Maatteeo 1
DIDNTPO
1
Hĩbaangĩ cĩg Yeesu
(Tigiil ꞌLuuka 3:23-38)
1Baa arrittiaa Yeesu Krĩstõ halaangatõõ cĩ habu Daavide#1:1 Daavide: Baa ẽbẽra Nyekuci Daavide hikia hĩĩ habu cĩ Ĩꞌthĩraẽlĩ nẽ uduha ĩĩ, aku hatĩ habuui cobbi lõhõlẽẽnĩĩ cĩg lõhõlĩ cĩgĩnnĩg, hikia haggam looc hĩĩ habu ũdũt. Baa habu tĩho Yeesu Krĩstõ. Tigiil thõõth icci ꞌBuuhaa cĩ Tegellwaanu 132:11-12. Baa arũgĩ Daavide irkiꞌnyia ꞌcĩg occa ũũppan aalib hõdẽĩ, baa nga hittirria Yeesu. Tigiil thõõth cĩnnĩ ꞌBuuhaa ꞌcĩ ĩĩn 1 ĩcĩ Thamueele 16-30; 2 Thamueele 1-24; 1 Habueet 1-2. hĩ halaangatõõ cĩ Abũrahamĩ.#1:1 Abũrahaamõ: Baa avvĩ Nyekuci ĩnõõnnõ hũtũngeek eet cĩg halang cĩnnĩ hĩ looc cĩnnĩ nẽ ũnũõõthĩ Nyekuc ĩcĩ looc ꞌcĩ ĩĩn ngeju. Baa ikia ĩĩ Abũrahamĩ maaꞌnyĩ eet cĩg ꞌJudeei. Baa arũgĩ nẽẽ irkiꞌnyia 1,800 baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 17-26. Nẽ ꞌthaarriok cĩg hĩbaangĩ cĩgĩnnĩg cieegi.#1:1 Yeesu Krĩstõ: ꞌThaara ꞌcĩg haĩ Yeesu ho, aĩ ẽẽlanneet Nyekuci. ꞌThaara ꞌcĩg haĩ Krĩstõ ho, aĩ ẽbẽra Nyekuci eet hĩĩ habu.
2Baa ĩĩn Abũrahamĩ maaꞌnyĩ Iꞌthaako,#1:2 Iꞌthaako: Baa ĩĩn ciee ngeertĩ Abũrahamĩ ꞌcĩ baa aduhaak Nyekuci Abũrahaamõ. Tigiil thõõth cĩnnĩ ꞌBuuhaa cĩ ꞌThianaattõ 17-35.
nẽ ĩĩ Iꞌthaako maaꞌnyĩ Yakobo.#1:2 Yakobo: Baa ĩĩn nẽẽ ngeertĩ loholeec cĩ Abũrahamĩ, ꞌcĩ baa aꞌnyak lõhõlĩ ꞌcĩg maacĩg õmmõtõ hĩ ꞌramma. Baa ẽgẽẽran Nyekuci ꞌthaar cĩgĩnnĩg nẽ akateek ꞌthaar ꞌcĩg kaĩ Ĩꞌthĩraẽl. Haĩ lõhõlĩ cĩg lõhõlĩ cĩgĩnnĩg lõhõlĩ cĩg Ĩꞌthĩraẽlĩ nẽ korrioohĩĩ baag Yeesu, baa avvĩ eeta ĩhõõggõ anneek eet cĩg ꞌJudeei. Tigiil thõõth cĩnnĩ ꞌBuuhaa cĩ ꞌThianaattõ 25-50.
Nẽ ĩĩ Yakobo maaꞌnyĩ ꞌJuuda hĩ ꞌgõtõõnõgĩ.
