Yohani 1
1
Luchowo lwa uwumi
1Kuhumila pamwandi kukali na Luchowo. Uyo Luchowo akali na Nguluvi na mwene akali Nguluvi. 2Kuhuma pamwandi Luchowo akali pamwi na Nguluvi. 3Nguluvi awumbile finu fyonda kuchumbila mwene, kwihela kinu kyokyonda kyekiwumbilwe ngajila mwene. 4Luchowo uyo akali luvangilo lwa uwumi na uwumi ugo ukaletile welu kwa vanu. 5Welu ugo ung'alika mukisi na kisi lilemwile kulichima.
6Nguluvi akamlagiliche mnanzi vake, litawa lyake Yohani. 7Yohani akachile kuvalongela vanu njowo cha welu ugo, neke vanu vonda vapulike njowo icho na kudikila. 8Yohani seakali welu ugo, ila akachile kuvalongela vanu njowo cha welu. 9Welu ugo ukali welu va undakyene, welu veukwacha kuinyi na kuvang'alicha vanu vonda.
10Suwe, luchowo akali muinyi mumu, kuchumbila mwene Nguluvi akawumbile inyi yonda, ila vanu vonda va muinyi sevakamuchele. 11Akachile kwa vanu vake, ila vanu vake sevakamwanuke. 12Ila vale vanu vevamwanuke na kumwidikila, akavagitile kuva vana va Nguluvi. 13Vene nde vana va Nguluvi, vesevababilwe kwa kung'ang'a vanu, ila vababilwe na Nguluvi yumwene.
14Luchowo ulo akachile akava munu, akalile kwa nefwe. Nefwe tuhuwene ukomi vake, ukomi vake veawanuke ngita Mwana vaweka kuhuma kwa Daada, amemile usanzi na undakyene.
15Yohani akavalongiye vanu njowo cha uyo munu kwa kulandula, “Uyu nde yendikali ndikuvalongela, ‘Ikwacha munu yumwi kumbele lyangu ndi mkomi kuchumba nene, kwakuva mwene akali chipindi nene ndave kubabwa.’”
16Kuhumila na uvolofu va usanzi vake, atugavile nefwe vonda lufunyo longofu. 17Nguluvi atugavile Malagilicho kuchumbila Musa, ila usanzi na undakyene tuwanuke kuchumbila Yesu Kilisito. 18Kwahela munu yeamwene Nguluvi ng'odo. Ila nefwe tumchelile Nguluvi kuchumbila Mwana va weka hela, mwene ndi Nguluvi yeagehe pamwi na Daada.
Unanzi va Yohani Mbatisa
Matayo 3.1-12; Maliko 1.1-8; Luka 3.1-18
19Vakomi va Vayawudi va ku Yelusalemu vakavalagiliche vamonga va vatekechi na Valawi vahelele kwa Yohani mbatisa vamuhuche, “Veve ndi ani?” 20Yohani seakanile kuvahiga, ila akavalongela undakyene kuva, “Nene se Kilisito Mkombosi yeaguliwe na Nguluvi.”
21Baho, vakamuhucha kangi, “Veve ndi ani? Wuli, veve Elia?”
Yohani akahigile, “Se nene.”
“Wuli, veve ndi yula mvichi Elia?”
Yohani akavahigile, “Se nene!”
22Suwe, tulongele, “Veve ndi ani? Ukwilongela liki yumwene? Tulongele, neke tuvasindikile lihigilo vala yevatulagiliche.”
23Yohani akavahigile, “Ngita pealongile mvichi Isaya,
‘Munu yumwi ikemela kuhuma kudasi,
Mugolole ng'asi lya Mtwa!’”
24Vanu vala valagilichwe na Vafalisayo, 25vakamuhucha Yohani, “Ngita veve se Kilisito Mkombosi yeaguliwe na Nguluvi, vala se Elia na se yula mvichi va Nguluvi, wuli wibatisa?”
26Yohani akavahigile, “Nene ndikuvabatisa kwa malega, ila agehe yumwi pagati yenu, yesemumchele. 27Nene ndilonguwe ila dayeikwacha, nene sendidikilwa kuwopola ndegei cha makobasi gyake.”
28Makani aga gagitilwe ukoya Betania, kumwambo lya mgoka Yolidani, pono peakali ibatisa Yohani.
Yesu ndi Mwanang'ondolo va Nguluvi
29Pamilau lyake, Yohani akamwene Yesu akumwachila. Yohani akavalongela vale vanu vevagehe pala, “Lole, uyu nde Mwanang'ondolo va Nguluvi yeihecha sambi cha vanu vonda! 30Uyu nde yendikavalongie makani gyake, ‘Munu yeikwacha kumbele lyangu ndi mkomi kuchumba nene, kwakuva mwene akali chipindi nene sendibabilwe.’ 31Nene sendikamchele, ila ndachile kubatisa kwa malenga neke vanu Vaisilaeli vamchele.”
