Vinsæl biblíuvers úr ROMANOS 8

Deildu

Jlyo tianꞌ chaꞌ nda Ndiose chabiyaꞌ sa ñaꞌan ka nchga chaꞌ nu nsuꞌwi chalyuu, chaꞌ ka suꞌwe chalyuu seꞌen ndiꞌian, si nu suꞌwe nka tiyean loꞌo Ni. Wa ngulo suwi Ni ꞌñaan, chaꞌ kaan sa ñaꞌan nu ngwa tiꞌ Ni chaꞌ kaan ti kulo.

Kanꞌ chaꞌ jlyo tianꞌ ni, chaꞌ ja ska ꞌa nan ndiya nu ka kuꞌni chaꞌ kulaa yaꞌ Ndiose ꞌñaan, chaꞌ suꞌwe ꞌa nka tiye Ni ñaꞌan Ni ꞌñaan; ni siya wa ngujwian, ni siya ti luꞌuan, ja kulaa yaꞌ Ni ꞌñaan. Loꞌo angajle nu ndiꞌin nde niꞌ kwan, loꞌo kwiꞌin nu nka ndloo la lo yuu, ja siyaꞌ nchka ꞌin nu kwa kuꞌni chaꞌ kulaa yaꞌ Ni ꞌñaan. Ni siya chalyuu seꞌen ndiꞌian ni, ni siya chalyuu nu ka nde loo la, ja kulaa yaꞌ Ni ꞌñaan bra kanꞌ. Ja ndiya ꞌa nu nka ndloo la lo chalyuu re nu nchka ꞌin kulaa ꞌñaan yaꞌ Xꞌnaan. Ja ska nan nu nsuꞌwi niꞌ kwan, ja ska nan nu nsuꞌwi kiꞌñi niꞌ yuu, ja ska nan ñaꞌaan chalyuu nu ngwiñan Ndiose, ja kaja ñaꞌan kulaa ran ꞌñaan yaꞌ Jesucristo nu nka Xꞌnaan, ti kwiꞌ nu suꞌwe ꞌa lka tiye ñaꞌan ꞌñaan.

Kanꞌ chaꞌ ndayaꞌ Tyiꞌi Ndiose ꞌñaan, chaꞌ ja nchka ꞌñaan siyaꞌ ti. Ja jlyo ꞌa tianꞌ sa ñaꞌan chaꞌ nu suꞌwe la chkwianꞌ loꞌo Ndiose; Tyiꞌi Ndiose lka nu nduꞌu ꞌñaan sa ñaꞌan chaꞌ nu chkwianꞌ loꞌo Ni. Jlyo tiꞌ Tyiꞌi Ndiose ni siya tnun ꞌa chaꞌ ndaꞌan tiyean, loꞌo ja ndyiji ñaꞌan nu ka chkwianꞌ chaꞌ kanꞌ loꞌo Ni; kanꞌ chaꞌ loꞌo Tyiꞌi Ndiose nchkwiꞌ loꞌo Ndiose Stian chaꞌ ꞌñaan bra kanꞌ.

Xa wa ynaan nchga chaꞌ suꞌwe kanꞌ, bra kanꞌ ka chkwianꞌ chaꞌ ja ndiya ꞌa nu ka xuun loꞌoan, chaꞌ Ndiose lka nu ndiꞌin loꞌoan.

Loꞌo ni, nde ñaꞌan yꞌni Ndiose chaꞌ ꞌñaan. Ja nganun ꞌa yuweꞌ ꞌñaan ni, chaꞌ suꞌwa ndiꞌin chaꞌ ꞌñaan loꞌo Jesucristo; ja ka ꞌa ꞌin nu xaꞌan nu nsuꞌwi chalyuu jwakii ꞌñaan ni, chaꞌ Tyiꞌi Ndiose lka ndloo la ꞌñaan bra nu ndiꞌian lo chalyuu.

Kanaꞌ chalyuu ꞌñaan, si kuꞌnian xkwiꞌ chaꞌ xaꞌan nu nsuꞌwi chalyuu; loꞌo kaja chalyuu kwi ꞌñaan chaꞌ tiin ti tyiꞌian, si kunaan nchga chaꞌ nu nchkwiꞌ Ndiose.

Ni siya ngwañaꞌan, lye ꞌa ndijiin lyoan ꞌin chaꞌ xaꞌan kanꞌ; ja nda ꞌa Jesús chabiyaꞌ ꞌin nu xaꞌan chaꞌ kulo tñan ꞌñaan, chaꞌ suꞌwe ꞌa nka tiye Ni ñaꞌan Ni ꞌñaan.

Ndiya bra ndijian chinꞌ nu tiꞌí bra nu ndiꞌian lo chalyuu; chinꞌ ti chaꞌ lka chaꞌ kanꞌ, loꞌo ja suꞌwa chaꞌ tiꞌí kanꞌ loꞌo chaꞌ suꞌwe nu kaja ꞌñaan nde loo la, nxkeꞌ tiǎnꞌ. Loꞌo ngwañaꞌan, ti ji kwaꞌu Ni nchga chaꞌ ꞌñaan, sa ñaꞌan ka chaꞌ suꞌwe kanꞌ nde loo la.