3Ma ho, ikia ittira ꞌJuuda Pẽrẽth hĩ ꞌThẽẽra, ꞌcĩg baag haĩ aattĩnĩĩng Tamar,
baa ĩĩn Pẽrẽthĩ maaꞌnyĩ Hethoronĩ,
nẽ ĩĩ Hethoronĩ maaꞌnyĩ Ramĩ, 4nẽ baa ĩĩn Ramĩ maaꞌnyĩ Ammĩnadabĩ,
nẽ ĩĩ Ammĩnadabĩ maaꞌnyĩ Nahathõnĩ,
nẽ ĩĩ Nahathõnĩ maaꞌnyĩ ꞌThalmõnĩ,
5nẽ ĩĩ ꞌThalmõnĩ maaꞌnyĩ ꞌBõathĩ,
ꞌcĩ baa haĩ aattĩnnĩ Rahab. Baa ĩĩn ꞌBõathĩ maaꞌnyĩ Obeede ꞌcĩ baa haĩ aattĩnnĩ ꞌRuuth,
nẽ Obeede baa ĩĩn maaꞌnyĩ ꞌJeeꞌthe.
6Baa ĩĩn ꞌJeeꞌthe maaꞌnyĩ habu Daavide.
Nẽ baa ĩĩn Daavide maaꞌnyĩ ꞌThõlõmõõnẽ, ꞌcĩ baa ĩĩn ngaannia ngaa cĩ eet ꞌcĩ haĩ Uria.
7Nẽ baa ikia ittira ꞌThõlõmõõnẽ ngeerĩnĩ ꞌcĩ haĩ Rehoboam,
ꞌcĩ baa ĩĩn maaꞌnyĩ Abija.
Nẽ ittira Abija ngeerĩnĩ ꞌcĩ haĩ Atha
8ikia tarĩ ittira Atha ngeerĩnĩ ꞌcĩ haĩ ꞌJehothavat,
nẽ ꞌJehothavatĩ ĩĩn maaꞌnyĩ ꞌJehoramĩ.
Ma nĩngaata ittira ꞌJehoramĩ ngeerĩnĩ ꞌcĩ haĩ Uthia,
9Nẽ ikia ittira Uthia ngeerĩnĩ ꞌcĩ haĩ ꞌJotham,
ꞌcĩ baa aku ĩĩn maaꞌnyĩ Ahathĩ.
Nẽ baa ĩĩ Ahathĩ maaꞌnyĩ Heꞌthekia,
10Ma nĩngaata, ikia ittira Heꞌthekia ngeerĩnĩ ꞌcĩ haĩ Manaaꞌthe,
ꞌcĩ baa ĩĩn maaꞌnyĩ buulenit ꞌcĩ haĩ Amon.
Ikia ũꞌthũwanõõ Amõnĩ nẽ ittira ngeerĩnĩ ꞌcĩ haĩ ꞌJothia,
11nẽ ꞌJothia ikia ittira nyahaappan ꞌcĩ haĩ ꞌJekoniia hĩ ꞌgõtõõnõgĩ, korrioohĩĩ ꞌcĩg baag attĩnganẽẽkĩ habuui cĩ Babiloonnia eet cĩg ꞌJudeei hõõt ĩĩcĩ looc cĩ Babiloonnia.#1:11 Babiloonnia: Urutaa cĩ korriook baag Nõõa, etehenyit eeta ꞌcieeth ꞌcĩ uuni Babela, ꞌcĩ baa hiita hĩĩttĩk eeta uruta Babiloonnia. Ma urutaa cĩ irkiꞌnyia ꞌcĩg mẽẽlĩg, ikia ũũhĩ habuui Nabukadaneetharĩ eet cĩg Ĩꞌthĩraẽlĩ ũgĩ ĩĩcĩ looc cĩ Babiloonnia, baa ĩꞌthaan nẽẽ ꞌJeruꞌthalẽm, irkiꞌnyiaannĩĩ baag ĩĩn ꞌmiiaꞌnya ꞌtur hĩ hẽẽn tũkĩramma (570), baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 11; 2 Habuẽẽt 24-25; Danieele 1:1-7.
12Ma baa ũũhĩ habuui cĩ Babiloonnia eet cĩg ꞌJudeei looccaa cĩ Babiloonnia,
ũũk ittira ꞌJekoniia ngeerĩnĩ ꞌcĩ haĩ Thealtieele,
nẽ ittira Thealtiẽẽlĩ ngeerĩnĩ ꞌcĩ haĩ ꞌTherubbabel,
13nẽ ittira ꞌTherubbabelĩ ngeerĩnĩ ꞌcĩ haĩ Abiud
ꞌcĩ baa aku arrita Eliaakim,
maaꞌnyĩ nyahaappan ꞌcĩ haĩ Athor.