32Yohani akavalongile gala geagawene kuva, “Ndikawonile Muhe va Nguluvi ngita ng'unda kuhuma kuluhano kwa Nguluvi na kutula mutuwe vake. 33Nene sendikamchele, ila Nguluvi yeanilagiliche kuvabatisa vanu kwa malenga, akali andongile, ‘Yula munu dakumlola yeikwikilwa na Muhe kuhuma kuluhano na kwikala kukyanya lyake, munu uyo nde akuvabatisa kwa Muhe vangu.’” 34Baho, Yohani akalongile kangi, “Nene ndiwene lukani ulu na ndikuvalongela ndakyene kuva uyu ndi Mwana va Nguluvi.”
Yesu akuvahagula vachulila va kwanja
35Pamilau lyake, Yohani akali bahala pamwi na vachulila vake vavili. 36Baho, akamwene Yesu ichumba, akalonga, “Lole! Uyu nde Mwanang'ondolo va Nguluvi.”
37Vala vachulila vavili vakampulike Yohani akilonga njowo icho, vakamuheleliye Yesu. 38Yesu akaseduke na peavawene avo vachulila vakumuhachila akavahucha, “Mwisaka liki?”
Vakamuhigile, “Rabi” Mana lyake muwulanichi, “Wikala kwiya?”
39Yesu akavahigile, “Mwache mpalole.” Suwe, vachulila vakamuheleliye, vakapawene pono peikala, vakahuwe pamwi na mwene kigono ikyo. Ikali saa kyumi palumiye.
40Yumwi va vala vavili vevakali vampulike Yohani akilonga na kumuheleliya Yesu, akali Andelea mkolo vake Simoni Peteli. 41Baho baho, Andelea akahelele tandi kumlongela mkolo vake Simoni kuva, “Tumwene Mkombosi yula yeahaguliwe na Nguluvi” Mana lyake, “Kilisito.” 42Baho, Andelea akamsindike Simoni kwa Yesu.
Yesu akamlolile Simoni na akalonga, “Veve ndi Simoni mwana va Yohani. Kuvangila neng'uli daukemelwa Kefa” Kwa Kigiliki ndi Peteli, Mana lyake, “Liganga.”
Yesu akuvakemela Filipo na Natanaeli
43Pamilau lyake, Yesu akalamuwe kuhelela muinyi lya ku Galilaya. Baho, akamwene Filipo akamlongiye, “Wache.” 44Filipo akali mwenekaye va ku Betisaida, mwani pevakala Andelea na Peteli. 45Suwe, Filipo akamwene Natanaeli, akamlongiye, “Tumwene munu yula ngita Musa peasimbile mukiganulo kya malagilicho ngita vavichi va Nguluvi pevasimbile makani gyake. Mwene nde Yesu Mwana va Yusufu kuhuma mwani va ku Nasaleti.”
46Ila, Natanieli akamuhucha Filipo, “Wuli, kinu kinofu kiwesa kuhuma mwani va ku Nasaleti?”
Filipo akamuhigile, “Wache lole.”
47Yesu peamwene Natanieli ikwacha kwa mwene, akalonga, “Lole! Munu uyu ndakyene ndi Muisilaeli, mwene semdesi.”
48Natanieli akamuhucha, “Ukunichela wuli?”
Yesu akamuhigile, “Ndikuwene, peukali panyi lya libiki lya mkuyu, peave Filipo kukukemela.”
49Baho, Natanieli akamuhigile, “Veve muwalanichi, neng'uli ndichela kuva veve ndi Mwana va Nguluvi! Veve ndi Ng'achale va inyi lya Isilaeli!”
50Yesu akamuhuchile, “Wuli, udikila kwakuva ndikulongile kuva ndikuwene panyi lya libiki lya mkuyu? Daulola makani makomi kuchumba aga!” 51Baho, Yesu akavalongela, “Ndakyene, ndikuvalongela, damwilola luhano chidinduka na kuvawona vandumindumi va Nguluvi vakikang'ala na kukwika kukyanya lya Mwana va Munu!”
Valið núna:
Yohani 1: NTBnBL2025
Áherslumerki
Deildu
Afrita
Want to have your highlights saved across all your devices? Sign up or sign in
The New Testament in Benamanga @The Word for The World International and Benamanga Language translation, 2025. All rights reserved.