Luuka 22
22
Bakuutu ba Bayudaayo baakoti pfuundu yimbi mu Yisu
1Mukungi mapa ma maaveledaana, wu bubateele «mukungi a Paake» aba aka bebele. 2Bakuutu ba bangaanga ba Nzambi na milongisi mi Mikele baakasaha manzila ma uduba Yisu. Ka bo baaba na boomo bwa baatu.
Yuda asahi manzila ma usumbasa Yisu
3Mono buni Saatana hakoti mu Yuda, nga nduhi a Isikaryoti, wu aba mumosi ŋa hati la kuumi na biluumbi byole. 4Yuda ayayuhasana na bakuutu ba bangaanga ba Nzambi, na bakuutu ba bakeedi baa nzo a Nzambi. Bo baayuhisini mu usaha buni nde hakisumbasa bo Yisu. 5Bo baaba na kinya na bo baakuti mu uva Yuda mbongo. 6Yuda asiingi na abwi mu usaha nzila yimbwe mu usumbasa bo Yisu, hwavele baatu uyaba.
Yisu atumi mu uvangimasa metse ma mukungi a Paake
Mty 26.17-19; Mlk 14.12-16
7Ilumbu hi mukungi wu mapa ma maaveledaana, hi baakatsuha bungodu bwa Paake hyatoodi. 8Yisu atsindihi Peetelo na Yowani hu busu na aleeli bo: «Yavangimasaani bisu ilaambu hya Paake.» 9Bo baafuuli nde: «Huni we tondi ti bisu liyavangimasa hyo?» 10Nde afutili bo: «Ŋa benu lu ukoto mu musyenge, bahala limosi, na lisanga li laaluula mu mamba, sa ayabwana benu. Duukalaani nde hutso a nzo yi nde hukoto, 11na benu lileele nga nzo bunuubu: “Mulongisi ti: ‘Itini hya nzo hi me undya Paake na bayihi ba me huni hili?’” 12Buuna nde sa alaha benu itini hinene hi baamiivaanga hu yulu ibaanga. Ni huuna benu luvangimasa Paake.» 13Bo boole baayeni, baamoni mambu we bu Yisu hayabisi bo mo. Peetelo buna Yowani baavangimisi ilaambu hya Paake.
Ilaambu hya Pfumu
Mty 26.20,26-29; Mlk 14.17,22-25; 1Ko 11.23-26
14Tangu bu yatoodi, Yisu atsahili ŋa metse na biluumbi. 15Nde ni uleele bo: «Me mbeedi na lehemene mu udya ilaambu hya Paake mo yiina benu, tswamina me mono pasi. 16Ka, me ndeele benu, me a humbwendya hyo ve, natee bu Nzambi huva tsalu a hyo hu Ipfumu hya nde.» 17Nde avoli mbuungu, afutili matondo huli Nzambi, na aleeli: «Volwaani mbuungu moyi, na kabasanani yo. 18Me ndeele benu, vaangaani buuna, mu tooni ati, me a umbwenywa vinye ve, natee bu Ipfumu hya Nzambi hyuya.» 19Titswene nde avoli lipa, hu mbisa ufutala matondo huli Nzambi, nde abukili lo, akabili bo na aleeli: «Yiniiyi ni nyutu a me yi me apiidi mu benu. Baasaani buuna mu uba yibuhala me moonyi.» 20Nde asiidi ka bumosi mu mbuungu. Bu bo baamani udya, Yisu aviidi bo mbuungu na aleeli: «Mbuungu mo yiniiyi ni Nzuhisini yi Nyatihi, ŋa hati la Nzambi na baatu. Lahi mo liina baasiidi lo mu makila ma me, ma maatsamuhi mu benu.
21Ka monwaani, nde wuna wu usumbasa me, ni ŋa metse ŋa ali na me. 22Mwana a muutu sa akwa we bu huli kesili a Nzambi. Ka ni lingebe huli nde wuna wu usumbasa nde!» 23Na biluumbi byabandihi ufulasana ŋa hati la bo: «Na akisa buuna?»
Na afulala bukuutu?