14Ikia ittira Athorĩ ngeerĩnĩ ꞌcĩ haĩ Thadok,
nẽ baa ĩĩ Thadohĩ maaꞌnyĩ nyahaappan ꞌcĩ haĩ Akim,
ꞌcĩ baa hikia hittira ngeerĩnĩ ꞌcĩ haĩ Eliud.
15Nẽ baa ikia aꞌnyak Eliudĩ ngeerĩnĩ ꞌcĩ haĩ Eleathar,
nẽ ikia ittira Eleatharĩ ngeerĩnĩ ꞌcĩ haĩ Matthan,
ꞌcĩ baa hikia haꞌnyak buulenit ꞌcĩ haĩ Yakobo,
16nẽ Yakobo ikia ittira Yothebo,#1:16 Yothebo: Baa ĩĩn Yothebo ciee maac cĩ Maria aattĩ Yeesu. Baa hũnũũk, baa aaĩ Yothebo umwaa ꞌcĩ baa ĩĩn ngeertĩ Yakobo ꞌcĩ baa ammĩnan maaꞌnyia gẽrrẽẽt nẽ utuuyyiõõĩ ꞌgotoonoggia hũũk hĩĩ appahaca eetinii cĩg Ijjibi. Tigiil thõõth cĩnnĩ ꞌBuuhaa cĩ ꞌThianaattõ 30-50. ꞌcĩ baa hikia hũꞌthũwan Maria ꞌcĩ hikia hĩĩ aattĩ Yeesu ꞌcĩ haĩ Krĩstõ.
17Nẽẽthĩ, baa ĩĩn maajiha vẽlẽk ꞌcĩg iꞌthianaanĩ hĩ Abũrahaamõ hõdõlan Daavide õmmõtõ hĩ ꞌwec nẽ iꞌthianaanĩ hĩ Daavide ĩꞌthõng hõdõlan korriook baag õõĩ eeta cĩg Ĩꞌthĩraẽlĩ looccaa cĩ Babiloonnia, õmmõtõ hĩ ꞌwec buúk. Ma ngaati, iꞌthiattaaĩ maajiha õmmõtõ hĩ ꞌwec tarĩ ĩꞌthõng hõdõlan ꞌtirriaanĩt cĩ Krĩstõ.
ꞌTirriaanĩt cĩ Yeesu Krĩstõ
(Tigiil ꞌLuuka 2:1-7)
18ꞌGõõl ꞌcĩ baa arrittiaanĩ Yeesu Krĩstõ cieeni: Baa aaĩ bũhẽẽcĩ umwaa ꞌcĩ haĩ Maria ꞌcĩ ẽlẽmmõõ#1:18 Thõõth ꞌcĩ aĩ ẽlẽmmõõ: Aĩ thõõth ciee nyattaalaa cĩ ꞌJudeei nẽẽ, aruk ẽẽtĩ tĩĩn ꞌgolli ngaaõ, nga hiita hũrũmtĩ hĩ maac hõdẽĩ. hĩ eet ꞌcĩ haĩ Yothebo cĩ hattũũg cĩ habu Daavide. Ma baa nga hũrũmtĩ hõdẽĩ, ikia ummuddia thõõth ꞌcĩ aĩ, aꞌnyak Maria loholeec ꞌcĩ arrittiaa Loriiaa ꞌcĩ Ẽllẽẽmĩthĩ.#1:18 Lori ꞌcĩ Ẽllẽẽmĩthĩ: Ĩĩn Lorii ꞌcĩ Ẽllẽẽmĩth Lori cĩ Nyekuci. Aĩ Yeesu, ĩĩn Nyekuci Maaꞌnyĩ, ne ĩĩ nẽẽ Ngeertĩ Nyekuci. Aĩ thõõth ciee, ĩĩn Maaꞌnyia Nyekuc nẽ ĩĩ Ngeerĩnĩ Yeesu Nyekuc. Nẽ ĩĩ Lorii ꞌcĩ Ẽllẽẽmĩth Nyekuc. Nẽ tarĩ ĩĩtõ Maaꞌnyia hĩ Ngeerĩnĩ hĩ Lori ꞌcĩ Ẽllẽẽmĩth vẽlẽk, Nyekuc Hõdẽẽthõng. Tigiil ꞌBuuk cĩ Yõaannẽ 1:1-18; 8:41-42; Dtiicanĩ cĩg ꞌThooyyiahu 5:3-4. 19Nẽ hĩnĩngĩtĩ baa ĩĩn Yothebo eet ꞌcĩ abũnnaa nẽ hõllõngaa adiim aaꞌnyĩk Maria ngaaoni lothippita, ikia ummuk nẽẽ ꞌgõõl ꞌcĩ occa ũũnnĩkĩ Maria, ꞌgõõlaa ꞌcĩ aitiõõ hõllõngaa aga eeta.
