawɛɛ nitse. 11Nɛ a ya we ɔ mi, nɛ a ya na bimwɔyo ɔ kɛ e nyɛ Maria a, nɛ a kpla si nɛ a ja lɛ, nɛ a pɛne a kotoku ɔmɛ a nya; nɛ a ke lɛ nihi: sika tsu kɛ mimɛ kɛ mire. 12Nɛ akɛnɛ Mawu je tsɔɔ mɛ ngɛ nlɛmi mi ke a ko kpale a se kɛ ya Herode ngɔ hu ɔ, a gu blɔ kpa kɛ ho a zugba a nɔ ya.
Fotumi kɛ Mizraim yami
13Nɛ benɛ a je se ɔ, oʼɛ, Nyɔmtsɛ ɔ Bɔfo je e he kpo tsɔɔ Yosef ngɛ nlami mi nɛ e ke: “Tee si, ngɔɔ bimwɔyo ɔ kɛ e nyɛ ɔ, nɛ o tu fo kɛ ya Mizraim, nɛ o hi lejɛ ɔ kɛ yaa su be nɛ ma de mo; se Herode ma hla bimwɔyo ɔ nɛ e gbe.” 14Nɛ lɔ ɔ he ɔ, e te si nɛ e ngɔ bimwɔyo ɔ kɛ e nyɛ ɔ nyɔ mi, nɛ e pue nɔ kɛ ho Mizraim ya. 15Nɛ e hi lejɛ ɔ kɛ ya su be nɛ Herode gbo; konɛ nɔ́ nɛ Nyɔmtsɛ ɔ de ngɛ gbalɔ ɔ nya a nɛ ba mi ke: “Mizraim i tse ye bi ɔ kɛ je.”
Betlehem jokuɛwi ɔmɛ a gbemi
16Jeha nɛ ɔ benɛ Herode na kaa ni leli ɔmɛ sisi lɛ ɔ, e muklii mi fu wawɛɛ, nɛ e tsɔ a ya gbe jokuɛ nyumuwi tsuo nɛ ngɛ Betlehem kɛ lejɛ ɔ ni ɔmɛ a mi tsuo, ninɛmɛ nɛ ye jeha enyɔ kɛ ninɛmɛ nɛ yi ja ngɛ be nɛ e bi ni leli ɔmɛ fitsofitso ɔ nya.
17Kɛkɛ nɛ nɔ́ nɛ gbalɔ Yeremia de ɔ ba mi ke:
18“A nu gbi ko ngɛ Rama,
kɔmɔ yemi kɛ ya fomi kɛ ya peemi fuu,
Rahel ngɛ e bimɛ ɔmɛ foe
nɛ e kplɛɛ we kpatami; ejakaa a gbo.”
Sekpalemi kɛ Mizraim jemi
19Se Herode gbenɔ se ɔ, oʼɛ, Nyɔmtsɛ ɔ bɔfo je e he kpo tsɔɔ Yosef ngɛ nlami mi ngɛ Mizraim, 20nɛ e ke: “Tee si nɛ o ngɔ bimwɔyo ɔ kɛ e nyɛ ɔ, nɛ o ya Israel zugba a nɔ se ninɛmɛ nɛ hla kaa a gbe bimwɔyo ɔ gbo.”
21Lɔ ɔ he ɔ Yosef te si nɛ e ngɔ bimwɔyo ɔ kɛ e nyɛ ɔ nɛ e ba Israel zugba a nɔ.
22Bene e nu kaa Arkelao ngɛ matsɛ yee ngɛ Yudea ngɛ e tsɛ Herode se ɔ, Yosef ye lejɛ ɔ yami gbeye; nɛ akɛnɛ a je kpo tsɔɔ lɛ ngɛ nlami mi he ɔ, e plɛ e yi kɛ ho Galilea ni ɔmɛ a mi ya. 23Nɛ e ba ba hi ma ko nɛ a tsɛɛ Nazaret ɔ mi; konɛ nɔ́ nɛ gbalɔ ɔ de ɔ nɛ ba mi ke: “A ma tsɛ lɛ Nazareno.”
Attualmente Selezionati:
Mateo 2: DAN77
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Dangme New Testament © United Bible Societies, 1977.