San Mateo 28
28
Jesuska kawsarirka
(Mr 16.1-8; Lc 24.1-12; Jn 20.1-10)
1Pasashkan washa samana punchaka, pakarishkanwasha puntiru puncha semanaka, Magdalamanta Maria shuk Mariawa pakta rirkakuna rikunapa Jesuspa panparishkanta. 2Kunkaymanta, tiyarka atun allpa kuyuy. Shuk Yaya Diospa angel uraykushkanrayku silumanta, anchuchishpan chay rumita, tiyarirka awanpi. 3Chay angelka chuyahlla illanpashina rikurirka, churarinanka karka suma yura puyushina. 4Chayta rikushpankuna, suntalukunaka manchaywa chukchurishpa wañushkashina kiparirkakuna. 5Chaypiña angelka rimarka chay warmikunata: “Ama manchaychichu. Yachani maskahushkaykichita Jesusta, maykanmi kashka klavarishka kruspi. 6Mana kaypiñachu kahu, ñami kawsarishka, imashnami payka rimarka. Shamuychi rikuychi maypimi churarishka kashka yaya Jesuska. 7Kunanka, riychi utkalla rimakriychi paypa disipulunkunata Jesuska ñami kawsarimushka wañushkanmanta. Kunanka rihumi kankunamanta puntapi Galileama; chaypi rikunkichi. Chayllatami kankunata rimani”.
8Chaypiña paykunaka llukshirkakuna chay uchkumanta mancharishka chaymantapas kushikushpa, chasna rirkakuna kallpashpa rimakrinankunapa disipulunkunata. 9Rihushkankunapi Jesuska paykunata rikurishpan saludarka. Paykunaka kayllayashpankuna kumurishpa chakinta ukllarishpankuna payta yapa kushichirkakuna. 10Chaypiña Jesuska paykunata rimarka: “Ama manchariychichu. Kunalla rishpaykichi rimakriychi wawkinikunata, rinankunapa Galileama. Chaypimi rikuwankakuna”.
Suntalukunaka llullashpa rimarkakuna
11Chaymanta chay warmikuna Jerusalén llaktama rihushpankuna chay kuyrak suntalukunapas chay llaktapillatata paktarkakuna. Paykunaka saserdotekunapa apunkunata kwintarkakuna tukuy pasashkakunata. 12Kaykunaka tantarirkakuna rukukunawa, kwintashkankuna washa suntalukunata kurkakuna achka kullkita 13Chaypi rimarkakuna: “Kankunaka rimaychi disipulunkunami tutapi shamushpankuna aychanta apashkakuna, kankunaka puñunaykichikama. 14Imashnamanta apuka yachashpanka kaymanta, ñukanchimi shutipatashina rimashpanchi kankunata kishpichishu”.
15Chay suntalukunaka apishpankuna kullkita chay kunashkankunata kasushpa rirkakuna. Kay yuyaywami kiparirkakuna Judiu runakunaka kunan punchakama.
Jesuska disipulunkunata kamachirka yachachik rinankunapa
(Mr 16.14-18; Lc 24.36-49; Jn 20.19-23)
16Chaymanta chay chunka shuk disipulunkunaka rirkakuna Galileama, chay urkuma maypimi Jesús rimarka rinankunapa. 17Rikushpankuna, payta kunkurishpa kushichirkakuna. Shukkunaka mana kirinayarkakunachu.
18Chaypiña Jesuska paykunata kayllayashpan rimarka: “Yaya Dios churawashka kay allpapi silupipas shuklla kamachik kanaynipa. 19Kunanka, riychi yachachikriychi tukuy llaktakunapi paykunapas ñukata katikkuna tukunankunapa. Chay kirikkunata bawtisaychi Yaya Diospa shutinpi, paypa Wawanpa shutinpi chaymantapas Espíritu Santupa shutinpi. 20Yachachiychi paykunatapas tukuy kamachishkaynita paktachinankunapa maykantami kankunatapas kamachishkani. Ñukaka kankunawami kasha tukuy puncha, kay mundu tukurinankama”. Chasna kachu.
Valið núna:
San Mateo 28: QUP_B
Áherslumerki
Deildu
Afrita
Want to have your highlights saved across all your devices? Sign up or sign in
© 2025 AIDIA
© 2025 Seed Company