20Ma baa nga ammuk nẽẽ thõõth icci, ikia uduhaak ĩnõõnnõ aajĩlõ#1:20 Aajĩlẽẽt: Ĩĩn aajĩlẽẽta loriẽẽt ꞌcĩg arũmĩ hĩ Nyekuc hẽẽtahujjieen nẽ aitiõõ ĩhõõggõ eleeti tõõ. Ĩꞌthõõa Nyekuci ĩhõõggõ waathinnioohĩĩ ũgẽẽgĩ hiita haꞌnyaktaak nyeemuut cĩ Nyekuci eet loota nĩnga. cĩ Makayyiookto honoothittatõõ ĩĩnnĩk, “Ẽlẽ Yothebo ngeertĩ Daavide, ma hiteelli ngaatĩ aꞌthũwanĩĩ Maria hĩĩ ngaa cunni, hĩnĩngĩtĩ ĩĩn loholeec cĩ aꞌnyak Maria ho, loholeec ꞌcĩ aku hĩ Lori ꞌcĩ Ẽllẽẽmĩthĩ. 21Ũũkca hatĩ nẽẽ loholeec ꞌcĩ maacĩ. Kateek hatĩ loholeec ꞌthaar ꞌcĩg haĩ Yeesu, hĩnĩngĩtĩ ẽẽla hatĩ nẽẽ eet cĩgĩnnĩg ꞌthẽccanẽẽtĩĩ cĩggĩĩng.”
22Baa adĩmanni thooꞌthioha cieeg vẽlẽk hoti, hátĩ hidticattĩ thooꞌthioha cĩg Makayyiooktak baag aduha põrõvẽtaacĩ#1:22 Põrõvẽtaac: Ĩĩn põrõvẽtaacĩ eet ꞌcĩ athĩkna nyeemuut hĩ Nyekuc nẽ ikia uduhaak eeta. aĩ, 23“Ũũkca hatĩ bũhẽẽcĩ ꞌcĩ nga hatagguutho hĩ eet, loholeec ꞌcĩ maacĩ nẽ hatĩ hĩĩtõ ꞌthaar cĩgĩnnĩg Emmanuele,” Nĩngĩtĩ aĩ, “Aaĩ Nyekuci hĩ ngagĩĩta.”#Tigiil ꞌBuuk cĩ Iꞌthaia 7:14
24Ma baa ĩtĩnga Yothebo ũꞌnyaahĩ, ikia ĩdĩman nẽẽ thõõth baa aduhaak ĩnõõnnõ aajĩlõ cĩ Makayyiookto nẽ ũũhĩ Maria hĩĩ ngaa cĩnnĩ. 25Nẽẽthĩ, baa nga hatagguutho Yothebo hĩ Maria ĩꞌthõng hũtũhũa nẽẽ loholeec. Nĩngĩtĩ akannẽẽkĩ Yothebo loholeec ꞌthaar ꞌcĩg haĩ Yeesu.

© 2017 Wycliffe Bible Translators, Inc., All rights reserved.

Ulteriori Informazioni Su ꞌBuuk cĩ Thõõth cĩ Nyekuci