Malika 3
3
Ieisu tomoqo dimana gemwayana ikavegiagiamaia
Madiu 12:9-14; Luke 6:6-11
1Tamo Kaiata Kabaveyawai waineye Ieisu ivila-vaituqana ilugu sinagogi naqeneye tomoqo dimana gemwayana ikiseni imiamia. 2We tupwaidiavo tomo'otoqa wayaqidi Ieisu inavemwauya, beqa iematakaikaieni kago togemwaya inakavegiagiamaia Kaiata Kabaveyawai waineye.
3We tomoqo dimana gemwayana ivoneni ivo, “Kumai kutovoi tomo'otoqa matadie.” 4Matautauda ivelautoliedi ivo, “Vakai loina gumanina giamaina Kaiata Kabaveyawai paipaina: Giamaina taivalabubuni o kapoina taivalabubuni? Oge tomoqo yawaina taiketoyavuya o yawaina taikavekapoi?” Ge tamo aitoi navelautoli idabaivilai.
5Matautauda Ieisu mekanakapoka waidie ikisalelele. Beqa Ieisu nuana ikapo divedeba-pakala paipaina. Matautauda tomoqo dimana gemwayana ivoneni ivo, “Dimamu kusiketoi.” We dimana isiketoi ivegiagiamai-vaituqana. 6Beqa Palisivo itauya inaqo Kini Elodi kanatokaivaisavo waidie,#3:6 Elodianavo (Herodians) me Diu Kini Elodi natomo'otoqavo Loma gabemani kaditokaivaisa. Me Diu puepuedi wete Palisivo taiauda inuanuana dede gumanidiavo toketoqiluva. Tutuya puena Palisivo wete Elodianavo kaditalavuala dede tutuya iluvetaubama Ieisu ietalavualeni. Kwaiwawai Malika 12:13; Madiu 22:15, 16. taiauda nuanua italaqi Ieisu inaluvewapai.
Yoko bwaigina Ieisu ivemulieni
7-8Beqa Ieisu mekanatovemulivo inaqo Waya Galili doleneye. Yoko bwaigina Galilieqa italakwavini. Tomo'otoqa puedi valea inoqai Ieisu kabanuavilele ivalabubunidi beqa imai waineye Iudia, Ielusalema, Idumea wete tupwaidiavo vikai Bwasi Iolidani vivineye waidie'eqa we Taia wete Saidoni vividie waidie'eqa.
9-10 #
Mak 4:1
Tomo'otoqa puedi Ieisu gunabeida ikavegiagiamaidi beqa toviqa iebibipelapela wayaqidi Ieisu inakavikavini. Paina yoko bwaigina, we Ieisu ge wayaqina inabibini beqa kanatovemulivo ivonedi ivo, “Waga kwavalabubuni paipaigu inakenokeno.” 11We tutuya puena vaitabu kapoidi tomo'otoqa iekuniqedi Ieisu ikiseni isobwanu mataneye iveqole ivo, “Komu, Yaubada Natuna!” 12We ivona-veluveluluna ivo, “Ge tamo aitoi kwaivoneni Yau paipaigu.”
Ieisu apositolovo 12 ivesinuedi
Madiu 10:1; Luke 6:12-16
13Ieisu ilaga koya waineye tomoqovo gumanidiavo wayaqina iqoledi imai waineye. 14Tutuyanina imai waineye tomoqovo 12 ivesinuedi taiauda inanaqo we kadiwavaqa iqoledi apositolovo. We ivonedi ivo, “Yau wayaqigu komi taiauda taimiamia mulineye aivetunemi kwainaqo Guvalea Giamaina kwailauguguyeni tomo'otoqa waidie. 15We tutuyanina aivetunemi lauguguya paipaina veluluna aivelemi kanasala vaitabu kapoidi kwaikwavinedi tomo'otoqa naqedie.” 16We apositolovo 12 ivesinuedi kadiwavaqa deqoidi:
Saimoni (Ieisu iqoleni Pita kananuakawananaqai gileu),
17Sebedi natunavo Iemesa taina Ioni taiauda, Ieisu iqoledi Boanege (kananuakawananaqai Kanitala Natunavo)
18Anidulu,
Pilipi,
Batolomiu,
Madiu kanawavaqa tamo Libai,
Tomasi,
Iemesa, Alipio natuna,
Tadiasi,
Saimoni gumanina Seloti #3:18 Seloti kananuakawananaqai tamo yoko wayaqidi Loma gabemani kanatogumeta taiauda ilalauqavia.
19we Iudasa Isakaliota gumanina Ieisu kanatoketoqiluva.
