Yokaana 16
16
1“Bini byona byona mbibakobeire muleke okubula. 2Balibapeka omu makumbaaniro, mananu ekiro kikwiza buli muntu akaitire nalirowooza nti aweereize Kanca. 3Balikola ebintu nka bini kubba tibeetejerye Ite wange nanje tibaneetejerye. 4Kini nkibakobeire, akaire ako nikaliikiira leke mwizukire nti nabalabwire. Tinakibakobeire omu kwekeera kubba naali ncaali naanywe.
Omulumo gwa Mwoyo Akwera
5“Ati nkwaba egiri oIte wange eyantumire, baitu ndoowo oku nywe akumbuulya ati, ‘Okwaba ayi?’ 6Olwa bigambo ebyo byembakobere nikyo mwenatiriire. 7Baitu kambakobere amananu, okwaba kwange kukubagasa, kubba nintayabe, oMwoyo Akwera taliiza gyemuli. Baitu ninayaba, ndimutuma gyemuli. 8Naliiza, alirumiirya abantu ba nsi nti baawubirwe oku kibbi, oku bwikiiri nʼoku kusala omusango: 9balina endowooza egibbi oku kibbi kubba tibaanyikiririzaamu, 10balina endowooza egibbi oku bwikiiri, kubba nkwaba egiri oIte wange era timwairemu kumbona, 11era balina endowooza egibbi oku ndamula ya musango kubba omufugi wa nsi eni ajunainwe.
12“Ndina ebindi bingi ebya kubakobera baitu timukusobola kubyeteja ati. 13Baitu oMwoyo oyo alanga amananu naliiza, alibalanga amananu goona goona. Talibaza ku bwamwe, alibaza ebyo byonkai byawura era alibakobera ebiribba nibiri ampi okubbaawo. 14Alimpeesya ekitiinisya nakutoola oku bigambo byange nʼabibakobera nywe. 15Buli kintu ekya Ite wange, kyange. Nikyo mbakobeire nti oMwoyo alitoola oku bigambo byange nʼabibakobera nywe.”
Okwenatira kulifooka okusemeerwa
16OYesu niyeeyongera nʼabakoba ati, “Wasigaire akaire kadooli mubbe nimutacambona erate waakalewo akaire kadooli mwiremu okumbona.”
17Abamwei oku beegesebwa baamwe ni babuulyangana bati, “Abba akumanyisyaki nakoba ati wasigaire akaire kadooli mubbe nimutacambona erate waakalewo akaire kadooli mwiremu okumbona era ati kubba nkwaba ewa Taata?” 18Baasigaire bakwebuulya bati, “Abba akumanyisya ki nakoba ati akaire kadooli? Kyakukoba titukukyeteja.”
19OYesu niyaboine nga bakwendya okumubuulya oku kini, nʼabakoba ati, “Mukubuulyanganate kyenamanyisyanga ninakobere nti, ‘Wasigaire akaire kadooli mubbe nimutacambona erate waakalewo akaire kadooli mwiremu okumbona?’ 20Kambakobere amananu, mulikubba ebiboobo era muli kungubaga nga yo ensi ekusemeerwa. Mulyenatira, baitu okwenatira kwanywe kulifooka okusemeerwa. 21Omukali nayindukwa abba mu bulumi kubba abba ayindukirwe, baitu omwana namala okubyalwa, yeebeera obulumi olwa kusemeerwa kubba omwana abba abyairwe omu nsi. 22Naanywe nimwo mutyo ati buni mukulumwa, baitu ndiiramu mbabone, mulisemeerwa era ndoowo muntu alibaiyaku kusemeerwa kwanywe. 23Oku kiro ekyo, timulinsaba kintu kyona kyona. Nkubakobera mananu, oIte wange alibaweerya kyemulisaba kyona kyona omwibara ryange. 24Okwica ati timukasabanga kintu kyona kyona omwibara ryange. Musabe, mwalitunga leke okusemeerwa kwanywe kwikiire.”
Obusinguli oku Nsi
25OYesu ni yeeyongera okukoba ati, “Gonze nga mbaire nkubazira mu nfumo, akaire kakwiza nintalibazira mu nfumo, baitu mbakobere lwatu ebikukwata okwIte wange. 26Oku kiro ekyo, mulisaba omwibara ryange. Tinkukoba nti ndisaba oIte wange oku lwanywe. 27OIte wange omwenyenere abendya kubba munyendya era mwikiriza nti naligire wa Kanca. 28Naligire wa Ite wange okwiza oku nsi. Ati ensi nkugirigamu, nkwirayo ewa Ite wange.”
29Awo abeegesebwa baamwe ni bakoba bati, “Ati okubaza lwatu, ti mu nfumo. 30Ati twetejerye nti omaite ebintu byona byona era tikikwetaagisya muntu yeena yeena kukubuulya bibuulyo. Kini kikutwikirizisya nti waligire wa Kanca.”
31OYesu nʼababuulya ati, “Mumaare nimwikiriza? 32Baitu ebiro bikwiza era biikire, nimulyenaganaga, buli omwei nayabire omweka yaamwe. Mulindekawo njenkai, baitu nga tindi njenkai kubba oIte wange abba amwei nanje. 33Mbakobeire ebintu bini leke musobole okubba nʼemirembe omu nje. Mulibonaabona omu nsi, baitu mugume nje ensi ngisingwire.”
Valið núna:
Yokaana 16: RUULI-NYALA
Áherslumerki
Deildu
Afrita
Want to have your highlights saved across all your devices? Sign up or sign in