Mty 20.24-28; 19.28; Mlk 10.41-45
24Ŋa hati li bayihi hwabwidi kele yinene, mu uyaba na ŋa hati la bo aba afulala bukuutu. 25Yisu aleeli bo: «Bapfumu ba mabuli ma matsi makima, bubaatsahilala baatu ba bo. Na babali na lituma ŋa yulu a bo, bubaasa ti baateele bo “banga mavaanga ma mabwe”. 26A huyelemene buuna mu benu ve. Nyaha wu aluta bukuutu ŋa hati la benu, aba we ngebe a benu; wu ubaatuma benu, aba we musalili a benu. 27Na fuli bukuutu, wuli ŋa metse vo musalili wuli mu uva nde byudya? Wuli ŋa metse, ni mukuutu. Ka me ndi ŋa hati la benu we musalili. 28Benu likwilili na me hutso mapasi ma me. 29Ni mu buuna, we bu Taata a me hava me lituma, me kaka ndi mu upa benu lituma, 30Ni mu buuna benu lu udya na unywa na me, hutso Ipfumu hya me. Na benu sa litsahala ŋa makiti ma bupfumu, mu utsundasa bibandu kuumi na byole bya Isereli.»
Yisu ayabisi ti Peetelo sa atuna nde
Mty 26.31-35; Mlk 14.27-31; Yow 13.37-38
31«Simoni, Simoni! Kele! Saatana amiivondo muswa mu ususa benu ŋa iyengese, we bu bubayengese mbutu a looso. 32Ka me atsambili mu we, mana hiitu hya we mu Nzambi, hiveletsuda. Na ŋa we uyafutaha huli me, hwadisa baana ba ngu a we.» 33Peetelo aleeli nde: «Pfumu, me ndi wu avangama mu uyene na we hutso a kondaayi na ukwa na we.» 34Yisu afutili nde: «Peetelo, me ndeele we, tsusu na maakohele loloyi, we sa tuna me tuna tatu.»
Mbongo, koome na sabila
35Nde abweleele bo: «Ŋa me atsindihi benu hwavele ipoholo hya mbongo, tso koome, tso bikoodi, benu laakiimi mu isiha?» Bo baafutili: «Isiha tso imosi ve.» 36Na nde aleeli bo: «Ka bunuubu, woosi nga ipoholo hya mbongo, nyaha avolo hyo. Ni we nga koome ka. Na wu avele na sabila, asumbasa ikutu hya nde na asumba sabila a nde. 37Ka me ndeele benu, hwafwana mu ukuhasa ma mumbihuli a Nzambi hasonehe mu me: “Baasuusi nde mu litangu la banga ma mabi, na dyaambu mo liinili lafwana utswiha mu tooni a me#Esa 53.12.” Mu tooni ati moosi ma baasonehe mu me, sa matswiha.» 38Bayihi baaleeli: «Pfumu, mono basabila boole.» Na nde afutili bo: «Baana tsiitsa!»
Yisu asambili ŋa isyelo hya Olive
Mty 26.36-46; Mlk 14.32-42
39Bu nde hapali, nde ayeni we bu hwaba ipfu hya nde hu isyelo hya Olive. Bayihi ba nde baaduukili nde. 40Bu nde hatoodi ŋa mbuha mo yiina, nde aleeli bo: «Sambilaani, mana Nzambi akumbasa benu mu uvelenyahula hiitu mu nde.»
41Titswene nde atahuhi mwaana lala na bo, na asambili. 42Yisu aleeli: «Taata, tso we tondi, maasila me mbuungu yi mapasi yiniiyi. Nyaha litondo la we livangama, ka a la me ve.» 43Na pofi amati huli Nzambi, ayamonehele na nde, mu uhwadisa nde. 44Hutso maangongo, nde akasambila na mifudi mi myavyohelele. Hyunga hya nde hyakituhi we matangi ma makila ma maakabwa ŋa toto. 45Bu nde hamani usambila buuna, Yisu atelimi, ayasusaha hu pedu bayihi ba nde. Nde abiisi bo tolo, hutso ikolili na lingebe. 46Yisu aleeli bo: «Mu hima benu lili mu ubwamina? Telemaani, na sambilaani, mana Nzambi akumbasa benu mu uvelenyahula hiitu mu nde.»