Tomo'otoqa ivo Ieisu vaitabu kapoina iekuniqeni
Madiu 12:22-32; Luke 11:14-23; 12:10
20We Ieisu mekanatovemulivo taiauda inaqo tamo vanuqa waineye ilugu, we yoko bwaigina isikauqa-vaituqana waineye, we ge kadisala inakani. 21Tutuyanina nasusuvo inoqai paipaina ivo, “Gumanina qauqauna,” we inaqo wayaqidi inamaseagai inanaweni divanuqa waineye.
22Tutuyanina Ieisu nasusuvo inaqo, tupwaidiavo Mosese naloina kanatovekaivevenavo Ielusalemaeqa iobuma iesipupu, “Bialesibubi kaisena gumanina vaitabu kapoidi kaditogumeta Ieisu iekuniqeni! Vaitabu kapoina ditogumeta naveluluna beqa kanasala vaitabu kapoidi inakwavinedi.”
23Beqa Ieisu loina kanatovekaivevenavo iqoledi waidie ivesipupu vonawakedubalaeqa ivo, “Banikodiqa, Seitani kanasala Seitani inakwavineni? 24Kago kabaloina tamoqana inaketovegeia yoko kailuqa taiauda inaetalaqa, no kabaloinanina ge kanasala inakenokeno. 25Wete mesaida susu tamoqana inaketovegeia yoko kailuqa ediavo taiauda inaetalaqa, no susunina ge kanasala inamiamia. 26Beqa kago Seitani nakabaloina inaketovegeia nayokovo taiauda inaetalaqa ge kanasala inakenokeno kaia inakakava. 27Dede vonawakedubala#3:27Ieisu iesipupu vonawakedubalaeqa gumanina Seitani ivelulunapeleni gumanina mesaida tomoqo veluvelulunina beqa lamunanina Ieisu kanasala vaitabu kapoidi tomo'otoqa naqedie inakwavinedi inasauyedi. Kwaiwawai Aisea 49:24-26. Seitani paipaina: Ge tamo aitoi kanasala tomoqo veluvelulunina navanuqe inalugu nasakuvo inavainaqodi, we naqaida tomoqonina veluvelulunina inayoqoni matautauda kanasala nasakuvo vanuqe'eqa inavainaqodi.
28“Yau avona-mwaqitana waimie Yaubada kanasala tomo'otoqa dikapoina puena wete divonakapo ge medivekimatana puena inanuataqonidi.#3:28Ieisu vaitabu kapoidi ikwavinedi isauyedi Vaitabu Maqemaqetana navelulunaeqa. Tutuyanina loina kanatovekaivevenavo ivesipupu Ieisu dede mesaida ivavalabubuna vaitabu kapoidi kanatogumeta navelulunaeqa Yaubada Vaitabuna Maqemaqetana ge idavekimataneni, we kaia ivovona-kapo isisiwataoi. Beqa Yaubada ge kanasala dikapoina inanuataqonidi. 29We kago aitoi Yaubada Vaitabuna ge inavekimataneniqa paipaina inavona-kapo inasiwataoi, Yaubada ge kanasala nakapoinanina inanuataqoni, we nakapoinanina inakeno-vaqata.” 30We Ieisu dede mesaida ivonedi, paina vaitabu kapoidi ikekewaluguaqetedi Yaubada Vaitabuna navelulunaeqa, we tomo'otoqa vonamaimaiqaeqa iesipupu Yaubada Vaitabuna waineye paina iesipupu ivo, “Vaitabu kapoina Ieisu iluguya.”
Ieisu nasusuvo'otoqa
Madiu 12:46-50; Luke 8:19-21
31Ieisu nasusuvo imai ilekwa vanuqa waineye maleweye itovotovoi. Tamo tomoqo ivetuneni inaqoleni. 32We yoko bwaigina imia-kwaikwaipipineni we tupwaidiavo tomo'otoqa ivoneni ivo, “Inamu, taimwavo, novumwavo maleweye ilalaualemu.”
33Ibaivila waidie ivo, “Aitoi gumanina inagu wete meqavoi taigwavo?” 34Matautauda ikisalelele tomo'otoqa ikisedi imia-kwaikwaipipineni ivo, “Kwakiseni! Dede tomo'otoqanidiavo kaia Yau inagwavo wete taigwavo! 35Aitoi gumanina Yaubada nanuanuana ivavalabubuniqa gumanina taigu, novugu wete inagu.”
Attualmente Selezionati:
Malika 3: mzz
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2023 (Active), Wycliffe Bible Translators, Inc. All rights reserved.