SIEMPU LAIBU 14
14
Miphahte le Miphahte’ Inn Siensuona
1 Topa in Moses hopi-in tam bangci hi: 2Tam pen a kisiensuo ni-in miphah#14:2 vun natna nam tuomtuomte dinga kizang kammal hi a, a khietna a kicienin kithei lo hi. pa zui ding ngaina hi ding hi:
Siempu pa kungah ama kipeipi ding a,#Mat 8:4; Mrk 1:44; Luk 5:14; 17:14 3giephuol pulamah siempu pa pei-in velcienna khat bawl ding hi. Tua phah natna veipa a natna a dam leh, 4siempu pa in a kisiensuo pa dingin vata hinglai a sieng ni, taamtah sing, a ausan puon le hyssop la dingin amate a sawl ding hi. 5Siempu pa in leibeel sung khat a kikoi tuisieng tungah vata khat tha dingin thupie ding hi. 6Ama in tua vata hinglai pen taamtah sing le a ausan puon le hyssop-te tawh lahtha-in, tuisieng tunga kithat vata si’ sungah tuate le vata hinglai pen die ding hi. 7Ama in phah natna pana kisiengsah ding pa tungah sagi vei the ding hi; tua ciengin ama sieng hi, ci-in phuongzahin tua vata hinglai pen gamlahah hla ding hi. 8A kisiensuo ding pa in a puonsilte sawpsiengin a sam heu ding a, tui sungah kisilin ama a sieng hi ding hi. Tua zaw ciengin giephuol ah ama pei ding a, ahi vangin puonbuh pulamah ni sagi sung om ding hi. 9A ni sagi ni-in a mul zosie heu sieng ding hi: A lu, a khamul, a mitkhu mul le a mul zosie heu ding hi; tua ciengin a puonsilte sawpin tui sungah kisil ding a, ama a sieng hi ding hi.
10A ni giet ni-in ama in genbaang lo tuuno apa ni, le genbaang lo kum khat a pha tuuno khat, le an tawh biehna sathau kisawsa annel ephah#14:10 a gihna pen 6.5 liters bang tawh kikim hi. khat’ sesawm-suo- sethum le sathau log#14:10 A tui tena hi a, 0.3 liters bang tawh kikim hi. khat la ding hi. 11Ama a siensuo siempu pa in a kisiensuo ding pa pen tam teng tawh, kikhopna buh lutna Topa mai-ah koi ding hi. 12Siempu pa in tuuno apa khat la-in sathau log khat tawh khielna zieha biehna-in pie ding a, Topa mai-ah a kivei biehna-in tuate lamto ding hi. 13Ama in mawna zieha biehna le meihal biehna gan kigawna mun siengtho-ah tua tuuno go ding hi; azieh pen mawna zieha biehna bangin khielna zieha biehna pen siempu pa-a’ ahi hi; tua khu a siengtho pen ahi hi. 14Siempu pa in khielna zieha biehna si themkhat la ding a, a kisuonsuo ding pa’ a zietlam biltep tung, a zietlam khutpi tung, le a zietlam kepi tungah tua si nu ding hi. 15Siempu pa in sathau log khat panin themkhat la-in a veilam khut phangah sung ding a, 16a veilam khut sunga om sathau sungah a zietlam khutme die-in a khutme tawh sathau themkhat Topa mai-ah sagi vei the ding hi. 17Siempu pa in a khut sunga a omlai sathau themkhat, a kisiensuo ding pa’ a zietlam biltep, a zietlam khutpi, le a zietlam kepi nu-in khielna zieha gansi tungah koi ding hi. 18Siempu pa’ khut sunga sathau omlai teng pen a kisiensuo ding pa’ lu tungah nupieh ding hi. Tua ciengin siempu pa in Topa mai-ah ama adingin thoidamna bawlpieh ding hi. 19A sien lona panin a kisiensuo ding pa ading thoidamna bawl nadingin siempu pa in mawna zieha biehna pie ding hi. Tua ciengin ama in meihal biehna go ding hi; 20tuale siempu pa in maitam tungah meihal biehna le an tawh biehna te koi ding hi. Tua bangin ama adingin siempu pa in thoidamna bawlin ama a sieng hi ding hi.
