Luuka 20
20
Lituma la Yisu
Mty 21.23-27; Mlk 11.27-33
1Ilumbu imosi, Yisu akalongese baatu mu litandala la nzo a Nzambi, na nde akayabisa musamu wu mubwe. Bakuutu ba bangaanga ba Nzambi, milongisi mi Mikele na bakuutu ba bibandu, baayasusaha huli Yisu. 2Bo baayafuula nde bu: «Leele bisu mu ki lituma we li mu usa mavaanga mo maniima, na ava we lituma mo linili?» 3Yisu afutili bo: «Nyaha me pa benu ka hyuhu imosi. 4Leelaani me, mu ki lituma Yowani hakatondehe baatu? Lituma mo liina huli Nzambi laamati, vo huli baatu?» 5Ka bo mwakulu baakafuulasana bu: «Tso lileeli ti: “Huli Nzambi”, nde sa afuula: “Mu hima benu laavelisa imiinu mu ma Yowani haleeli?” 6Ka tso lileeli ti: “Huli baatu”, baatu boosi sa balanga mamanya mu uduba bisu a benu. Mu tooni ati bo aba basiinga ti Yowani aba mumbihuli.» 7Bo baafutili bu: «Bisu a liyabi na atuma Yowani mu utondehe ve.» 8Na Yisu afutili bo: «Me kaka a ndeele benu ve, mu ki lituma me ndi mu utsa mavaanga mo maniima.»
Sahu li basali bababi mu ngundu a vinye
Mty 21.33-46; Mlk 12.1-12
9Humbisa Yisu abweta baatu sahu mo linili: «Bahala limosi laakuni ngundu a nde miti mya vinye. Bahala mo, nga ngundu, lasiisi yo ŋa myoho mi basali ba ngundu a vinye, na nde adyengi hu tsi kima mu taangu yinda. 10Bu taangu yi utsonzehe mbutu a vinye yatoodi, nga ngundu atsindihi musalili mumosi huli basali mana bo bava la nde kabu li muhunu a ngundu. Ka bo baarambi nde kuba na bo baafutili nde myoho bunyanga. 11Nga ngundu abwetsindaha musalili mukima. Ka basali baabweramba ka wuna kuba. Baayitili nde misaabu na baafutili nde myoho bunyanga. 12Nde abwetsindaha musalili wu mutatu. Bo baanemisi nde na baabingi nde. 13Nga ngundu ka ni uleele bu: “Hima me utsa? Me ka mwaana a me wu litondo me utsindaha, peleve bo bu ukiinza nde.” 14Ka bu basali ba ngundu baamoni nde, bo baatsimi na baalelisini: “Nde wu ni nga mukobe! Lidubaani nde, mana mukobe aba wa bisu!” 15Buuna bo baabwahi nde hu mbadi a ngundu a vinye, na baadubi nde. Hima nga ngundu a vinye husa huli baatu mobaniba? 16Nde sa aya, sa aduba basali mobana, na sa asombese ngundu huli basali bakima.»
Baatu ba baadukili sahu bayuha buuna, bo baaleeli: «Lo utwala uvangama buuna ve!» 17Ka Yisu atali bo na aleeli: «Mabasonehe ma Ngidi ma, hima matondi uleele:
“Manya li batungi baabumi,
laakituhi la ngu ŋa itungu hya nzo#Mkg 118.22”?
18Pasi nde wu ubwa ŋa yulu a manya mo lina sa asumbaha, na tso lo libwidi ŋa yulu a muutu, lo sa lihesolo nde.»
Mvutu a Yisu mu limandu la Kayisaali
Mty 22.15-22; Mlk 12.13-17
19Milongisi mi Mikele na Bakuutu ba bangaanga ba Nzambi, baasahi ukaanga Yisu masulubete. Ka bo baakabata kungi la baatu. Bo baayaabi ti kuma mo yiina mu bo Yisu hatiidi yo. 20Buuna, bo baakakete Yisu. Mono bu bo baatsindihi nde baatu ba baakamonehele we banga butsitu, mu ubaayuha ma nde hakalongese. Baatu mo baana baatehi nde mweto mu hyuhu, mana bo babahila nde tooni mu bitoyili bya nde, yi uyeholo nde huli lituma li bapfumu ba tsi. 21Baatu mo baana bavidi nde hyuhu mo hinihi: «Mulongisi, bisu liyaabi ti ma we ubaaleele na ubaalongese mali ma mabwe. We ali na buraandu ve. Ka we ubaalongese nzila a Nzambi mu imbuli. 22Ka leele bisu, baava muswa mu ufuta limandu huli pfumu Kayisaali vo naana?» 23Yisu ayaba dyeele la bo, aleeli bo: 24«Mwesaani me likuta limosi la mbongo. Hiinzi na bisono mo biniibi bya na?» Bo baafutili: «Bya Kayisaali.» 25Na Yisu aleeli bo: «Aka! Bi bili bya Kayisaali futalaani huli Kayisaali, bi bili bya Nzambi futalaani huli Nzambi.» 26Bo a baatwali ubaha lilibi mu ma nde haleeli ŋa busu bwa baatu ve. Ka mvutu a nde yakimusi bo. Bo baasi swi.