Ja ska la chaꞌ xaꞌan ndiya lo chalyuu nu ka kuꞌni chaꞌ kulaa yaꞌ Krixtu ꞌñaan ni, chaꞌ suꞌwe ꞌa nka tiye Krixtu ñaꞌan Ni ꞌñaan. Ja ska ka ꞌñaan, ni siya tiꞌí ꞌñaan, ni siya tiꞌi ti ndiꞌian lo chalyuu, ni siya ta ꞌa neꞌ nu tiꞌí ꞌñaan, ni siya ndiꞌian lo jwiꞌñan, ni siya wa mdyii steanꞌ msun, ni siya nsuꞌwi ꞌa chaꞌ xaꞌan seꞌen ndiꞌian, ni siya kujwi neꞌ ꞌñaan; nchga chaꞌ kanꞌ, ja ka kuꞌni chaꞌ kulaa yaꞌ Krixtu ꞌñaan.

Ndlo Ndiose nchga chaꞌ nsuꞌwi tiye nten. Kwiꞌ ngwañaꞌan, jlyo tiꞌ Ni nchga chaꞌ nu nchka tiꞌ Tyiꞌi Ni chkwiꞌ loꞌo Ni, chaꞌ bra nu njñan nu kanꞌ ska chaꞌ ꞌin Ndiose Stian chaꞌ ꞌñaan, ska ti chaꞌ nchkwiꞌ Tyiꞌi Ni loꞌo nchga chaꞌ nu ndaꞌan chaꞌ tiye Ndiose Stian.

Taꞌaan, wa lkaan sñiꞌ Ndiose si ngiꞌnian nchga tñan nu ndlo Tyiꞌi Ndiose ꞌñaan.

Bra nu ngiꞌnian sa ñaꞌan nu ngiꞌni nten chalyuu ti, ti kwiꞌ chaꞌ xaꞌan nu nsuꞌwi ꞌin nten kanꞌ, kanꞌ lka ndloo la niꞌ kasiya ꞌñaan bra kanꞌ; loꞌo ni, si Tyiꞌi Ndiose ka ndloo la ꞌñaan xa nu ndiꞌian lo chalyuu, bra kanꞌ ka ꞌñaan kuꞌnian nchga chaꞌ nu nchkwiꞌ Ndiose.

Ja mda Ndiose chabiyaꞌ ꞌin Jesús chaꞌ xiꞌin chunꞌ yu ꞌin tñan nu ndiꞌin chaꞌ kuꞌni yu, ni siya ska ti yu lka yu Sñiꞌ Ndiose; msuꞌwa Ni ꞌin yu chaꞌ kaja yu lo wsi chaꞌ ꞌin nchga nan loꞌo ꞌñaan taꞌaan. Wa mda Ni nchga chaꞌ suꞌwe nu ꞌin ykwiꞌ Ni ꞌin Jesús, ti kwiꞌ nu lka ska ti Sñiꞌ Ni. Kwiꞌ ngwañaꞌan, ska ti biyaꞌ ta Ni chaꞌ kanꞌ ꞌñaan, sa ñaꞌan nu mda Ni chaꞌ kanꞌ ꞌin Sñiꞌ Ni.

Chaꞌ nu nsuꞌwi niꞌ kasiya ꞌñaan ni, suꞌwa nka chaꞌ kanꞌ loꞌo chaꞌ nu nchkwiꞌ Tyiꞌi Ni loꞌoan, chaꞌ wa lkaan sñiꞌ Ndiose. Chaꞌ nu lkaan sñiꞌ Ndiose ni, ndiꞌin chaꞌ kaja nchga chaꞌ suꞌwe nu ta Ni ꞌñaan bra kanꞌ, nchga chaꞌ nu wa nda Ni ꞌin Krixtu. Loꞌo ni, si nchka tianꞌ chaꞌ suꞌwa tyiꞌian loꞌo Krixtu nde seꞌen tlyu la seꞌen ndiꞌin Ni, bra kanꞌ ndiꞌin chaꞌ taloan xa nu ta neꞌ nu tiꞌí ꞌñaan lo chalyuu re, ti kwiꞌ ngwañaꞌan ndalo ykwiꞌ Krixtu bra nu mda neꞌ nu tiꞌí ꞌin yu.

Nan nxuan loꞌo Ndiose lka chaꞌ, si ñaꞌan ti ngiꞌnian chaꞌ xaꞌan sa ñaꞌan nu ngiꞌni nten chalyuu ti; ja nchka ꞌñaan kuꞌnian siyaꞌ ti chaꞌ nu nchkwiꞌ Ndiose loꞌoan, si ñaꞌan ti nchka tianꞌ kuꞌnian chaꞌ xaꞌan.

Nchga nan luꞌu nu wa ngwiñan Ndiose lo chalyuu, ndiꞌin ta nan kanꞌ ꞌin Ndiose, sa ñaꞌan bra nu kwaꞌu Ni ꞌin nten chalyuu sa ñaꞌan nten nu chañi chaꞌ lka sñiꞌ Ndiose.

Ti ji ka chaꞌ nu tnun kanꞌ; jlyo tianꞌ chaꞌ nsuꞌwi ꞌa chaꞌ tiꞌí, nchga nan nu ngwiñan Ndiose lo chalyuu lye ꞌa ndii tiꞌ ran nu tiꞌí. Sa ñaꞌan nu ndijyan tiꞌí ꞌin ska nu kunaꞌan chaꞌ wa kala ti sñiꞌ, ngwañaꞌan ndiya nu tiꞌí lo chalyuu ni.