21Hinanle ama a zawn ziehin tampi a pieh zawh sih leh ama ading thoidamna bawl nadingin ama in a kivei ding, khielna zieha biehna dingin tuuno khat, an tawh biehna dingin sathau kisaw annel ephah’ sesawm-suo- sekhat le sathau log khat pie ding hi; 22vakhu ni ahi sihle paalva ni zong a pieh zawh bangbangin pie ding a, khat pen mawna zieha biehna hi ding a, a khat pen meihal biehna hi ding hi. 23A ni giet ni-in ama in Topa mai, kikhopna puonbuh lutna, siempu pa kungah ama’ kisiensuo nadingin tuate tawi ding hi; 24tuale siempu pa in khielna zieha biehna tuuno le sathau log khat la ding a, a Topa mai-ah a kivei biehna-in tuate lamto ding hi. 25Siempu pa in khielna zieha biehna tuuno go ding a, tua khielna zieha biehna sasi themkhat la-in a kisiensuo pa’ a zietlam biltep, a zietlam khutpi, le a zietlam kepi nu ding hi. 26Siempu pa in a veilam khutkuoh sungah sathau themkhat sung ding a, 27a veilam khut sunga om sathau themkhat, Topa mai-ah a zietlam khutme tawh sagi vei the ding hi. 28Siempu pa in a khut sunga om sathau themkhat, a kisiensuo ding pa’ a biltep, a zietlam khutpi, le a zietlam kepite tungah khielna zieha biehna gan si kikoina munah nu ding hi. 29A khut sunga sathau omlai teng pen siempu pa in a kisiensuo ding mipa adingin Topa mai-ah thoidamna bawl nadingin a lu tungah nupieh ding hi. 30Ama in vakhu ahi sihle paalva a piehzo zawzaw pie-in, 31khat#14:31 Gk Syr: Heb “bawlzo, ama in tua bang bawlzo, khat “ pen mawna zieha biehna ding, a khat pen meihal biehna dingin an tawh biehnate tawh piehtha ding hi; tuale siempu pa in a kisiensuo pa dingin Topa mai-ah thoidamna bawlpieh ding hi. 32Tami khu phah natna a vei, siensuo nading biehna a lui zo lo mipa dinga ngaina ahi hi.
33 Topa in Moses le Aaron hopi-in tam bangin gen hi:
34Keima in na luo ding vua kang pieh Canaan gamah nang pei uh ciengin na tenna mun inn khatah phah natna kang tunsah leh, 35inn nei pa pei-in siempu pa kungah, “Ka inn sungah natna nam khat a om tawh kibang sa ing,” ci-in gen ding hi. 36Siempu pa in tua inn sunga om van zosie a sieng lo a kici lo nadingin, tua natna kan dingin siempu pa a pei masangin tua inn a hawma a op nadingin thupie ding hi; tua zaw ciengin inn van dingin siempu pa pei ding hi. 37Ama in a natna vel ding hi; inn kawm tung tengah natna omin, a engsim le a sansim ahi a, tua pen kawm maitang sangin a thuh zawh tuoh leh, 38inn sung panin inn mai kotah siempu pa pusuohin ni sagi sung kot khahcip ding hi. 39A ni sagi ni-in siempu pa peikia-in cienvel ding hi; kawm tung tengah tua natna a kizel leh, 40siempu pa in tua natna banna suongte khawhdawhin khuo pulam nin buohna mun khat a pai dawh dingin thupie ding hi. 41Ama in inn sunglam kizutna zosie hiet siengsahin, a khawdawh uh a kizutna themneng zosie khuo pulam nin buohna mun khatah buo ding uhi. 42Amate in suong dangte la-in tua suongte munah a koi ding vua, a zutna dang khat la-in tua inn zut ding uhi.
43Ama in suongte ladawhin a inn hiet siengin a zut sieng zaw ciengin tua inn sungah natna a tunkia leh, 44siempu pa pei-in cienvel ding hi; inn sung tengah tua natna a kizel zo tah leh, tua khu inn sunga om a zauhuoi phah natna ahi hi; tua pen a sieng lo ahi hi. 45Ama in tua inn a suong a sing le a kizutna zosie phelsah ding a, khuo pulam nin buohna mun khatah a puosah ding hi. 46Tua inn a kikha hun sunga a lut mi zosie nitah dongin a sieng lo hi ding hi; 47tua inn sunga a lum mi zosie in a puonte a sawp sieng ding uhi; tua inn sunga anne zosie in zong a puonte a sawp sieng ding uhi.
48Siempu pa pei-in a cienvel a, tua inn a kizut zaw ciengin natna a kizel nawn sih leh siempu pa in tua inn sieng hi, ci-in phuongzah ding hi; tua natna dam zo hi. 49Tua inn siensuo nadingin ama in vata ni, taamtah sing le a ausan khau le hyssop na tawh lahtha-in, 50vatate lahah khat pen tua tuisieng tunga leibeel sungah that ding a, 51tua vata hinglai tawh taamtah sing, hyssop sing le a ausan khaute lahtha-in, tua tenga kigo vata’ si tawh tuisieng sungah die-in tua inn sagi vei the ding hi. 52Tua bangin ama in vata’ si tawh, tuisieng tawh, vata hinglai tawh, taamtah sing, hyssop sing le a ausan puon tawh a inn siengthosah ding hi; 53tuale ama in khuopi pulam gamlahah tua vata hinglai hla ding hi; tuaci’n ama in tua inn adingin thoidamna bawlpieh ding a, tua inn a sieng hi ding hi.
54Tami khu phah natna khatpo tawh kisai sep ding ngaina ahi hi: Cithah ading, 55puonte le inn sunga om phah natnate ading, 56cibaw ahi sihle hima ahi sihle cikhangte ading, 57bang hun ciengin sieng lo a, bang hun ciengin sieng ahei ci-in khinkhai thei nading ahi hi. Tami khu phah natna tawh kisai bawldan ngaina ahi hi.
Valið núna:
SIEMPU LAIBU 14: ZBOTF01
Áherslumerki
Deildu
Afrita
Want to have your highlights saved across all your devices? Sign up or sign in
Zo Bible © Bible Society of Myanmar, 2018.