Mvutu a Yisu mu
Mty 22.23-33; Mlk 12.18-27
27Mwana kabu li Basaduki laayidi huli Yisu. Ni bo bali mu usilasa ti tsuuhili a babaakwa a yili ve. Bo baafuuli nde: 28«Mulongisi, Moose asiisa bisu mukele: “Muutu li na mwaana a ngu wu akwele. Nde miikwa na usiisa mukadi a nde wu avele na mwaana. Muutu mowuna afwana ukwele mukwili mana nde abutala wu akwa baana#Pfu 25.5-6.” 29Ka, hwaba na baana ba ngu tsambu. Mukulu akweli mukadi na nde akwidi hwavele usiisa mwaana. 30Waboole akweli mukwili. 31Ni buuna ka hwaba mu wu mutatu. Tsambu loosi, baakweli mukwili, baakwidi hwavele usiisa mwaana. 32Humbisa, mukaasu kaka akwidi. 33Mu tsuuhili a babaakwa, na uba mulumi mukaasu mo wunuuwu? Mu tooni ati tsambu la baana ba ngu loosi bakweli nde.»
34Yisu afutili bo: «Babahala na bakaasu ba tungi mo linili bali mukwelesene. 35Ka ba baayelemene mu uba moonyi mu tungi li uya, Humbisa a tsuuhili ŋa hati la babaakwa, utwala ubwekwele ve. 36Bo utwala ubwekwa ve, bo sa bafwanina na bapofi. Bo bu uba baana ba Nzambi, bu nde husuula bo mu babaakwa. 37Moose li mu umweese paayalala ti babaakwa sa basuuha. Mu mambu ma nde hasonihi mu muti wuli mu ululaha mbaahu, Moose aleeli ti Pfumu li “Nzambi a Abrahami, Nzambi a Isaki, Nzambi a Yakobi#Pal 3.6.” 38Nzambi a hali Nzambi a babaakwa ve, ka Nzambi a ba bali moonyi, mu tooni ati boosi bali moonyi mu nde.» 39Bakima ŋa hati li milongisi mi Mikele baaleeli: «We mitoyo bubwe Mulongisi.» 40Na bo a baabweyehele uva nde byuhu bikima ve.
Kristo ni Pfumu na mwaana a Davidi
Mty 22.41-45; Mlk 12.35-37
41Yisu ni uleele bo: «Buni bu utwala usilasa ti Kristo mwaana a Davidi? 42Davidi nde mwakulu li mu uleele mu muhanda Mikuunga ti:
“Pfumu aleeli huli Pfumu a me:
Tsahala ŋa mbahala a me,
43natee bu me ukitusa baboho ba we
isuusili hya miilu mya we#Mkg 110.1.”
44Tso Davidi li mu uteele Kristo “Pfumu”: Buni Kristo hutwala ubweba mwaana a nde?»
Yisu li mu ukebese Bangeele baa mikele
Mty 23.1-36; Mlk 12.38-40
45Baatu boosi baakayuha ma nde hakayabisa. Yisu aleeli huli bayihi ba nde: 46«Kebaani na milongisi mi Mikele. Baatu mo baana baatondo umonehele na biyunga bi bibwe. Bo bubaatondo ti bava bo mabwehe ma mafula butsitu ŋa miisu ma baatu. Bo bubaasaha bitsiha bya busu mu manzo ma masambulu ma Bayudaayo. Mu mikungi miminene mya ndiili ya ŋa tsitsaha, bo ubasaha mambuha matsomi. 47Bo bubaapatula bisiha bi manzo ma bakwili na, bubaasa masambulu ma mala mu umonehele ba babwe ŋa miisu maa baatu. Nzambi sa asyembe bo na bukanyi.»
Valið núna:
Luuka 20: TSA
Áherslumerki
Afrita
Bera saman
Deildu
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.