Yisu bamiiyakaanga
Mty 26.47-56; Mlk 14.43-50; Yow 18.3-11
47Nde a hamani utoyo ve, konge a baatu yayidi. Nga nduhi a Yuda, mumosi ŋa hati la kuumi na biluumbi byole, aba ŋa busu. Nde ayasusaha ŋa pedu a Yisu mu uviva nde. 48Yisu aleeli nde: «Yuda, ni mu muvivu we misuumbasa Mwana a muutu!» 49Biluumbi bya Yisu, bu byamoni ma maaba mu uvyoho, baafuli nde: «Pfumu, litina bo mu basabila ba bisu?» 50Na, mumosi mu bo ateti musalili wu mukuutu bangaanga ba Nzambi, na akesi nde tswi la mbahala. 51Ka Yisu aleeli: «Nyahaani! Buuna ka tsiitsa.» Yisu abembi tswi la bahala mo, na abeelusi nde. 52Titswene nde aleeli huli bakuutu ba bangaanga ba Nzambi, huli bakuutu ba bakeedi baa nzo a Nzambi, na huli bakuutu ba Bayudaayo ba baayidi, hu uyakanga nde: «Benu limiiya na basabila, na makooko we me wuli ipumbulu. 53Me kamba taangu yoosi na benu mu litandala la nzo a Nzambi, na benu a laakaangi me ve. Ka taangu mo yiniiyi ka ya benu na yi matwala ma piipidi.»
Peetelo atuni Yisu
Mty 26.57-58; Mlk 14.66-72; Yow 18.13-17
54Bu bo baamani ukaanga Yisu, bo baabiti nde hu nzo mukuutu bangaanga ba Nzambi. Peetelo akadukala bo mu lilalala. 55Ŋa butima bu litandala la nzo, bo baaduuki mbaahu, na baatsahili. Peetelo atsahili ŋa hati la bo.
56Musalili mumosi wu mukaasu wu abeedi na bo, mu liyalala la mbaahu adihuli Peetelo. Mukaasu asungimini nde na aleeli: «Bahala mo linili ka labeedi na Yisu!» 57Ka nde atuni na aleeli: «Mukaasu, me a nzaabi nde ve!» 58Mwana a taangu hole yivyoho, muutu mukima amoni nde na aleeli: «We kaka li mumosi wa ŋa hati la bo.» Na Peetelo akaali: «Bahala, a me ve!» 59Humbisa a bebele a ngunga mosi, mukima abwesilasa: «Mu mbuli, bahala mo linili kaka libeedi na nde, mu tooni ati nde musi Ngalili.» 60Peetelo akaali: «We, me a nzaabi ma we tondi uleele ve.» Mu taangu mo yiina, bu nde haba kini mu utoyo, tsusu akohili. 61Pfumu akinguhi na atali Peetelo. Na Peetelo ayibwili moonyi mu mambu ma Pfumu haleeli nde: «Tsusu na maakohele loloyi, we utuna me tunala tatu.» 62Peetelo apali mu litandala, nde abwi mu ulila mu mifudi.
Baatu baakanyongese Yisu
Mty 26.67-68; Mlk 14.65
63Baatu ba baakakeelese Yisu baakakwede nde, na baakatete nde. 64Bo baakafungala nde hiinzi, na baakava nde byuhu, na ubaaleele: «Bihula! Na leele na miitete we.» 65Bo baahwadi mu usinzatuha nde.
Yisu ŋa busu bwa pfuundu banzonzi baa Bayudaayo
Mty 26.59-66; Mlk 14.55-64; Yow 18.19-24
66Ŋa busi bwakiidi, bakuutu ba tungi la bula, bakuutu ba bangaanga ba Nzambi na milongisi mi Mikele, boosi baakuukimi. Baabiti Yisu ŋa busu bwa pfuundu a bo, pfuundu banzonzi yi Bayudaayo. 67Bo baleeli: «Tso we ni Kristo, leele bisu.» Yisu akaali bo: «Tso me ndeeli benu lo, benu a lusinga ve. 68Tso me piidi benu hyuhu, benu a lukaala me ve. 69Umata loloyi, Mwana a muutu sa atsahala ŋa mbahala a Nzambi a Pungu.» 70Boosi baaleeli: «We kaahu Mwana a Nzambi we li?» Na nde afutili bo: «Benu mwakulu limileele lo.» 71Na bo baaleeli: «Bisu a lisaali na nzala bambangi ve. Mu tooni ati bisu limiyuha bisu mwakulu ma mamipala mu munywa a nde.»
Valið núna:
Luuka 22: TSA
Áherslumerki
Afrita
Bera saman
Deildu
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.