Kusintii Andunya 1
1
Ilaaɔ̃ í taka andunya
1Hai sinte Ilaaɔ̃i í taka lele do ilɛ.
2Ilɛ í wɛɛi wo kù nɛ yaase, nkãma kù wa si. Inyii wa tɛ bii fei nɔ ilu kuku í biiɛ. Do lelei inyiu bɛi hundei Ilaaɔ̃ í ya maa yaa. 3Ŋɔi Ilaaɔ̃ í ni, inya kumá ku ce, nɔ inya kumá í ce. 4Nɔ Ilaaɔ̃ í yɛ inya kumáu í sĩa, nɔ í fɛɛfɛ inya kumá do ilu kuku. 5Nɔ í kpe inya kumáu dasã, ilu kukuu mɔ idũ. Si bɛɛbɛi í ceò alɛò daakɔ, nɔ nŋu bɛi í jɛ ajɔ sinte.
6Nɔ Ilaaɔ̃ í ni afe ku ce ku kpɛ̃ lele do inyiu. 7Nɔ nŋu mɔ í ce. Bɛɛbɛi Ilaaɔ̃ í ce í taka afe í fɛɛfɛò inyi iyi í wa lele do iyi í wa ilɛ. 8Nɔ í kpe afeu lelei Aɔ̃. Si bɛɛbɛi í ceò alɛò daakɔ, nɔ nŋu bɛi í jɛ ajɔ minjisia.
9Nɔ Ilaaɔ̃ í ni má, inyi iyi í wa abɛi afeu ku tɔtɔɔ inya akã, nɔ ilɛ ngbɛ mɔ ku wɛɛ ikã. Nɔ nŋu mɔ í ce bɛɛbɛ. 10Nɔ Ilaaɔ̃ í kpe bii í gbɛu ilɛ nɔ í kpe bii inyi í tɔtɔɔu mɔ tenku. Nɔ Ilaaɔ̃ í yɛ iyi nŋu mɔ í sĩa. 11Si anyiɛ nɔ Ilaaɔ̃ í ni mii tũtũ ku fita ku bii ilɛ, hai fɔfɔ ŋa do iju nŋa ŋa hee do jĩi ŋa iyi aa ya maa so. Aŋa fei aa ya maa soi si dimi nŋa ikã ikã. Nɔ inɛ nŋu mɔ í ce bɛɛbɛ. 12Nɔ mii tũtũ í fita si ilɛ, hai fɔfɔ ŋa do iju nŋa ŋa, hee do jĩi ŋa iyi à ya maa so si dimi nŋa ikã ikã. Nɔ Ilaaɔ̃ í yɔɔ iyi bɛɛbɛ mɔ í sĩa. 13Si bɛɛbɛi í ceò alɛò daakɔ. Nɔ nŋu mɔ í jɛ ajɔ mɛɛtasia.
14Nɔ Ilaaɔ̃ í ni mii ku má inya ŋa a maa má inya lelei Aɔ̃ bɛ a fɛɛfɛ dasã do idũ, nɔ a jɛ nyinda ŋa iyi aa nyisi waatii jingau ŋa do ajɔ do adɔ̃ ŋa. 15Hai lele bɛ a má inya wa si ilɛ. Nɔ bɛɛbɛi nŋu mɔ í ce. 16Ilaaɔ̃ í ce mii nla minji iyi à ya maa má inya. Í ce inunu iyi í la í re ku jɛ ti dasã, cukpa mɔ iyi kù toou ku jɛ ti idũ. Nɔ í ce leleaɔ̃ ŋa má. 17Mii ŋau bɛ fei í jilɛ ŋa lele bɛi a ya maa má inya wa si ilɛ, 18nɔ ku jɛ ti dasã do ti idũ, nɔ ku fɛɛfɛ inya kumá do ilu kuku. Ŋɔi Ilaaɔ̃ í yɛ iyi nŋu mɔ í sĩa. 19Si bɛɛbɛi í ceò alɛò daakɔ nɔ nŋu mɔ í jɛ ajɔ mɛɛsia.
20Nɔ Ilaaɔ̃ í ni inyi ku ce mii ilu hunde nkpɔ nkpɔ si inɔɛ, nɔ yɛi ŋa a maa fo lele. 21Nɔ í taka cɛ̃ɛ nla ŋa do mii ilu hunde ŋa si dimi nŋa ikã ikã iyi à wa si inɔ inyi do yɛi ŋa si dimi nŋa ikã ikã fei. Nɔ í yɛ iyi nŋu mɔ í sĩa. 22Si anyiɛ ŋɔi í wee nŋa í ni, i bí ku kpɔ ŋa hee tenkuu fei ku kɔ̃, nɔ yɛi ŋa mɔ a kpɔ si andunya. 23Si bɛɛbɛi í ceò alɛò daakɔ, nɔ nŋu mɔ í jɛ ajɔ miiusia.
24Nɔ Ilaaɔ̃ í ni iŋa dimi ikã ikã fei ku ce si ilɛ, hai mɛɛmui inɔ ilu ŋa do iŋa hai nɛ nto ŋa do mɛɛmui sako ŋa, fei ndɛɛ fei ikã ikã. Nɔ bɛɛbɛi nŋu mɔ í ce. 25Ilaaɔ̃ í ce mɛɛmui sako ikã ikã fei si dimi nŋa, do mɛɛmui inɔ ilu ŋa, do iŋa hai nɛ nto ŋa. Nɔ í yɛ iyi nŋu mɔ í sĩa.
26Si anyiɛ nɔ Ilaaɔ̃ í ni, ka taka amanɛ si yaasei awa taka nwa, nɔ ku jɔ wa, ku jɛ inɛ ngbo si cɛ̃ɛi tenku ŋa do si yɛi ŋa do si mɛɛmui inɔ ilu ŋa, do si iŋa hai nɛ nto ŋa fei, hee do si ilɛ fei. 27Ilaaɔ̃ í taka amanɛ í jɔ nŋu takaɛ mam mam. Í taka inɛmɔkɔ do inaabo. 28Nɔ Ilaaɔ̃ í wee nŋa í sɔ̃ ŋa í ni, i bí ku kpɔ ŋa, ilɛ fei ku kɔ̃ nɔ ku jɛ tu ŋɛ, nɔ i maa jɛ inɛ ngbo si cɛ̃ɛi inɔ inyi ŋau do si yɛi ŋa do si mɛɛmu ŋa iyi à wa si ilɛu ihɛ̃ fei. 29Nɔ Ilaaɔ̃ í ni, i cɔ, fɔfɔ ŋa do iju nŋa ŋa iyi à ya fita si ilɛ fei hee do jĩi ku so ŋa fei, ǹ mu nŋɛi ku jɛ ijɛ nŋɛ. 30Bɛɛbɛ mɔi an jɔ̀ mii ku nɛ ngbo iyi í ya fita si ilɛ fei ku jɛ ijɛi mɛɛmu ŋa iyi à wa si andunya fei, hee do yɛi ŋa fei, hee do iŋa hai nɛ nto ŋa fei do mii ilu hunde iyi í wa si ilɛ fei. Nɔ nŋu mɔ í ce bɛɛbɛ. 31Nɔ Ilaaɔ̃ í cɔ mii iyi nŋu í ce fei, nɔ í yɔɔ iyi í sĩa jiida jiida. Si bɛɛbɛi í ceò alɛò daakɔ nɔ í jɛ ajɔ mɛɛfasia.
Attualmente Selezionati:
Kusintii Andunya 1: MKL
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
2021, SIM International et UEEB