انجیلِ یوحنا 15
15
مِ رَزِ حقیقی یَم
1«مِ رَزِ حقیقی یَم وِ بُوم باغبونِه. 2هر کِلغِه‌ای مِنُم که میوَه نَیارِه، وِه نَه ایبِرِه، وِ هر کِلغِه‌ای که میوَه بیارِه، وِه نَه هَرَس ایکِنِه تا بیشتر میوَه بیارِه. 3ایشا هَمیسو وَ خاطرِ کلامی که وَ ایشا گُتِمِه، پاکیت. 4وِیسیت مِنُم، وِ مِ هَم ایوِیسُم مِنِه ایشا. هَموطو که اَر کِلغَه نَوِیسِه مِنِه رَز نیتَرِه وَ خُوش میوَه بیارِه، ایشا هَم اَر نَوِیسیت مِنُم نیتَریت میوَه بیاریت.»
5«مِ رَزُم وِ ایشا کِلغِه‌یَلِ وُه. کسی که ایوِیسِه مِنُم وِ مو مِنِه وُّ، یِکِلی میوه ایارِه؛ سی‌یِکِه جیا وَ مِ هیچ نیتَریت کِنیت. 6اَر کسی نَوِیسِه مِنُم، مِی کِلغِه‌ای یَه که وِرِش اییِن اوبال وِ خشک ایابو. کِلغِه‌یَلِ خشک وابی‌یَه نَه جَم ایکِنِن وُ وِرِشون اییِن مِنِه تَش، ایسوزَنِن. 7اَر وِیسیت مِنُم وِ کلامُم وِیسِه مِنِه ایشا، هر چیئی که ایخِیت، درخواس کِنیت که سیتون کِردَه ایابو. 8جلالِ بُوم مِنِه یِنِه که ایشا یِکِلی میوه بیاریت؛ وُ وَ ای صورت شاگردِ مِ ایابِیت.»
9«هَموطو که بُو مِنَه دوس داشتِه، مِ هَم ایشا نَه دوس داشتِمِه؛ وِیسیت مِنِه محبتُم. 10اَر حُکمَلِ مِنَه نِگَه کِنیت، ایوِیسیت مِنِه محبتُم؛ هَموطو که مِ حُکمَلِ بُو خِمَه نِگَه کِردِمِه وِ ایوِیسُم مِنِه محبتِش. 11ای گَپَلَه وَ ایشا گُتُم تا شایی مو مِنِه ایشا هَم بو وِ شایی ایشا کامل وابو.»
12«حکمِ مِ یِنِه که یَکَه محبت کِنیت، هَموطو که مِ ایشا نَه محبت کِردِمِه. 13محبتی بیشتَرَ یِه وجود نَیارِه که کسی جونِشَه بِنِه وَ رَه دوسَلِش. 14دوسَلِ مِ ایشایِیت اَر اوچیئی که وَ ایشا حُکم ایکِنُم، اَنجوم بِئیت. 15دَ ایشا نَه غلام نیخونُم، سی‌یِکِه غلام وَ کارَلِ اربابش خَوَر نَیارِه. بلکم ایشا نَه دوسِ خِم ایخونُم، سی‌یِکِه هر چیئی که وَ بُو اِشنُفتِمِه، ایشا نَه وَش باخَوَر کِردِمِه. 16ایشا نَبیئیت که مِنَه انتخاب کِردیت، بلکم مِ ایشا نَه انتخاب کِردُم وِ قرار دام تا بِرِیت وِ میوَه بیاریت وِ میوۀ ایشا وِیسِه، تا هر چه وَ بُو وَ نومِ مِ درخواس کِنیت وَ ایشا عطا کِنِه. 17حکمِ مِ وَ ایشا یِنِه که یَکَه محبت کِنیت.»
نفرت دنیا وَ پیرویَلِ عیسی
18«اَر دنیا وَ ایشا نفرت دارِه، وَ یای داشتَه بِیت که نِهِی ایشا وَ مِ نفرت داشتِه. 19اَر این دنیا بیئیت، دنیا ایشا نَه مِی کَسَلِ خُوش دوس داشت. امّا سی‌یِکِه نَه این دنیایِیت، بلکم مِ ایشا نَه وَ دنیا انتخاب کِردِمِه، دنیا وَ ایشا نفرت دارِه. 20کلامی نَه که وَ ایشا گُتُم، وَ یای داشتَه بِیت: "غلام وَ اربابِ خُوش نَه گَوتَرِه." اَر مِنَه عذاب دان، ایشا نَه هَم عذاب اییِن؛ وِ اَر کلامِ مِنَه نِگَه کِردِن، کلامِ ایشا نَه هم نِگَه ایکِنِن. 21امّا تَمومِ اینگَلَه وَ خاطرِ نومِ مو بی ایشا ایکِنِن، سی‌یِکِه کسی نَه که مِنَه بِسی کِردِه نیشناسِن. 22اَر نَیومَیَه بییُم وِ بِی اونگَل گَپ نَزَیَه بییُم، گِنایی نَیاشتِن؛ امّا ایسِه دَ بونِه‌ای سی گِنایَلِشون نَیارِن. 23کسی که وَ مِ نفرت داشتَه بو، وَ بُوم هَم نفرت دارِه. 24اَر مِلِی اونگَل کارَلی نَکِردَه بییُم که غیرَ مِ هیشکَه نَکِردِه، گِنایی نیاشتِن؛ امّا ایسو، بِی یِکِه او کارَلَه دییِنِه، هَم وَ مو وِ هم وَ بُوم نفرت دارِن. 25وَ ای صورت، کلامی که مِنِه توراتِ خِشون اومَیِه، وَ اَنجومِ خِش ایرَسِه که: "بی‌دلیل وَ مِ نفرت داشتِن"»
26«امّا وختی او یاوَر که وَ طِی بُو سی ایشا بِسی ایکِنُم بیایِه، یعنی روحِ راستی که وَ بُو ایا، وِّ خُوش درموردِ مِ شهادَت اییِه. 27وِ ایشا هَم بایِس شَهادَت بِئیت، سی‌یِکِه وَ اَوَل بِی مِ بیئیتِه.»
Valið núna:
انجیلِ یوحنا 15: SLB
Áherslumerki
Deildu
Afrita
Want to have your highlights saved across all your devices? Sign up or sign in
@ 2024 Korpu Company