I. Korinito 3
3
1HNYAT me lakeiny lö, e ca khanö nya he ka fuc köbun helâ me tavat aten hanu, ke so bi helâ me tavat aten unyin, helâ me ta je mendreng unyi Keriso. 2Oge abelibun ge debai, ke ca haöbun bi ge utiö: anyin ae ca khanʼ öbun ehac; ke ca khanʼ öbun bala walang ang; 3anyin a öbun tiga aten unyin: anyin a e unyibun ihunyinköu me iwatretra, hawa, ca aten unyin bi öbun, kʼ öbun e he helâ me hwakecin at bi? 4Anyin a haingen ke at, ka habe, Iny atö Paulo inya; ke haingen ke at, Iny atö Apolo inya; hawa, öbun ca je at? 5Anyin a ieû Apolo? ke ieû Paulo? a li athnyaba a deny anyibun labageju; helâji me hnen Than hna ve ham köhmu. 6Inya oge tā, kʼ ame bû ga Apolo; ke haba Khong ame okûâ. 7Waleling me me ca ûnyi hnathu at ame tā, ke ca ûnyi hnathu minya bi at ame hû; ke so bi Khong at ame okûâ. 8Ke khaca thibi at ame tā me at ame hû: kʼ ame he ka ve hu hwaban ae ûcû ka hnyi anyidru huliwa. 9Anyin a ohmun tavat tha huliwa tot me Khong: ke öbun hna belok iny Khong, ke uma a op Khong.
10Oge hia but ip taben helâ me homakan hnyat op uma a at ae metâ, hoton ibetengiö baû anyin Khong adre me ham könya; ke haba ke at ame op goranyai hon. 11Anyin ae ca khana bi ke at he ka ip hmetu ke taben, ke so bi hnödra hna ip, wale Iesu Keriso. 12Ke a ne he ke at ka op gol hon taben eling, ame ne sileva, ame ne je veto omjeû, ame ne uto, ame ne ot, ame ne je thatûnyi; 13me ame he ka ve manen dut huliwa anyin at: anyin a hamen bong he ka omanenâ bi, kʼ adre me he ka omanenâ e hnen meic; ke hamen meic he ka ve cubic huliwa anyin at me me manen dut bongon. 14A ne tethmâ huliwa anyin ke at, waleji e ame op goranyai hon, me e ame he ka kap hwaban. 15A ne thong ut huliwa anyin ke at, me ame he ka hia but anyin ta je ûnyi: ke e ame he bi ka möt, ke helâke me ûheny hnyin meic.
16Hawa, e ca khanʼ öbun a haba öbun me hnân uma kap a umen Khong, kʼ ame laba Hanon Khong eû hnyi hnyibun. 17A ne okongoâ uma umen Khong hnen ke at, me ame he Khong ka okongoâ e; anyin ae kap uma umen Khong, wale thibi öbun.
18Ca he ke at ka hamen iyawâ e bi. A ne hu ke at unyibun ame ka ûnykûme a e at ae metâ eang hmeledrany, me so e ame he ka monu, me me metâ but. 19Anyin ae monu hnyi hnyimakan Khong metâiny hmeledrany. Anyin adre hia but sihnalimen, ka habe, E ame ohnokâ wametâ hnyi anyidra bibihwakeoin: 20ke wale hmetu ang, ka habe, E khana Than ae ûnyi baû ta je ûnykûmenen tavat ae metâ. 21Anyin a wale ca he ke at ka hobeluâ at. Anyin a anyibun ta je ûnyi hia thithö; 22ame ne Paulo, ame ne Apolo, ame ne Kefa, ame ne hmeledrany, ame ne möt, ame ne mok, ame ne ta je ûnyi walang ang, ame ne ta je ûnyi ame he ka o; anyibun hia thibut; 23ke haba öbun me anyin Keriso; ke haba Keriso me anyin Khong.
Valið núna:
I. Korinito 3: IAAI
Áherslumerki
Deildu
Afrita
Want to have your highlights saved across all your devices? Sign up or sign in
maintained by the British and Foreign Bible Society